ព័ត៌មានជាតិ

រដ្ឋមន្ត្រីអប់រំ ៖ អប់រំយុវជនខ្មែរឱ្យក្លាយជា កូនល្អ សិស្សល្អ មិត្តល្អ និងពលរដ្ឋល្អ ផ្អែកលើចតុស្តម្ភ នៃការអប់រំ ០៤

បានផុស

២ years មុន

នៅ

ថ្ងៃអាទិត្យ ១០ មីនា ២០២៤

ដោយ

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអះអាងថា រាជរដ្ឋាភិបាល បាន និងកំពុង បន្តឆន្ទៈ និងការប្ដេជ្ញាចិត្តខ្ពស់ក្នុងការអប់រំយុវជនខ្មែរឱ្យក្លាយជាកូនល្អ សិស្សល្អ មិត្តល្អ និងជាពលរដ្ឋល្អ ដោយផ្អែកលើចតុស្តម្ភ នៃការអប់រំចំនួន ០៤។

ថ្លែងបើកវគ្គបណ្ដុះបណ្ដាលគ្រូបង្គោល នៃកម្មវិធី “មនសិការពលរដ្ឋល្អ” កាលពីថ្ងៃទី ៩ មីនា លោក ឧបនាយករដ្ឋមន្ត្រី បានបន្តថា ចតុស្តម្ភ នៃការអប់រំចំនួន ០៤ រួមមាន (១) អប់រំដើម្បីឱ្យមានចំណេះដឹង (២) អប់រំដើម្បីឱ្យមានចំណេះធ្វើ (៣) អប់រំដើម្បីឱ្យមានឥរិយាបថ និងក្រមសីលធម៌ល្អ (៤) អប់រំដើម្បីឱ្យចេះរស់នៅក្នុងសង្គមប្រកបដោយភាពសុខដុមរមនា។

លោកឧបនាយករដ្ឋមន្ត្រី បានបន្តទៀតថា ដើម្បីអប់រំសិស្ស និងយុវជន ឱ្យក្លាយជាពលរដ្ឋល្អ ក្រសួងអប់រំ ក៏ដូចជាស្ថាប័នពាក់ព័ន្ធដទៃទៀត មានទិសដៅលើកកម្ពស់ចំណេះដឹង បំណិន និងចរិយាធម៌ ការយល់ដឹងពីគុណតម្លៃ ភាពជាពលរដ្ឋល្អ ដែលឆ្លុះបញ្ចាំងពី ៣ ចំណុចធំៗ ទី១). យើងមកពីណា ៖ យល់ដឹងអំពីប្រវត្តិសាស្ត្រកម្ពុជាគ្រប់សម័យកាល ទី២) យើងនៅទីណា៖ ផ្តោតលើបំណិនសតវត្សទី ២១ និងការលើកកម្ពស់ភាពជាអ្នកដឹកនាំ ដើម្បីឱ្យយុវជនមានសមត្ថភាព ចូលរួមដោះស្រាយបញ្ហារួមរបស់ប្រទេសជាតិ មានភាពក្លាហាន ឈ្លាសវៃក្នុងការបញ្ចេញមតិ ត្រិះរិះពិចារណា សិក្សាស្រាវជ្រាវ ចែករំលែកគំនិត និងជំនាញក្នុងការនិយាយសាធារណៈប្រកបដោយក្រមសីលធម៌ និងចំណេះដឹងពិតប្រាកដ ដើម្បីបង្កើតសង្គមពុទ្ធិ និង ទី៣) យើងចង់ទៅណា ៖ គឺជាការបណ្តុះចំណេះដឹង វិជ្ជាសម្បទា បំណិនសម្បទា ស្គាល់ខ្លួនឯង និង អភិវឌ្ឍន៍ខ្លួនឯង ប្រែខ្លួនជាអ្នកធ្វើស្វ័យសិក្សា រៀនសូត្រពេញមួយជីវិត។

ចំណែកពលរដ្ឋល្អដែលជាមូលធនមនុស្សរបស់ប្រទេសជាតិ ត្រូវមានលក្ខណៈសម្បត្តិដូចខាងក្រោម ៖ (១). មានមនសិការស្នេហាជាតិ៖ ត្រូវចេះគោរពច្បាប់ និងមានភាពស្មោះត្រង់ និងទំនួលខុសត្រូវចំពោះប្រទេសជាតិ ប្រជាជន និងរាជរដ្ឋាភិបាល គ្រប់កាលៈទេសៈទាំងអស់ (២). តបស្នងចំពោះសង្គមជាតិ៖ ត្រូវចេះចែករំលែក និងសកម្មចូលរួមក្នុងការងារសង្គម ដូចជា ការងារសហគមន៍ ការងារស្ម័គ្រចិត្ត ការងារមនុស្សធម៌ ដែលជាប្រយោជន៍របស់សង្គមជាតិ (៣). ចេះគោរពគ្នាទៅវិញទៅមក៖ ត្រូវមានឥរិយាបថ និងសីលធម៌ល្អ ថ្លៃថ្នូរ ចេះគោរពអ្នកដទៃ ដោយមិនប្រកាន់ពូជសាសន៍ ពណ៌សម្បុរ វប្បធម៌ សាសនា (៤). បំពេញកាតព្វកិច្ចជាពលរដ្ឋ៖ ត្រូវចូលរួមបោះឆ្នោត និងយល់ដឹងពីសិទ្ធិ និងការទទួលខុសត្រូវរបស់ខ្លួនក្នុងនាមជាពលរដ្ឋ៕

អត្ថបទ ៖ សំអឿន