សម្ដេចធិបតី៖ ដើម្បីដោះស្រាយបញ្ហាកំណែទម្រង់មុខងារសាធារណៈ ត្រូវការភាពក្លាហាន និងការប្ដេជ្ញារបស់មន្ដ្រី

ប្រមុខរាជរដ្ឋាភិបាលកម្ពុជា ថ្លែងថា រាល់ការសម្រេចចិត្តក្នុងការដោះស្រាយកិច្ចការកំណែទម្រង់មុខងារសាធារណៈ គឺត្រូវ ការភាពក្លាហាន និងការប្ដេជ្ញាចិត្តខ្ពស់ពីមន្ត្រីតែម្ដង។ សម្ដេចធិបតី ថ្លែងបែបនេះក្នុងពិធីបិទសន្និបាតប្រចាំឆ្នាំរបស់ក្រសួងមុខងារសាធារណៈ នារសៀលថ្ងៃទី៤ ខែមេសា ឆ្នាំ២០២៤នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត ប្រមុខនៃរាជរដ្ឋាភិបាលកម្ពុជា បានថ្លែងថា ការចាប់ផ្ដើមនាពេលនេះពាក់ព័ន្ធនឹងការកំណែទម្រង់វិស័យមុខងារសាធារណៈ គឺមានកិច្ចការជាច្រើនត្រូវតែបន្តធ្វើ ដែលទាមទារនូវនាវានុវត្តន៍ ប្រកបដោយចក្ខុវិស័យច្បាស់លាស់។ សម្ដេចធិបតី ថ្លែងដូច្នេះថា៖ «ការងារច្រើន គឺថ្មីសម្រាប់យើង ប៉ុន្តែពាក្យថា ថ្មីនេះ មិនមែនអត់មានមូលដ្ឋាន ឬចក្ខុវិស័យច្បាស់លាស់នោះទេ។ កិច្ចការទាំងអស់ត្រូវទាមទារការនវានុវត្តន៍ បានន័យថា ការច្នៃប្រឌិត ដើម្បីដោះស្រាយបញ្ហា»។

សម្ដេចធិបតី បន្ថែមដដូច្នេះថា៖ «ហើយបែបនេះ ត្រូវការភាពក្លាហាន ហ៊ានសម្រេចចិត្ត ផ្ដើមចេញពីភាពក្លាហានរបស់មន្ត្រីក្នុងមុខងារសាធារណៈតែម្ដង ព្រោះជាអ្នកអនុវត្តផ្ទាល់ ដែលត្រូវប្រឈមជាមួយនឹងបញ្ហា»។ សម្ដេចធិបតីប្រមុខរាជរដ្ឋាភិបាល បានគូសបញ្ជាក់ថា នៅចំពោះមុខ មន្ត្រីមុខងារសាធារណៈ នឹងត្រូវចុះធ្វើការដោយផ្ទាល់ជាមួយគ្រប់ក្រសួង-ស្ថាប័នគ្រប់ជាន់ថ្នាក់ ទាំងនៅថ្នាក់ជាតិ និងថ្នាក់ក្រោមជាតិ។ ហេតុនេះ ត្រូវតែមានជំហរច្បាស់លាស់​ ក្លាហាន និងការប្ដេជ្ញាចិត្តខ្ពស់ ដើម្បីឯកភាពគ្នាក្នុងការចូលរួមការអនុវត្តកំណែទម្រង់។

តែយ៉ាងណា សម្ដេចធិបតី បានវាយតម្លៃខ្ពស់ និងកោតសរសើរចំពោះភាពក្លាហាន និងភាពម៉ឺងម៉ាត់របស់មន្ត្រីមុខងារ សាធារណៈដែលចូលរួមក្នុងការរៀបចំផែនការកំណែទម្រង់របស់ក្រសួងមុខងារសាធារណៈ នាពេលកន្លងមកក្នុងរយៈពេលប្រមាណជាង ៧ខែ នៃអាណត្តិរាជរដ្ឋាភិបាល នីតិកាលទី៧នេះ៕