​អូស្ត្រាលីគាំទ្រការរៀបចំ សហគមន៍កសិកម្មបែបទំនើបនៅកម្ពុជា​

អូស្ត្រាលីគាំទ្រដល់ការរៀបចំសហគមន៍កសិកម្មបែបទំនើបនៅកម្ពុជា។ ការគាំទ្រធ្វើឡើង​ កិច្ចប្រជុំ​ពិគ្រោះយោបល់ថ្នាក់ឧត្តមមន្ត្រីកម្ពុជា-អូស្ត្រាលី លើកទី៤ ​ក្រោមការដឹកនាំដោយលោក ប្រាក់ ងួនហេង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាសហប្រធាន និងលោកស្រី Michelle Chan អគ្គលេខាធិការរងក្រសួងការបរទេស និងពាណិជ្ជកម្ម នៃប្រទេស​អូស្ត្រាលី ជាសហប្រធាន និងមានការចូលរួមពីថ្នាក់ដឹកនាំក្រសួងស្ថាប័ន នៃប្រទេសកម្ពុជា និងអូស្ត្រាលីនៅថ្ងៃទី​០៤ ខែមេសា ឆ្នាំ ២០២៤។

នៅក្នុងអង្គប្រជុំនេះ លោក ប្រាក់ ដាវីដ បានរាយការណ៍ពីវឌ្ឍនភាពនៃកិច្ចសហប្រតិបត្តិការ​រវាងប្រទេស​ទាំង​ពីរនាពេលកន្លងមក សម្រាប់វិស័យកសិកម្ម។ បន្ថែមពីនេះ លោក បានលើកឡើង​ពីកិច្ចសហការដែលភាគីអូស្រ្តាលីបានគាំទ្រដល់គម្រោង CAVAC ដំណាក់កាលទី១ ចាប់ពីឆ្នាំ​២០១០-២០១៥ និងដំណាក់កាលទី២ ចាប់ពីឆ្នាំ២០១៦-២០២២។

ចំណែក ភាគីអូស្ត្រាលីក៏បានគាំទ្រដល់ការអភិវឌ្ឍពូជស្រូវចំប៉ីសរ៧០។ សម្រាប់គម្រោង CAPRED ភាគីអូស្ត្រាលីនឹងគាំទ្រដល់ការរៀបចំសហគមន៍កសិកម្មបែបទំនើប និងការផ្តល់ចំណេះដឹង​ផ្នែកភា​សាអង់គ្លេសជូននិស្សិតនៃសកល​វិទ្យាល័យ​ក្រោមឱវាទក្រសួងកសិកម្ម រុក្ខាប្រមាញ់ និងនេសាទ​ទៀតផង។

លោក ក៏បានថ្លែងអំណរគុណដល់ភាគីអូស្ត្រាលី ដែលកន្លងមកបានផ្តល់អាហារូបករណ៍ជូនមន្ត្រីរាជការ ដើម្បីបន្តការសិក្សាថា្នក់អនុបណ្ឌិត និងថ្នាក់បណ្ឌិតលើការងារកសិកម្ម នៅប្រទេសអូស្ត្រាលី ព្រមទាំងបានលើកទឹកចិត្តឲ្យបន្ត និងពិនិត្យលទ្ធភាពបង្កើនឱកាសសិក្សាបន្ថែមទៀត។ ក្រសួង និងក្រុមការងាររបស់អូស្ត្រាលី​កំពុងពិភាក្សាគ្នាលើគម្រោងកិច្ចសហប្រតិបត្តិការបន្ថែមទៀត៕