សម្ដេចធិបតី ថា រាល់ការវិនិយោគនៅកម្ពុជា ត្រូវតែផ្សារភ្ជាប់ទៅនឹងការផ្ទេរជំនាញដល់កូនខ្មែរ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាល់ការវិនិយោគទាំងអស់នៅកម្ពុជា ត្រូវតែផ្សារភ្ជាប់ទៅនឹងការផ្ទេរជំនាញដល់កូនខ្មែរ។

ក្នុងឱកាសអញ្ជើញជាអធិបតីក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ នៅស្រុកបាទី ខេត្តតាកែវ នៅថ្ងៃ ទី១១ ខែមេសា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងដូច្នេះថា «រាល់ការវិនិយោគ ការទាក់ទាញការវិនិយោគ ការបណ្ដុះបណ្ដាលផ្សេងៗ ត្រូវផ្សារភ្ជាប់គ្នាពីការផ្ទេរជំនាញនេះឯង»។

សម្ដេចធិបតី បានគូសរំលេចថា ជាក់ស្ដែង កសិដ្ឋានចិញ្ចឹមគោយកទឹកដោះគិរីសួគ៌ ដែលការបើកក្រុមហ៊ុនដំបូងឡើយ ត្រូវការអ្នកបច្ចេកទេសបរទេសមកពីខាងក្រៅជាច្រើន ប៉ុន្តែពេលនេះ កសិដ្ឋានចិញ្ចឹមគោយកទឹកដោះមួយនេះ សល់តែអ្នកបច្ចេកទេសតែពីររូបប៉ុណ្ណោះ ហើយក្រៅពីនេះ គឺជាកូនខ្មែរ។

សម្ដេចធិបតី ថា នេះហើយជាអ្វីដែលបានបង្ហាញអំពីនិមិត្តរូបនៃការការរីកចម្រើនរបស់កម្ពុជា ដោយសម្ដេច សង្កត់ធ្ងន់ថា សមត្ថភាពរបស់កម្ពុជាពេលនេះ មិនត្រឹមតែមានសមត្ថភាពកសាងនូវអ្វីដែលជាគម្រោងធំៗ កាន់តែធំ និងកាន់តែប្រសើរនោះទេ ប៉ុន្តែថែមទាំងកសាងដោយទឹកដៃកូនខ្មែរទៀតផងដែរ៕