ព័ត៌មានជាតិ

នាយករដ្ឋមន្ត្រី ហាមផ្សាយគាស់ស្រាបៀរផឹក ក្នុងកម្មវិធីផ្សាយផ្ទាល់ទូរទស្សន៍

បានផុស

៨ ខែ មុន

នៅ

ថ្ងៃអង្គារ ២៣ មករា ២០២៤

ដោយ

ខណៈបញ្ហាគ្រោះថ្នាក់ចរាចរណ៍ ដែលបណ្ដាលមកពីការស្រវឹងកើនឡើង ស្របទៅនឹងមានការផ្សព្វផ្សាយស្រាបៀរតាមប្រព័ន្ធផ្សព្វផ្សាយផងនោះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសឱ្យ រដ្ឋមន្ត្រីក្រសួងព័ត៌មានគ្រប់គ្រង និងហាមការផ្សព្វផ្សាយនូវសកម្មភាព ពិធីករ ពិធីការិនី និងមហាជន ពិសេសយុវជន ឡើងឆាកកម្មវិធី គាស់ស្រាបៀរផឹក ក្នុងពេលកំពុងផ្សាយផ្សាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសនេះ ធ្វើឡើងក្នុងឱកាស សម្ដេច អញ្ជើញជាអធិបតីក្នុងពិធី បិទសន្និបាតបូកសរុបការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងព័ត៌មាន នារសៀលថ្ងៃទី២៣ ខែមករា ឆ្នាំ២០២៤ នេះ។

សម្ដេចធិបតី ហ៊ុន ម៉ាណែត មានប្រសាសន៍ថា បានផ្ដាំទៅ នាយឧត្តមសេនីយ៍ ស ថេត អគ្គស្នងការនគរបាលជាតិ ឱ្យពិនិត្យ និងពង្រឹងច្បាប់ចរាចរណ៍ និងត្រួតពិនិត្យជាតិអាល់កុលឡើងវិញ ព្រោះគ្រោះថ្នាក់នេះ ជាសោកនាដកម្មខ្លាំង ខណៈបច្ចុប្បន្ន គ្រោះថ្នាក់ដោយចរាចរណ៍ ច្រើនជាង គ្រោះថ្នាក់ដោយសារគ្រាប់បែក គ្រាប់មីន។ ជាមួយគ្នានេះ សម្ដេច បាន ក្រើនរំលឹកទៅ លោក នេត្រ ភក្ត្រា រដ្ឋមន្ត្រីក្រសួងព័ត៌មាន ឱ្យទប់ស្កាត់ការផ្សាយសកម្មភាពឡើងគាស់ស្រាបៀរផឹក ក្នុងកម្មវិធីផ្សាយផ្ទាល់ទូរទស្សន៍។

សម្ដេចធិបតី ហ៊ុន ម៉ាណែត មានប្រសាសន៍ថា៖ “ថ្ងៃមុន ខ្ញុំបញ្ជាពីក្រៅ [ប្រទេស] មកភ្លាមមក ឯកឧត្ដម នេត ភក្ត្រា។ រឿងផ្សាយពាណិជ្ជកម្ម ដែលត្រូវមានព្រំដែន។ ឃើញគេផ្ញើមក រូបភាព យុវជនឡើងលើវេទិកា ហើយគាស់ស្រាបៀរផឹក ដែលផ្សាយតាមទូរទស្សន៍។ អត់ទេ ឈប់ភ្លាម! ដេញឱ្យ ឯកឧត្ដម នេត្រ ភក្ត្រា ឱ្យទូរទស្សន៍ បិទដកភ្លាម ឈប់ឱ្យមានទៀត”។

សម្ដេចធិបតី ហ៊ុន ម៉ាណែត បានរំលឹកថា ថ្ងៃមុន សម្ដេចបានប្រជុំជាមួយ ស្ថានីយទូរទស្សន៍ ក្នុងនោះក៏មានការហាម និងដាក់សាររំលឹកចំពោះការផ្សព្វផ្សាយប៉ះពាល់ផ្សេងៗ។

សម្ដេចធិបតី មានប្រសាសន៍ថា៖ “ឥឡូវហាម! ការផ្សាយតាមប៉ាណូរឿងមួយ ប៉ុន្តែត្រូវដាក់ពាក្យស្លោកអប់រំ ដូចជា “ស្រវឹងកុំបើកបរ” ជាដើម។ ប៉ុន្តែ កម្មវិធីវ៉ៃបុក ហើយហៅមនុស្សឱ្យឡើងទៅគាស់ផឹក គឺអត់ទេ! សូមឱ្យគ្រប់ស្ថានីយ៍ទូរទស្សន៍ទាំងអស់ គឺឈប់ធ្វើបែបហ្នឹង។ ពិធិរិនីឡើងទៅគាស់អី… គឺមិនបាច់ទេ នៅលើ Live TV (កម្មវិធីទូរទស្សន៍ផ្សាយផ្ទាល់)…”។

សម្ដេចធិបតី បានបញ្ជាក់ថា យើងត្រូវពិនិត្យមើលថា សកម្មភាពអីដែលលើសព្រំដែន ជាពិសេសការផ្សព្វផ្សាយតាមទូរទស្សន៍ដែលមានុស្សរាប់ម៉ឺន លាននាក់បានទស្សនា។ ថ្ងៃមុនបានប្រជុំជាមួយស្ថានីយ៍ទូរទស្សន៍ ក៏បានឯកភាពគ្នាប៉ុន្មានចំណុចដែរ ព្រោះប្រព័ន្ធផ្សព្វផ្សាយ ត្រូវពិនិត្យនូវ ខ្លឹមសារ រូបភាពដែលត្រូវផ្សាយ៕