សម្តេចនាយករដ្ឋមន្ត្រី ប្រកាសថា រាជរដ្ឋាភិបាល នឹងបន្តលើកកម្ពស់ថែមទៀតដល់តួនាទីស្ត្រីក្នុងសង្គម

អញ្ជើញជាអធិបតីពិធីបិទសន្និបាតបូកសរុបការងារប្រចាំឆ្នាំរបស់ក្រសួងកិច្ចការនារី នៅរសៀលថ្ងៃទី១១ ខែមករា ឆ្នាំ ២០២៤នេះ សម្ដេចធិបតី នាយករដ្ឋមន្ត្រីកម្ពុជា បានប្រកាសថា រាជរដ្ឋាភិបាល អាណត្តិទី៧ នឹងបន្តជំរុញ និងលើកកម្ពស់បន្ថែមទៀតដល់តួនាទីស្ត្រីនៅក្នុងសង្គមជាតិកាន់តែច្រើនថែមទៀត។

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដូច្នេះថា៖ «រាជរដ្ឋាភិបាល នីតិកាលទី៧ នឹងបន្តមរកតដ៏ថ្លៃថ្នារបស់សម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា តាមរយៈការបន្តជំរុញ និងលើកកម្ពស់បន្ថែមទៀតដល់តួនាទីស្ត្រី នៅក្នុងសង្គមជាតិ ដោយផ្ដល់តម្លៃខ្ពស់ដល់តួនាទីរបស់ស្ត្រីក្នុងការចូលរួមអភិវឌ្ឍន៍សេដ្ឋកិច្ច-សង្គម»។

បើតាមការបញ្ជាក់របស់សម្ដេចធិបតី ទន្ទឹមនេះ រាជរដ្ឋាភិបាល នឹងបន្តពង្រឹងភាពជាពលរដ្ឋនៅក្នុងសង្គមដែលមានអរិយធម៌ខ្ពស់ ប្រកបដោយសីលធម៌ សមធម៌ បរិយាប័ន្ន ដែលក្នុងនោះ ស្រ្តី គឺជាស្នូលដ៏សំខាន់ តាមរយៈការផ្ដល់ឱកាសបន្ថែមទៀតសម្រាប់ការចូលរួមរបស់ស្ត្រីឱ្យកាន់តែច្រើន និងកាន់តែទូលំទូលាយក្នុងការកំណត់ជោគវាសនារបស់ប្រទេសជាតិ។

សម្ដេច នាយករដ្ឋមន្ត្រី គូសបញ្ជាក់ថា ជាក់ស្ដែង រាជរដ្ឋាភិបាល បានបន្តកំណត់សមភាពយេនឌ័រ និងការបង្កើតភាពអង់អាចដល់ស្ត្រី និងក្មេងស្រីនៅលើគ្រប់វិស័យ ដែលជាអាទិភាពក្នុងរបៀបវីរៈគោលនយោបាយនៃយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងគោលនយោបាយជាតិស្ដីពីការសមភាពយេនឌ័រ ដែលនឹងប្រកាសអនុវត្តឆាប់ៗខាងមុខនេះ៕