ព័ត៌មានជាតិ

លោក ហេង សួរ ៖ ការបណ្ដុះបណ្ដាលជំនាញវិជ្ជាជីវៈជំហានដំបូង មានសិស្ស ៥០០ ថ្នាក់ ស្មើ ជាង ១ ម៉ឺននាក់

បានផុស

២ years មុន

នៅ

ថ្ងៃចន្ទ ៨ មករា ២០២៤

ដោយ

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា ក្រសួងការងារ នឹងបើកវគ្គបណ្ដុះបណ្ដាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យជំហានដំបូងមានចំនួន ៥០០ ថ្នាក់បច្ចេកទេស ស្មើនឹង ១៥ ០០០ នាក់។

ថ្លែងក្នុងពិធីជួបសំណេះសំណាលជាមួយកម្មករ-និយោជិត ចូលរួមចំនួន ១០ ៩៧៥ នាក់ នៅឃុំប៉ាក់ខ្លង ស្រុកមណ្ឌលសីមា ខេត្តកោះកុង លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានបន្ថែមថា ការបើកវគ្គបណ្ដុះបណ្ដាលថ្នាក់ដំបូងនេះ គឺក្នុងពេលឆាប់ៗ ខាងមុខនេះ។

បើតាម លោក ហេង សួរ គិតត្រឹមថ្ងៃទី ៧ ខែមករា ឆ្នាំ ២០២៤ នេះ មានយុវជនចុះឈ្មោះចំនួន ២១ ៥៩៥ នាក់ ក្នុងនោះ រាជធានីភ្នំពេញចំនួន ៨ ៣៥៣ នាក់, បាត់ដំបង ២ ៦៩៩ នាក់, សៀមរាប ១ ៦១២ នាក់, កណ្ដាល ៧៧៦ នាក់, ព្រះសីហនុ ៧៥៥ នាក់, និងបណ្ដាខេត្តផ្សេងៗ ចំនួន ៧ ៤០០ នាក់។ ក្រសួងការងារ និងបណ្ដុះបណ្ដាលវិជ្ជាជីវៈ នឹងចាប់ផ្ដើមបើកវគ្គបណ្ដុះបណ្ដាលជំហានដំបូងនាពេលដ៏ខ្លីខាងមុខនេះ ចំនួន ៥០០ ថ្នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្ថែមថា អំពីការអនុវត្តកាតព្វកិច្ចហ្វឹកហ្វឺនកូនជាង ហាត់ការ និងកម្មសិក្សា គឺ កាលពីថ្ងៃទី ១១ ខែវិច្ឆិកា ក្រសួង ចុះអនុស្សរណៈ នៃការយោគយល់គ្នា ជាមួយសភាពាណិជ្ជកម្មកម្ពុជា និងសមាគមនិយោជក ចំនួន ១៧ ស្ដីពីកិច្ចសហប្រតិបត្តិការលើការហាត់ការ និងកម្មសិក្សា ដើម្បីគាំទ្រដល់ការបណ្ដុះបណ្ដាលជំនាញវិជ្ជាជីវៈ និងបច្ចេកទេស ដែលចាត់ទុកថាជាកិច្ចសហប្រតិបត្តិការបើកផ្លូវដើម្បីផ្សារភ្ជាប់ទ្រឹស្ដីជាមួយនឹងការអនុវត្ត, ចូលរួមចំណែក ជួយកសាង អភិវឌ្ឍន៍ និងពង្រឹងធនធានមនុស្សនៅកម្ពុជា, និងអាចឲ្យម្ចាស់រោងចក្រ សហគ្រាស និងក្រុមហ៊ុនឯកជននានាជ្រើសរើសក្នុងចំណោមអ្នកហាត់ការដែលស្គាល់ និងយល់ដឹងអំពីកន្លែងការងារស្រាប់ ធ្វើជាកម្មករ-និយោជិត និងបុគ្គលិករបស់ខ្លួនតែម្ដង។

លោកបន្តថា «ក្រសួង ប្ដេជ្ញាអនុវត្តឲ្យបាននូវអនុសាសន៍ដ៏ខ្ពង់ខ្ពស់របស់ សម្ដេចធិបតី ត្រូវធ្វើយ៉ាងម៉េចឲ្យយុវជនយើងបានចូលរៀន រៀនឲ្យចប់ រៀនឲ្យចេះ និងឲ្យមានការងារធ្វើ ឬសង្ខេបដោយសាមញ្ញ គឺ «រៀនឲ្យចប់ ឲ្យចេះ ឲ្យមានការងារ»។

លោកបានលើកឡើងថា កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ រួមទាំងកម្មករ-និយោជិត ដែល សម្តេចធិបតី បានប្រកាសដាក់ឲ្យអនុវត្តជាផ្លូវការរួចហើយនូវកម្មវិធីនេះ កាលពីថ្ងៃទី ១៤ ខែវិច្ឆិកា ឆ្នាំ ២០២៣ កន្លងទៅ នឹងជួយដល់យុវជនមកពីគ្រួសារមានបណ្ណសមធម៌ និងបណ្ណសម្គាល់គ្រួសារងាយរងហានិភ័យ អាចចូលរៀនដោយមិនបង់ថ្លៃ, ទទួលបានប្រាក់ឧបត្ថម្ភប្រចាំខែចំនួន ២៨ ម៉ឺនរៀល, ទទួលបានការប្រឹក្សាយោបល់ពីការជ្រើសរើសជំនាញ និងព័ត៌មានទីផ្សារការងារ, ចុះកម្មសិក្សានៅតាមសហគ្រាស គ្រឹះស្ថាន ឧស្សាហកម្ម និងក្រុមហ៊ុនឯកជន, ជំនាញមួយពិតប្រាកដ ទីផ្សារការងារកំពុងត្រូវការ, និងឱកាសការងារធ្វើសមរម្យ និងប្រាក់ចំណូលទៀងទាត់រួចចាកផុតពីបន្ទាត់ នៃភាពក្រីក្រ៕