ព័ត៌មានជាតិ

រដ្ឋលេខាធិការក្រសួងផែនការ ផ្ដាំផ្ញើដល់ក្រុមការងារបន្តខិតខំ បម្រើពលរដ្ឋឲ្យបានល្អ ក្រោមម្លប់សន្តិភាព

បានផុស

៥ years មុន

នៅ

ថ្ងៃអង្គារ ១៦ កុម្ភៈ ២០២១

ដោយ

លោក ប៉ាន ប៊ុនធឿន រដ្ឋលេខាធិការក្រសួងផែនការ បានថ្លែងផ្ដាំផ្ញើ ដល់ក្រុមការងារគ្រប់មូលដ្ឋាន ត្រូវខិតខំបម្រើពលរដ្ឋក្រោមម្លប់សន្តិភាព សម្តេចតេជោ ដែលពោរពេញដោយការអភិវឌ្ឍន៍។

លោក ប៉ាន ប៊ុនធឿន រដ្ឋលេខាធិការថ្លែងបែបនេះ ពេលចូលរួមកិច្ចប្រជុំត្រួតពិនិត្យការអនុវត្តនីតិវិធីអត្តសញ្ញាណកម្មគ្រួសារក្រីក្រ តាមការស្នើសុំក្នុងអំឡុងពេលកូវីដ-១៩ នៅថ្នាក់ឃុំចំនួន៣នៅខេត្តកំពង់ឆ្នាំងកាលពីម្សិលមិញ។

លោកបានលើកទឹកចិត្តដល់ក្រុមការងារនិងអាជ្ញាធរមូលដ្ឋាន ក្រុមការងារចុះជួយតាមឃុំភូមិ ត្រូវទទួលខុសត្រូវឲ្យខ្ពស់ ក្នុងការចុះពិនិត្យលើប័ណ្ណសមធម៌របស់គ្រួសារ ដែលទទួលបានផល ដោយត្រូវគ្រប់គ្រងឲ្យច្បាស់លាស់ ចំពោះស្ថានភាពជាក់ស្តែង ពោលគឺថាគ្រួសារក្រីក្រពិតឬមិនពិត និងត្រួតពិនិត្យលើប័ណ្ណសមធម៌តាមលក្ខខ័ណ្ឌ ដែលត្រូវទទួលបានសាច់ប្រាក់ពីរាជរដ្ឋាភិបាលកម្ពុជារាប់លាននាក់ ដែលត្រូវទទួលបានប្រាក់ឧបត្ថម្ភនេះ សរុបទូទាំងប្រទេស។

លោករដ្ឋលេខាធិការ ក៏បានជំរុញដល់មន្ត្រីទាំងអស់ ត្រូវបន្តការងារមួយនេះឲ្យខ្ជាប់ខ្ជួន តាមទិសដៅ និងយុត្តិសាស្ត្ររបស់រាជរដ្ឋាភិបាលកម្ពុជា ដូចពាក្យស្លោក មួយពោលថា យើងមិនទុកនរណាម្នាក់ជួបការលំបាកដោយមិនបានដោះស្រាយ។ លោកស្នើសុំដល់ក្រុមការងារនិងអាជ្ញាធរ ត្រូវខិតខំបេ្តជ្ញាចិត្តបម្រើពលរដ្ឋក្រោមដំបូលសុខសន្តិភាពសម្តេចតេជោ ដែលពោរពេញដោយការអភិវឌ្ឍន៍ និងចេះចុះជួបគ្រួសារ ដែលទទួលបានសាច់ប្រាក់ពីរាជរដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា ត្រូវបន្តចុះអនុវត្តន៍អប់រំ ផ្សព្វផ្សាយនិងណែនាំដល់គ្រួសារ ដែលក្រីក្រជួបលំបាកពិតប្រាកដ ក្រោយពីទទួលបានសាច់ប្រាក់ឧបត្ថម្ភពីរាជរដ្ឋាភិបាល៕

អត្ថបទ៖ វិមាន