អភិបាលខេត្តត្បូងឃ្មុំព្រមានជាថ្មី ចំពោះមន្ត្រី ឬពលរដ្ឋដែលពាក់ព័ន្ធនឹងដីព្រៃលិចទឹករបស់រដ្ឋ ត្រូវប្រញាប់ដកខ្លួនចេញ

លោក ជាម ច័ន្ទសោភ័ណ អភិបាលខេត្តត្បូងឃ្មុំ បានធ្វើការព្រមានជាថ្មីម្តងទៀត ពាក់ព័ន្ធដីព្រៃលិចទឹករបស់រដ្ឋ ក្នុងភូមិសាស្ត្រស្រុកក្រូចឆ្មារ មិនថាពលរដ្ឋធម្មតា មន្ត្រីរាជការសុីវិល និងកងកម្លាំងមានសមត្ថកិច្ច ត្រូវដកខ្លួនចេញ បើរកឃើញមានពាក់ព័ន្ធ ត្រូវអស់បុណ្យស័ក្ត និងអាចជាប់ពន្ធនាគារថែមទៀត ដោយគ្មានការលើកលែងជាដាច់ខាត។

លោក ជាម ច័ន្ទសោភ័ណ នៅក្នុងឱកាសជួបសួរសុខទុក្ខ កម្លាំងប្រដាប់អាវុធចម្រុះ ដែលកំពុងឈរជើងប្រចាំការ ការ​ពារ​ទប់ស្កាត់ការឈូសឆាយទន្ទ្រានតំបន់ដីព្រៃលិចទឹ នៅទីតាំងតំបន់ក្របីក្រៀគ តំបន់ចម្ការចិន តំបន់ពស់អំបែង និងតំបន់ខ្នងក្រពើ ក្នុងភូមិសាស្ត្រស្រុកក្រូចឆ្មារ ខេត្តត្បូងឃ្មុំ។

លោកអភិបាលខេត្ត បានបន្តលើកឡើងថា ពាក់ព័ន្ធនឹងដីអភិរក្ស នៅតាមបណ្តាខេត្តជុំវិញបឹងទន្លេសាបនេះ រាជរដ្ឋាភិបាល ធ្លាប់បានកាត់ឆ្វៀលជូនប្រជាពលរដ្ឋរួចរាល់ហើយ សម្រាប់កន្លែងដែលអាស្រ័យផល ជាក់ស្តែង។

ទន្ទឹមនោះ រាជរដ្ឋាភិបាលក៏បានហាមដាច់ខាត មិនឱ្យមានការឈូសឆាយទន្ទ្រានដីព្រៃលិចទឹកបន្តទៀត នៅក្នុងតំបន់ទាំង​នោះឡើយ ព្រោះថា តំបន់ដីព្រៃលិចទឹកទាំងនេះ ជាជម្រកសម្រាប់ត្រីពងកូន និងសត្វស្លាបជាច្រើនប្រភេទរស់នៅ ហើយបើដីព្រៃលិចទឹកទាំងនេះ ត្រូវបាត់បង់ វាក៏នឹងប៉ះពាល់ដល់ជីវៈចម្រុះជាច្រើនប្រភេទក្នុងបឹងទន្លេសាបផងដែរ។

លោក ជាម ច័ន្ទសោភ័ណ ក៏បានជំរុញដល់កម្លាំងចម្រុះទាំងអស់ បន្តចុះល្បាតជាប្រចាំ នៅតាមគោលដៅនីមួយៗ ត្រូវធ្វើយ៉ាងណាខិតខំតាមដានរាល់សភាពការណ៍ នៃការលបលួចឈូសឆាយទន្រ្ទានដីព្រៃលិចទឹក ដែលជាសម្បត្តិរបស់រដ្ឋនេះ ២៤ម៉ោង លើ ២៤ម៉ោង តាមគោលដៅដែលខ្លួនទទួលខុសត្រូវ ហើយបើមានការប្រព្រឹត្តបទល្មើសជាក់ស្តែងត្រូវតែចាប់ខ្លួនភ្លាមៗ ដោយបន្តស្រាវជ្រាវវែកមុខរកជនពាក់ព័ន្ធ និងកសាងសំណុំរឿងបញ្ជូនទៅតុលាការ៕

អត្ថបទ៖ សាន វិឡែម