ព័ត៌មានជាតិ
ចាប់ផ្ដើមប្រឡងជ្រើសរើសគ្រូអប់រំកាយ និងកីឡា ខណៈវិញ្ញាសាត្រូវបានតាក់តែងមុនតែប៉ុន្មានម៉ោងប៉ុណ្ណោះ
នៅរសៀលថ្ងៃទី ២៨ ខែមករា ឆ្នាំ ២០២៤នេះ បេក្ខជនជិត ២ពាន់នាក់ បានចាប់ផ្ដើមប្រឡងវិញ្ញាសាសរសេរ សម្រាប់ការប្រឡងប្រជែងជ្រើសរើសគ្រូបង្រៀន ឯកទេសអប់រំកាយ និងកីឡា ជំនាន់ទី ៣១ នៅមណ្ឌលប្រឡង សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។
ក្នុងចំណោមបេក្ខជនជិត ២ពាន់នាក់នេះ នឹងត្រូវជ្រើសរើសតែចំនួន ១០០នាក់ប៉ុណ្ណោះ ដែលនឹងត្រូវបែងចែកទៅសាលារៀនកម្រិតអនុវិទ្យាល័យ និងវិទ្យាល័យចំនួន ២១ខេត្ត។ ចំពោះបេក្ខជនសម្រាប់ការប្រឡងជ្រើសរើសគ្រូអប់រំកាយ និងកីឡានេះ មាន ២កម្រិត គឺកម្រិតមូលដ្ឋាន ១២+២ ចំនួន ១,៤៤៥នាក់ ស្រី ៤៥០នាក់ និងកម្រិតថ្នាក់បរិញ្ញាបត្រ ១២+៤ ចំនួន ៤៤៧នាក់ ស្រីចំនួន ១៣៥នាក់ ដែលសរុបទាំងពីរមានបេក្ខជនសរុបចំនួន ១,៨៩២នាក់។
ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានគូសបញ្ជាក់ថា ការប្រឡងវិញ្ញាសាសរសេរនេះ ត្រូវបែងចែងចំនួន ៣ រួមមាន៖ ១.វិញ្ញាសាវប្បធម៌ទូទៅ ២.វិញ្ញាសាជីវវិទ្យា និង ៣.វិញ្ញាសាភាសាអង់គ្លេស។ វិញ្ញាសាទាំង ៣នេះ គឺត្រូវបានតាក់តែងឡើងមុនការប្រឡងប្រជែង តែប៉ុន្មានម៉ោងប៉ុណ្ណោះ ពោលគឺនៅព្រឹកថ្ងៃទី ២៨ ខែមករានេះតែម្ដង។
ឯកឧត្តម មានប្រសាសន៍ថា «លោកគ្រូ-អ្នកគ្រូ មកពីបណ្ដា ៥វិទ្យាល័យ នៅក្នុងរាជធានីភ្នំពេញ បានមកជួបជុំគ្នានៅព្រឹកមិញ ហើយតាក់តែងវិញ្ញាសាចំណេះដឹងទូទៅ ដោយយើងត្រូវរើស ១០សំណួរ ហើយក្នុងនោះ គឺលោកគ្រូ-អ្នកគ្រូ បានតាក់តែងទៅដល់ ៣០សំណួរ ហើយខ្ញុំមានភារកិច្ចទទួលជ្រើសរើសចំនួន ១០ នៅក្នុងចំណោម ៣០សំណួរនេះ»។
ចំពោះវិញ្ញាសាជីវវិទ្យា ក៏ដូចគ្នាដែរ ត្រូវតាក់តែងចំនួន ៣០សំណួរ ហើយជ្រើសរើសតែចំនួន ១០ប៉ុណ្ណោះ។ រីឯវិញ្ញាសាភាសាអង់គ្លេស ត្រូវតាក់តែងឡើងជាទម្រង់ QCM ដោយមាន ៤០សំណួរ ដែលលោកគ្រូ-អ្នកគ្រូ ត្រូវតាក់តែងចំនួន ៤០សំណួរ ជាជម្រើសពីរ។ ក្នុងនោះដែរ ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ត្រូវជ្រើសរើសយកសំណួរ ៤០ ក្នុងជម្រើសពីរនោះ។
