កម្ពុជា និងហុងគ្រី ប្រកាសបន្តគាំទ្រគ្នាទៅវិញទៅ មកនៅលើឆាកអន្តរជាតិ

កម្ពុជា និងហុងគ្រី ប្រកាសបន្តគាំទ្រគ្នាទៅវិញទៅមកនៅលើវេទិកាអន្តរជាតិ។ ការប្ដេជ្ញានេះ បានលើកឡើងនៅក្នុងជំនួបពិភាក្សាការងាររវាងលោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីការបរទេស និងលោក Tibor BALOGHDI ឯកអគ្គរដ្ឋទូតហុងគ្រីប្រចាំកម្ពុជា ដែលមាននិវេសនដ្ឋាននៅទីក្រុងហាណូយ កាលពីថ្ងៃទី១៣ ខែកុម្ភៈ ឆ្នាំ២០២៤។

លោកឧបនាយករដ្ឋមន្ត្រី សុខ ចិន្តាសោភា និងលោកឯកអគ្គរដ្ឋទូតហុងគ្រី បានបញ្ជាក់ពីការប្តេជ្ញាចិត្តរបស់ខ្លួនក្នុងការថែរក្សាទំនាក់ទំនងល្អដែលមានស្រាប់ និងបន្តគាំទ្រគ្នាទៅវិញទៅមកនៅលើវេទិកាអន្តរជាតិរវាងប្រទសទាំងពីរ កម្ពុជា និងហុងគ្រី។

លោកឧបនាយករដ្ឋមន្ត្រី និងលោកឯកអគ្គរដ្ឋទូត បានបង្ហាញនូវការពេញចិត្តចំពោះទំនាក់ទំនងទ្វេភាគី ដែលមានការរីកចម្រើនកាន់តែខ្លាំង ក្នុងរយៈពេលប៉ុន្មានឆ្នាំចុងក្រោយនេះ បើទោះបីជាមានការលេចឡើងនៃបញ្ហាប្រឈមក្នុងតំបន់និងសកលក៏ដោយ។ ភាគីទាំងពីរ បានគូសបញ្ជាក់ថា ភាពរីកចម្រើននៃទំនាក់ទំនងរវាងកម្ពុជា និងហុងគ្រី បានបង្ហាញតាមរយៈការផ្លាស់ប្ដូរទស្សនកិច្ចកម្រិតខ្ពស់ជាញឹកញាប់ ការប្រាស្រ័យទាក់ទងគ្នា តាមរយៈយន្តការទ្វេភាគី ជាអាទិ៍៖ គណៈកម្មការចម្រុះនៃកិច្ចសហប្រតិបត្តិការលើវិស័យសេដ្ឋកិច្ច កិច្ចពិគ្រោះយោបល់ទ្វេភាគី ក៏ដូចជាការគាំទ្រគ្នាទៅវិញទៅមកនៅលើឆាកអន្តរជាតិ។

ក្នុងឱកាសនេះ លោក សុខ ចិន្តាសោភា ប្រមុខការទូតកម្ពុជា ក៏បានសម្ដែងការអបអរសាទរដល់ហុងគ្រី ក្នុងការក្លាយជាប្រធានសហភាពអឺរ៉ុប សម្រាប់ឆមាសទី២ នៃឆ្នាំ២០២៤នេះ ហើយលោក បានថ្លែងអំណរគុណចំពោះការបន្តគាំទ្ររបស់ ហុងគ្រី សម្រាប់ការពង្រឹងកិច្ចសហប្រតិបត្តិការរវាងកម្ពុជា និងសហភាពអឺរ៉ុប នៅលើគ្រប់វិស័យផងដែរ៕