រដ្ឋបាលខេត្តតាកែវ គ្រោងរៀបចំព្រឹត្តិការណ៍សង្ក្រាន្ដរយៈពេល៤ថ្ងៃ ក្នុងឱកាសបុណ្យចូលឆ្នាំថ្មីប្រពៃណីជាតិ

រដ្ឋបាលខេត្តតាកែវ គ្រោងនឹងរៀបចំព្រឹត្តិការណ៍សង្ក្រាន្តឆ្នាំថ្មីដែលមានរយៈពេល៤ថ្ងៃដើម្បីចូលរួមអបអរសាទរ ស្វាគមន៍ឆ្នាំថ្មីប្រពៃណីជាតិខ្មែរ ឆ្នាំរោង ឆស័ក ព.ស ២៥៦៨ គ.ស.២០២៤។

តាមរដ្ឋបាលខេត្ត ព្រឹត្តិការណ៍សង្ក្រាន្ដនេះ នឹងធ្វើឡើងចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ នៅសួនច្បារមុខមហោស្រពខេត្តតាកែវ ចាប់ពីម៉ោង១៤និង០០នាទីរសៀលតទៅ ចំណែកនៅតាមទីតាំងរមណីយដ្ឋាន ទីវត្តអារាមនានា ក្នុងខេត្តតាកែវ ក៏តម្រូវឲ្យរៀបចំព្រឹត្តិការណ៍សង្ក្រាន្ដនៅថ្ងៃជាមួយគ្នានេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្ដីប្រកាសរបស់រដ្ឋបាលខេត្តកាលពីថ្ងៃទី២៩ ខែមីនា ឆ្នាំ២០២៤ ព្រឹត្តិការណ៍សង្ក្រាន្តខេត្តតាកែវឆ្នាំថ្មីនេះ នឹងផ្តល់ឱកាសជូនដល់ប្រជាពលរដ្ឋ សាធារណជន ភ្ញៀវជាតិ-អន្តរជាតិ មកចូលរួមអបអរសាទរទទួលទេវតាឆ្នាំថ្មី ហើយក៏ជាឱកាសដ៏ល្អសម្រាប់ការជួបជុំក្រុមគ្រួសារផងដែរ។ ក្នុងព្រឹត្តិការណ៍សង្ក្រាន្តខេត្តតាកែវ រយៈពេល៤ថ្ងៃនេះ រដ្ឋបាលខេត្ត នឹងមានរៀបចំលេងល្បែងប្រជាប្រិយ និងការប្រគុំតន្ត្រីសម័យនាពេលរាត្រី និងលេងកម្សាន្តសប្បាយក្រោមម្លប់សុខសន្តិភាព។

រដ្ឋបាលខេត្ត ក៏សូមឲ្យប្រជាពលរដ្ឋ សាធារណជន ភ្ញៀវជាតិ-អន្តរជាតិ អញ្ជើញមកកម្សាន្តសប្បាយឱ្យបានច្រើនកុះករនៅខេត្តតាកែវ តាមទីតាំងរៀបចំសង្ក្រាន្ត ដើម្បីជាការចូលរួមចំណែកលើកកម្ពស់វប្បធម៌ប្រពៃណីជាតិខ្មែរ៕

អត្ថបទ៖ សុខុម