ចូលជីកមើមរមៀតលក់ប្រចាំថ្ងៃ ជាន់គ្រាប់មីនផ្ទុះរងរបួសជើងទាំងពីរធ្ងន់ធ្ងរ

បុរសម្នាក់ មានមុខរបរធ្វើចម្ការបានរងរបួសយ៉ាងធ្ងន់ធ្ងរ ព្រមទាំងបែកខ្ទេចប្រអប់ជើងទាំងសងខាង ខណៈដែលជនរងគ្រោះធ្វើដំណើរចូលទៅក្នុងចម្ការ​ ដើម្បីជីកមើមរមៀតលក់ប្រចាំថ្ងៃ។

សមត្ថកិច្ចបានបញ្ជាក់ថា នៅវេលាម៉ោង ៩ និង ៣០ នាទី ព្រឹកថ្ងៃទី ៤ ខែកុម្ភៈ ឆ្នាំ២០២៤ នេះមានករណីផ្ទុះគ្រាប់មីនមួយបានកើតឡើងនៅចំណុចទយ ក្នុងភូមិភ្នំរៃ ឃុំតាតោក ស្រុកសំឡូត ខេត្តបាត់ដំបង។

របាយការណ៍បានបន្តថា នៅមុនពេលកើតហេតុគឺមានប្រជាពលរដ្ឋម្នាក់ឈ្មោះ ស៊ីម សុភាព ភេទប្រុស អាយុ ៥៥ ឆ្នាំ រស់នៅត្រង់ចំណុចកើតហេតុខាងលើ ដោយជនរងគ្រោះបានធ្វើដំណើរចេញពីផ្ទះចូលទៅក្នុងចម្ការ ដើម្បីជីកមើមរមៀតលក់ដូចសព្វមួយដង។ ខណៈដែលជនរងគ្រោះកំពុងដើរក៏បានជាន់ទៅលើគ្រាប់មីនដែលនៅសេសសល់ពីសម័យសង្គ្រាម ក៏បានផ្ទុះឡើងបណ្ដាលឲ្យជើងទាំងសងខាង បែកខ្ទេច។

 ភ្លាមៗនោះដែរក្រោយពេលកើតហេតុគឺខាងកម្លាំងយោធាតាមខ្សែបន្ទាត់ព្រំដែនបានយករថយន្តជួយដឹកបញ្ជូនជនរងគ្រោះទៅកាន់មន្ទីរពេទ្យបង្អែកខេត្តបាត់ដំបង។ ដោយឡែកចំពោះគ្រាប់មីនគឺក្រុមប្រឹក្សាឃុំដែលនៅទីនោះបានបញ្ជាក់ថាគឺជាប្រភេទ មីន៦៩ សម្រាប់បង្កៃកម្លាំងថ្មើរជើង ៕

អត្ថបទ : សោ និយមរ័ត្ន