អាជ្ញាធរខេត្តសៀមរាប ចុះបង្ក្រាបបទល្មើសនេសាទទ្រង់ទ្រាយធំក្នុងតំបន់មាត់បឹងទន្លេសាប

អាជ្ញាធរខេត្តសៀមរាប នៅព្រឹកថ្ងៃទី២២ខែមករា ឆ្នាំ២០២៤នេះ បានដឹកនាំមន្ត្រីជំនាញពាក់ព័ន្ធ ចុះប្រតិបត្តិការបង្ក្រាបបទល្មើសនេសាទទ្រង់ទ្រាយធំនៅតំបន់បឹងទន្លេសាប ក្នុងស្រុកចំនួន២ គឺស្រុកប្រាសាទបាគង និងក្រុងសៀមរាប។

នាយផ្នែករដ្ឋបាលជលផលចុងឃ្នៀស  លោកពត វណ្ណដេត បានឲ្យ«កម្ពុជាថ្មី»ដឹងថា  ប្រតិបត្តិការនេះ មន្ត្រីពាក់ព័ន្ធ ចុះទប់ស្កាត់ និងបង្ក្រាបបទល្មើសជលផលនិងសង្កេតការពីការធ្វើនេសាទដោយឧបករណ៍នេសាទគ្រួសារចាប់ពីសង្កាត់ចុងឃ្នៀស ក្រុងសៀមរាប ដល់ឃុំកំពង់ភ្លុក ស្រុកប្រាសាទបាគង ខេត្តសៀមរាប ដោយប្រើប្រាស់កម្លាំងសរុបចំនួន៣៩នាក់ ស្រ្តី០១នាក់ កាណូតចំនួន០៣គ្រឿង។

លោក ពត វណ្ណដេត បន្តថា ក្រុមការងារចម្រុះបានបំផ្លាញឧបករណ៍នេសាទល្មើសច្បាប់ចោលនៅនឹងកន្លែងបានចំនួន០១ករណី(នេសាទដោយឧបករណ៍ បទល្មើសប្រវែងកំណត់ និងក្រឡាសាច់អួនក្រោម០,០៣ម៉ែត្រ)-ក្បាលបចំនួន០៨គ្រឿង -របាំងសាច់អួនប្រវែង១.៦០០ម៉ែត្រ-ចម្រឹងចំនួន៤០០ដើម និងព្រលែងត្រីចម្រុះចំនួន២០គីឡូក្រាម។

លោកបញ្ជាក់ថា មន្ត្រីជំនាញរដ្ឋបាលជលផលខេត្តសៀមរាប នៅតែបន្តចុះប្រតិបត្តិការបង្ក្រាបបទល្មើសនេសាទនៅតំបន់បឹងទន្លេសាប ដូចភ្លៀងរលឹម ដើម្បីធ្វើយ៉ាងណាឲ្យធនធានធម្មជាតិកើនឡើងអាចដោះស្រាយនូវតម្រូវការហូបចុករបស់ពលរដ្ឋបានគ្រប់គ្រាន់៕

អត្ថបទដោយ៖ជុន កុសល