ពលរដ្ឋអាចប្រាប់ពីករណីគ្រឿងញៀនតាមប្រព័ន្ធ Hotline របស់មន្ទីរប្រឆាំងបទល្មើសគ្រឿងញៀន ដោយរក្សាការសម្ងាត់

មន្ទីរប្រឆាំងបទល្មើសគ្រឿងញៀន នៃក្រសួងមហាផ្ទៃ បានលើកទឹកចិត្តដល់ប្រជាពលរដ្ឋចូលរួមរាយការណ៍មកសមត្ថកិច្ចជំនាញជុំវិញករណីគ្រឿងញៀន តាមរយៈប្រព័ន្ធទូរស័ព្ទទាន់ហេតុការណ៍ (Hotline) ដោយមន្ទីរប្រឆាំងបទល្មើសគ្រឿងញៀន ធានារក្សាការសម្ងាត់សម្រាប់អ្នករាយការណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមមន្ទីរប្រឆាំងបទល្មើសគ្រឿងញៀន លេខទូរស័ព្ទទាន់ហេតុការណ៍ (Hotline) ដែលប្រជាពលរដ្ឋអាចទំនាក់ទំនង ដើម្បីរាយការណ៍ពីករណីគ្រឿងញៀនបាន គឺលេខ ៦៧០ អាចហៅចូលដោយឥតគិតថ្លៃ ឬតាមរយៈលេខទូរស័ព្ទ ០៩៣ ៤៥៦ ៨៨៨, ០១១ ២៤៨ ៨៨៨, ០១៥ ២២២ ២២៦ និងលេខ ០៦៦ ៦៦១ ៦៦១។

ប្រព័ន្ធទំនាក់ទំនងទាន់ហេតុការណ៍ រៀបចំឡើងស្របតាមផែនការណែនាំរបស់ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត ដែលបានណែនាំឱ្យស្ថាប័នមានសមត្ថកិច្ចរៀបចំប្រព័ន្ធទូរស័ព្ទទាន់ហេតុការណ៍ (Hotline) ដើម្បីដាក់ឱ្យដំណើរការក្នុងការទទួលព័ត៌មាន ចាត់វិធានការដោះស្រាយ និងអន្តរាគមន៍នៅពេលមានបណ្ដឹង ព័ត៌មាន ឬសំណូមពរពីមជ្ឈដ្ឋាននានាពាក់ព័ន្ធបទល្មើសគ្រឿងញៀន។

ដើម្បីបន្តចាត់តាំងអនុវត្តឱ្យមានប្រសិទ្ធភាពលើបញ្ហាគ្រឿងញៀន រាជរដ្ឋាភិបាលកម្ពុជា អាណត្តិទី៧ បានបន្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៩ ឆ្នាំ២០២៤ ដោយខិតខំចាត់វិធានការបង្ការ ទប់ស្កាត់ និងបង្ក្រាបឧក្រិដ្ឋកម្មគ្រឿងញៀន ដោយធ្វើយ៉ាងណាបញ្ចៀសមិនឱ្យប្រទេសកម្ពុជាក្លាយជាគោលដៅនៃការប្រព្រឹត្តបទល្មើសគ្រឿងញៀន និងមិនឱ្យគ្រឿងញៀនបង្កឥទ្ធិពលញាំញី និងបំផ្លិចបំផ្លាញសង្គមជាតិបន្តទៀតឡើយ។

តាមផែនការណែនាំ នាពេលថ្មីៗនេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ជាគោលការណ៍រួមមួយចំនួនដល់ភាគីមានសមត្ថកិច្ចពាក់ព័ន្ធក្នុងការអនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់នេះ ដោយក្នុងនោះ ត្រូវបំផុសចលនាលើកទឹកចិត្តឱ្យមានការចូលរួមច្រើនកុះករពីគ្រប់សមាសភាពនៃសង្គម សំដៅបង្កើតបានជាកម្លាំងសរុប មធ្យោបាយសរុប វិធានការសរុប ជាពិសេសស្រទាប់យុវជនក្នុងការប្រយុទ្ធប្រឆាំងគ្រឿងញៀនខុសច្បាប់ ស្របតាមទិសស្លោក «៣កុំ ១រាយការណ៍»។

ទន្ទឹមនេះ ត្រូវជំរុញចលនាផ្សព្វផ្សាយគោលនយោបាយ «ភូមិ ឃុំ-សង្កាត់មានសុវត្ថិភាព» ឱ្យបានសកម្មផុលផុសតាមគ្រប់រូបភាព គ្រប់ទីកន្លែង ចំគោលដៅ និងចំមុខសញ្ញា ជាពិសេសសិស្សានុសិស្ស កម្មករ ពលករ ដើម្បីបានជ្រួតជ្រាប យល់ដឹងអំពីគ្រោះថ្នាក់ដោយសារគ្រឿងញៀន និងច្បាប់ស្តីពីការត្រួតពិនិត្យគ្រឿងញៀន សំដៅឈានទៅលុបបំបាត់ទីផ្សារគ្រឿងញៀន។

សម្ដេច នាយករដ្ឋមន្ត្រី ក៏បានជំរុញឱ្យអនុវត្តវិធានការច្បាប់ និងវិធានការរដ្ឋបាលឱ្យបានម៉ឺងម៉ាត់ និងដូចភ្លៀងរលឹម សំដៅស្រាវជ្រាវវែករកឱ្យឃើញបណ្តាញអង្គការចាត់តាំងនៃក្រុមឧក្រិដ្ឋជនគ្រឿងញៀន ឧបាយកល សកម្មភាពទំនាក់ទំនង ការដឹកជញ្ជូន កែច្នៃ ផលិត ជួញដូរគ្រឿងញៀន រួមទាំងទីតាំងប្រមូលផ្តុំការប្រើប្រាស់គ្រឿងញៀន ដើម្បីបើកប្រតិបត្តិការបង្ក្រាបឱ្យដល់ឫសគល់ប្រកបដោយប្រសិទ្ធភាព៕