Connect with us

ព័ត៌មានជាតិ

ពាណិជ្ជកម្មកម្ពុជា ជាមួយប្រទេសធំៗបានកើនឡើងនៅដើមឆ្នាំ ២០២៤

បានផុស

នៅ

ទំហំពាណិជ្ជកម្ពុជា ជាមួយប្រទេសធំៗនៅលើពិភពលោក បានកើនឡើងគួរឱ្យកត់សម្គាល់ នៅដើមឆ្នាំ ២០២៤នេះ។ ផ្ទុយពីឆ្នាំ ២០២៣ កន្លងទៅ ដោយការដោះដូរពាណិជ្ជកម្មរវាងកម្ពុជា អន្តរជាតិ មានការថមថយ ក្រោយរងគ្រោះដោយជំងឺកូវីដ-១៩ និងវិបត្តិសេដ្ឋកិច្ចសកល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បានបង្ហាញថា នៅខែ មករា ដើមឆ្នាំ ២០២៤ ប្រទេសកម្ពុជា មានទំហំពាណិជ្ជកម្មកើនឡើងជាមួយប្រទេស ចិន វៀតណាម អាមេរិក ជប៉ុន កាណាដា សិង្ហបុរី អេស្ប៉ាញ និងហុងកុងជាដើម។

ប្រភពដដែលបានបញ្ជាក់ថា ពាណិជ្ជកម្មរវាងកម្ពុជា និងចិន មានទំហំធំជាងគេដោយសម្រេចបានប្រមាណ ១,១៥ពាន់លានដុល្លារ នៅក្នុងខែ មករា ឆ្នាំ ២០២៤ កើនឡើង ១៨,៧% បើធៀបនឹងរយៈពេលដូចគ្នាឆ្នាំ ២០២៣ មានចំនួនតែជាង ៩៧២លានដុល្លារ។ ក្នុងនោះ សម្រាប់ការនាំចេញរបស់កម្ពុជា ទៅទីផ្សារចិន មានចំនួនជាង ១២១លានដុល្លារ និងនាំចូលមកវិញមានចំនួនជាង ១,០៣ពាន់លានដុល្លារអាមេរិក។ បន្ទាប់មកប្រទេសវៀតណាម មានទំហំពាណិជ្ជកម្មជាមួយកម្ពុជាជាង ៦៧៧លានដុល្លារ កើនឡើងប្រមាណ ៤១,៥% បើធៀបនឹងរយៈពេលដូចគ្នាឆ្នាំ ២០២៣ មានចំនួនជាង ៤៧៨លានដុល្លារ។ ក្នុងនោះការនាំចេញរបស់កម្ពុជាទៅវៀតណាម គិតជាទឹកប្រាក់ចំនួនជាង ៣៧៣លានដុល្លារ និងនាំចូលមានចំនួនជាង ៣០៤លានដុល្លារ។

ចំណែកការដោះដូរទំនិញជាមួយអាមេរិក ជាប់ចំណាត់ថ្នាក់ទី៣ គឺមានចំនួនទឹកប្រាក់ប្រមាណជាង ៦៤៤លានដុល្លារ មានការកើនឡើងប្រមាណ ១០,៨%។ ក្នុងនោះការនាំចេញពីកម្ពុជាទៅទីផ្សារអាមេរិក មានចំនួនជាង ៦២៦លានដុល្លារ និងនាំចូលមកវិញមានចំនួនជាង ១៧លានដុល្លារ។

ដោយឡែកការធ្វើពាណិជ្ជកម្មរវាងកម្ពុជា និងជប៉ុន សម្រេចបានប្រមាណជិត ១៦០លានដុល្លារ នៅក្នុងខែមករាកន្លងទៅ ពោលគឺមានការកើនឡើងចំនួនជាង ៨,៩%។ ក្នុងនោះ ការនាំចេញពីកម្ពុជា ទៅជប៉ុន បានចំនួនជាង ១១៦លានដុល្លារ និងនាំចូលមកវិញមានចំនួនជាង ៤២លានដុល្លារអាមេរិក។

ក្រៅពីនេះ មានដូចជាប្រទេសកាណាដា មានទំហំពាណិជ្ជកម្មជាមួយកម្ពុជា ចំនួនជាង ៨៤លានដុល្លារ កើនឡើងជិត ៥៥%, ប្រទេសសិង្ហបុរី មានពាណិជ្ជកម្មជាមួយកម្ពុជា ចំនួនជាង ៨៣លានដុល្លារ កើនឡើង ៥២% និងប្រទេសអេស្ប៉ាញមានពាណិជ្ជកម្មជាមួយកម្ពុជា ចំនួនជាង ៧១លានដុល្លារ កើនឡើង ៥១,១% ។

របាយការណ៍គយ បានបង្ហាញទៀតថា ពេញមួយខែមករា ឆ្នាំ ២០២៤នេះ ទំហំពាណិជ្ជកម្មកម្ពុជា អន្តរជាតិ សម្រេចបានទឹកប្រាក់សរុបចំនួនជាង ៤ពាន់លានដុល្លារ កើនឡើងចំនួនជិត ១៧% បើធៀបនឹងរយៈពេលដូចគ្នាឆ្នាំ ២០២៣ មានចំនួនជាង ៣,៤៧ពាន់លានដុល្លារប៉ុណ្ណោះ។

ការកើនឡើងនៃទំហំពាណិជ្ជកម្មនៅដើមឆ្នាំ ២០២៤នេះ ស្របជាមួយនឹងការព្យាករណ៍អំពីកំណើនសេដ្ឋកិច្ចកម្ពុជា រំពឹងថា នឹងមានការកើនឡើងរង្វង់ ៦,៦% នៅឆ្នាំនេះ។ នេះបើយោងតាមច្បាប់ស្តីពីហិរញ្ញវត្ថុសម្រាប់គ្រប់គ្រងឆ្នាំ ២០២៤។

ជាមួយគ្នានេះ រាជរដ្ឋាភិបាល បានខិតខំដើរទាក់ទាញវិនិយោគិនពីក្រៅប្រទេស ដើម្បីឱ្យមកវិនិយោគនៅកម្ពុជា ជាបន្តបន្ទាប់។ ជាក់ស្តែងសម្តេច ហ៊ុន ម៉ាណែត បានដើរទាក់ម៉ូយជាច្រើនប្រទេសដែលសម្តេចបានទៅដល់ នៅក្នុងអាណត្តិដែលសម្តេចជានាយករដ្ឋមន្រ្តី មានដូចជា ទៅកាន់អាមេរិក ជប៉ុន វៀតណាម ចិន និងថៃជាដើម។ រាល់ការចេញទៅក្រៅប្រទេស សម្តេចតែងតែអនុញ្ញាតឱ្យប្រធានក្រុមហ៊ុនធំៗចូលជួបសម្តែងការគួរសមរម្យ និងបានបង្ហាញពីសក្តានុពលរបស់កម្ពុជា ទៅកាន់ក្រុមហ៊ុនទាំងនោះផងដែរ៕

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម