អនុរដ្ឋលេខាធិការក្រសួងការបរទេស១រូប ត្រូវបានផ្ទេរមកជារដ្ឋលេខាធិការទីស្ដីការគណៈរដ្ឋមន្ត្រី

អនុរដ្ឋលេខាធិការក្រសួងការបរទេស លោក អាន សុខខឿន ត្រូវបានព្រះមហាក្សត្រនៃកម្ពុជា ផ្ទេរ និងតែងតាំងមុខតំណែងឱ្យមកកាន់ការជារដ្ឋលេខាធិការទីស្ដីការគណៈរដ្ឋមន្ត្រី នេះបើតាមព្រះរាជក្រឹត្យចុះថ្ងៃទី៣០ ខែមករា ឆ្នាំ២០២៤។

លោក អាន សុខខឿន ទទួលបានតែងតាំងជាអនុរដ្ឋលេខាក្រសួងការបរទេស និងកិច្ចសហប្រតិបត្តការអន្តរជាតិ កាលពីថ្ងៃទី១៣ ខែធ្នូ ឆ្នាំ២០២២។ មុននឹងទទួលបានតំណែងនេះ លោកក៏ធ្លាប់បំពេញការងារជាឯកអគ្គរាជទូត និងតំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ នាទីក្រុងហ្សឺណែវ។

ក្រៅពីតួនាទីជាអនុរដ្ឋលេខាធិការក្រសួងការបរទេស លោក អាន សុខខឿន ក្នុងនីតិកាលទី៧ នៃរដ្ឋសភានេះ លោកក៏មានតួនាទីជាអ្នកនាំពាក្យឱ្យក្រសួងការបរទេសផងដែរ។

សម្រាប់ប្រវត្តិការសិក្សារ លោក អាន សុខខឿន បានបញ្ចប់ការសិក្សាថ្នាក់បរិញ្ញាប័ត្រអប់រំភាសាអង់គ្លេស ពីវិទ្យាស្ថានភាសាបរទេស សាកលវិទ្យាល័យភូមិន្ទភ្នំពេញនៅក្នុងឆ្នាំ២០០៤ និងបានបញ្ចប់ការសិក្សាថ្នាក់បរិញ្ញាប័ត្រជាន់ខ្ពស់ផ្នែកទំនាក់ទំនងអន្តរជាតិនៅ Maxwell School of Citizenship and Public Affair នៃ Syracuse University ក្នុងសហរដ្ឋអាមេរិក៕

ដោយ៖ ង៉ិល ណារ៉ាត់