តុលាការខេត្តសៀមរាប សម្រេចឃុំខ្លួនមនុស្សជំនិតរបស់ជនជាប់ចោទ ឡេង ចាន់ណា ពីរនាក់បន្ថែមទៀត

ចៅក្រមស៊ើបសួរនៃសាលាដំបូង ខេត្តសៀមរាប កាលពីថ្ងៃទី២០ ខែមីនា ឆ្នាំ២០២៤ បានចេញដីកាបង្គាប់ឱ្យនាំខ្លួនជនត្រូវចោទចំនួន ២រូប បន្ថែមទៀត ដែលជាមនុស្សជំនិតរបស់ជនជាប់ចោទ ឡេង ចាន់ណា។

ជនត្រូវចោទ ទី១.ឈ្មោះ អ៊ឹម ស្រីវុទ្ធ ភេទស្រី អាយុ ៣៥ឆ្នាំ និងទី២.ឈ្មោះ សយ កុសល ភេទប្រុស អាយុ ៣៤ឆ្នាំ បានមកបង្ហាញខ្លួននៅចំពោះមុខចៅក្រមស៊ើបសួរ ដើម្បីសួរចម្លើយពីបទ “ឆបោកមានស្ថានទម្ងន់ទោស (ជាក្រុមមានការចាត់តាំង)” តាមបញ្ញត្តិមាត្រា ៣៧៧ និងមាត្រា ៣៨០ ចំណុច៥ នៃក្រមព្រហ្មទណ្ឌ និងបទ “សម្អាតប្រាក់” តាមបញ្ញត្តិមាត្រា ៣៨ នៃច្បាប់ ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

បន្ទាប់ពីបានសួរចម្លើយជនត្រូវចោទ ពិនិត្យភស្តុតាងក្នុងសំណុំរឿង ព្រមទាំងពិចារណាអង្គហេតុ និងអង្គច្បាប់គ្រប់ជ្រុងជ្រោយ ចៅក្រមស៊ើបសួរបានសម្រេចឃុំខ្លួនជនត្រូវចោទទាំង ២រូប ខាងលើជាបណ្តោះអាសន្ន និងបានបញ្ជូនទៅពន្ធនាគារខេត្តសៀមរាប ដើម្បីបន្តការស៊ើបសួរតាមនីតិវិធីច្បាប់។ អ្នកនាំពាក្យសាលាដំបូងខេត្តសៀមរាប បានបញ្ជាក់ថា សាលាដំបូងខេត្តសៀមរាបនឹងបន្តចាត់ការសំណុំរឿងនេះឱ្យបានត្រឹមត្រូវតាមនីតិវិធីច្បាប់ជាធរមាន ហើយសាលាដំបូងខេត្តសៀមរាបនឹងជម្រាប ជូនព័ត៌មានជាបន្តបន្ទាប់ក្រោយទៀត នៅពេលមានចំណាត់ការថ្មី។

សូមរម្លឹកថា បន្ទាប់ពីទទួលពាក្យបណ្ដឹងរបស់ពលរដ្ឋរងគ្រោះដែលចាញ់បោកក្រុមហ៊ុន ប៊្រីលាន ស៊ីធី រួចមកតុលាការខេត្តសៀមរាប បានបើកការស៊ើបអង្កេត រហូតឃាត់ខ្លួនជនជាប់ចោទដែលជាមេខ្លោងចំនួន ៥នាក់ ដាក់ពន្ធនាគារជាបណ្ដោះអាសន្ន ដើម្បីបន្តចាត់ការសំណុំរឿងនេះឱ្យបានត្រឹមត្រូវតាមនីតិវិធីច្បាប់ជាធរមាន៕

អត្ថបទ៖ ជុន កុសល