ព័ត៌មានជាតិ

ក្រសួងអប់រំ គ្រោងសង់អគារសិក្សាបន្ថែមនៅតំបន់ជាយក្រុងភ្នំពេញ ដើម្បីឆ្លើយតបកំណើនរបស់សិស្ស

បានផុស

២ years មុន

នៅ

ថ្ងៃសៅរ៍ ១៦ មីនា ២០២៤

ដោយ

ក្រសួងអប់រំ យុវជន និងកីឡា គ្រោងនឹងសាងសង់អគារសិក្សាបន្ថែមនៅតំបន់ជាយរាជធានីភ្នំពេញ ដើម្បីឆ្លើយតបទៅនឹងកំណើនរបស់សិស្សដែលមានការកើនឡើងជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានមានប្រសាសន៍កាលពីរសៀលថ្ងៃទី ១៥ ខែមីនា នេះថា គម្រោងសាងសង់អគារសិក្សាបន្ថែមនៅតំបន់ជាយរាជធានីភ្នំពេញនេះ ក្រសួង កំពុងសិក្សាពីតម្រូវការនៅឡើយទេ នៅមិនទាន់ដឹងថា តើអគារសិក្សាកម្រិតណាដែលត្រូវសាងសង់បន្ថែម។

យ៉ាងណាក៏ដោយ នៅក្នុងកិច្ចប្រជុំ ស្ដីពីការពិនិត្យការសាងសង់អគារសិក្សានៅតំបន់ជាយក្រុងភ្នំពេញ កាលពីថ្ងៃទី ១២ ខែមីនា ឆ្នាំ ២០២៤ នៅទីស្ដីការក្រសួង លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានណែនាំឱ្យពិនិត្យ និងរៀបចំឡើងវិញ នូវផែនការសកម្មភាពអាទិភាព ការងារសាងសង់ និង និយាមគ្រូបង្រៀន ការរៀបចំឱ្យមានប្រព័ន្ធប្រមូលទិន្នន័យ ចំនួនគ្រូបង្រៀន ចំនួនសិស្ស ចំនួនបន្ទប់ និង ថ្នាក់រៀន នៅតាមសាលារៀន។

លោកបណ្ឌិតសភាចារ្យ ឧបនាយករដ្ឋមន្ត្រី បានផ្ដល់អនុសាសន៍មួយចំនួន ដើម្បីបង្កើនប្រសិទ្ធភាព និងប្រសិទ្ធផលការងារ ដូចជា ៖ ត្រូវដោះស្រាយបញ្ហាប្រឈមជាកញ្ចប់ ដោយបង្កើតជាប្រព័ន្ធតាមដានច្បាស់លាល់ ចុះពិនិត្យផ្ទាល់ដើម្បីប្រមូលទិន្នន័យ និងវាយតម្លៃ ផ្អែកលើភាពជាក់ស្ដែង, ពិនិត្យមើលឡើងវិញនូវការងារគ្រប់គ្រងបុគ្គលិក និងគ្រូបង្រៀន, នាយដ្ឋានផែនការត្រូវបន្តចុះពិនិត្យផ្ទាល់តាមសាលា ដើម្បីប្រមូលទិន្នន័យចំនួនសិស្ស បន្ទប់រៀន ថ្នាក់រៀន និង ចំនួនសិស្សក្នុងមួយថ្នាក់ ដើម្បីធានាបាននូវគុណភាពក្នុងការរៀន និងបង្រៀន រួចរៀបចំប្រជុំដាក់ផែនការ និងត្រូវប្រជុំជាប្រចាំ ដើម្បីតាមដានវឌ្ឍនភាព និងកំណត់ការងារអាទិភាព៕

អត្ថបទ ៖ សំអឿន