ឯកឧត្ដម ប្រធានគណៈកម្មការប្រឡងប្រជែង បានបញ្ជាក់ទៀតថា «អ្វីដែលជាការចង់បញ្ជាក់នេះ គឺថា កន្លងមានការគិតគូរ ហើយនិងតាមដាន ហើយមានការព្រួយបារម្ភថា ក្រែងលោមានការបែកវិញ្ញាសាមុន តែមិនខុសពីអ្វីដែលយើងអនុវត្តពេលការជ្រើសរើសមន្ត្រីកសិកម្ម ២៥០នាក់ទេ គឺនៅថ្ងៃប្រឡងពេលព្រឹក គឺតាក់តែងវិញ្ញាសាឲ្យបានចំនួនសំណួរលើស ជ្រើសរើសដោយខ្ញុំចំនួនដែលត្រូវការឲ្យប្អូនៗ សម្រាប់ការប្រឡង ហើយក្រៅពីហ្នឹងថែមទៀត គឺយើងហ្វូតូកូបពីហើយដល់ម៉ោងហើយ គឺពួកគាត់ចាប់ផ្ដើមប្រឡងតែម្ដង»។
សូមជម្រាបថា ការប្រឡងប្រជែងជ្រើសរើសគ្រូបង្រៀនឯកទេសអប់រំកាយ និងកីឡា ក្របខណ្ឌឆ្នាំ ២០២៣ ឲ្យចូលបម្រើការងារក្នុងក្របខណ្ឌក្រសួងអប់រំ យុវជន និងកីឡា នឹងប្រព្រឹត្តទៅដោយបែងចែកជា ២ ប្រភេទវិញ្ញាសាគឺ៖ (១) ប្រភេទវិញ្ញាសាសរសេរ ដែលនឹងប្រព្រឹត្តទៅនៅថ្ងៃទី ២៨ ខែមករា ឆ្នាំ ២០២៤ នៅមណ្ឌលប្រឡង សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និង(២) ប្រភេទវិញ្ញាសាអនុវត្តកីឡា ដែលនឹងប្រព្រឹត្តទៅចាប់ពីថ្ងៃទី ២៩ ខែមករា ឆ្នាំ ២០២៤ និងថ្ងៃបន្តបន្ទាប់ នៅមណ្ឌលប្រឡងវិទ្យាស្ថានអប់រំកាយ និងកីឡា។
ឯកឧត្តម ហ៊ុន ម៉ានី ធ្លាប់បានបញ្ជាក់កាលពីថ្ងៃទី ២៦ ខែមករាថ្មីៗនេះថា ក្រសួងមុខងារសាធារណៈ មានទំនួលខុសត្រូវខ្ពស់ ក្នុងការរៀបចំយន្តការ និងនិយាមជ្រើសរើសមន្ត្រីរាជការស៊ីវិល ដោយត្រូវឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព ហើយបំពេញភារកិច្ចប្រកបដោយប្រសិទ្ធភាពខ្ពស់ ឆ្លើយតបជាមួយទំនុកចិត្តដែលផ្តល់ជូនដោយរាជរដ្ឋាភិបាល ដែលមានឆន្ទៈខ្ពស់ ក្នុងការកែទម្រង់រដ្ឋបាលសាធារណៈ និងការបង្កើតបរិយាកាស ឬឱកាសស្មើៗគ្នា ក្នុងការចូលរួមប្រឡងប្រជែង។
ឯកឧត្តម ហ៊ុន ម៉ានី បានគូសបញ្ជាក់ថា «ក្នុងន័យនេះ វប្បធម៌ និងផ្នត់គំនិតអន្តរាគមន៍ជុំវិញការជ្រើសរើសមន្ត្រីរាជការស៊ីវិល នឹងត្រូវផ្លាស់ប្តូរដោយផ្នត់គំនិតប្រកួតប្រជែងតាមរយៈសមត្ថភាព និងការទទួលខុសត្រូវរបស់បេក្ខជន»៕
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៣ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៥ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៦ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៤ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