រាជធានីភ្នំពេញ មានទីតាំងអនុញ្ញាតឱ្យលេងបាញ់ទឹកជះទឹក មិនរំខានដល់អ្នកដំណើរតាមដងផ្លូវ

ជុំវិញការអនុញ្ញាត ឬមិនអនុញ្ញាតក្នុងការលេងបាញ់ទឹកជះទឹកក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរនេះ លោក​ឃួង ស្រេង អភិបាល នៃគណៈអភិបាលរាជធានីភ្នំពេញបានបញ្ជាក់ថា៖ រដ្ឋបាលរាជធានីភ្នំពេញមានទីតាំងអនុញ្ញាតឱ្យលេង និងមិនអនុញ្ញាតឱ្យលេង ខណៈទីតាំងអនុញ្ញាតត្រូវបានដាក់ឡានទឹក ពាងទឹកឱ្យបាញ់ជះទឹកលេងគ្រប់គ្រាន់ផងដែរ ហើយទីតាំងនោះក៏មានដាក់ស្លាកសញ្ញាឱ្យ​លេងត្រឹមត្រូវ ជៀសវាង ជះទឹក បាញ់ទឹកទៅលើអ្នកដំណើរ ដែលគេមិនបានស្ម័គ្រចិត្តលេងជាមួយយើង។

ប៉ុន្តែទោះបីជាយ៉ាងណាក្តី លោក ឃួង ស្រេង សូមឱ្យបងប្អូនប្រជាពលរដ្ឋលេងសប្បាយរីករាយដោយមានក្រមសីលធម៌ខ្ពស់។

ការលើកឡើងរបស់លោក ឃួង ស្រេង បែបនេះបានធ្វើឡើងនាព្រឹកព្រលឹមថ្ងៃទី ១២ មេសាឆ្នាំ២០២៤នេះ ខណៈលោកអញ្ជើញជូនដំណើរ កម្មករ កម្មការិនី និងប្រជាពលរដ្ឋឡើងជិះរថយន្តក្រុងទៅស្រុកកំណើតតាមខេត្តក្រុងនានា ក្នុងឱកាស​​បុណ្យចូលឆ្នាំថ្មី ប្រពៃណីជាតិខ្មែរ នៅទីលានប្រជាធិបតេយ្យ ទល់មុខអតីតឃ្លាំងសាំង ខណ្ឌឬស្សីកែវ រាជធានីភ្នំពេញ។

លោក ឃួង ស្រេង បានមានប្រសាសន៍ថា៖ អនុវត្តតាមប្រសាសន៍ដឹកនាំដ៏ខ្ពង់ខ្ពស់បំផុតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្តី ព្រះរាជាណាចក្រកម្ពុជា រដ្ឋបាលរាជធានីភ្នំពេញបានរៀបចំរថយន្តក្រុងចំនួន ៤៥៥គ្រឿង សម្រាប់បម្រើសេវា ដឹកជញ្ជូនសាធារណៈ រយៈពេល ០៦ថ្ងៃ ចាប់ពីថ្ងៃទី១២ ដល់ថ្ងៃទី១៧ ខែមេសា ឆ្នាំ២០២៤ ដោយមិនបង់ប្រាក់ ដើម្បីជួយសម្រួលដល់ការចំណាយជូនបងប្អូនប្រជាពលរដ្ឋក្នុងការធ្វើដំណើរទៅលេងស្រុកកំណើត ជួប​ជុំ​បងប្អូន ក្រុមគ្រួសារ ក្នុងពិធីបុណ្យចូលឆ្នាំថ្មី ប្រពៃណីជាតិខ្មែរ ជាមួយនឹងការរៀបចំទឹកពិសាបរិសុទ្ធ និង
ភេសជ្ជៈ​ដោយ​ឥតគិតថ្លៃផងដែរ។

លោក ឃួង ស្រេង បានបន្តថា យើងមានទីតាំងរថយន្តក្រុងសម្រាប់ដឹកជញ្ជូនបងប្អូនកម្មករ កម្មការិនីនិងប្រជាពលរដ្ឋជាច្រើនកន្លែងនៅក្នុងរាជធានីភ្នំពេញ ប៉ុន្តែកន្លែងដែរធំជាងគេមាន២កន្លែង នោះគឺនៅទីតាំងទីលានប្រជាធិបតេយ្យ ខណ្ឌឬស្សី​កែវនិងនៅតំបន់ OCIC ខណ្ឌជ្រោយចង្វា។

ការដឹកជញ្ជូនបងប្អូនកម្មករ កម្មការិនីនិងប្រជាពលរដ្ឋជាទៅស្រុកកំណើតនេះ គឺជាការគិតគូររបស់សម្តេចមហាបវរធិបតី ហ៊ុន ម៉ាណែត ទទួលមរតពីសម្តេចតេជោ ហ៊ុន សែន អតីតនាយករដ្ឋមន្ត្រី ដើម្បីកាត់បន្ថយការចំណាយរបស់
ប្រជា​​​ពលរដ្ឋ ហើយគោលនយោបាយនេះបានទទួលការសាទរពីប្រជាពលរដ្ឋយ៉ាងពេញទំហឹង។

លោក ឃួង ស្រេង បានបន្តថា៖ បន្ថែមពីនេះរដ្ឋបាលរាជធានីភ្នំពេញ ក៏បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូន អ្នកដំណើរនានាឱ្យរក្សាតម្លៃដឹកជញ្ចូននៅដដែល ពុំតម្លើងថ្លៃ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរនេះ ដើម្បីរួមចំណែកជាមួយរាជរដ្ឋាភិបាល និងរដ្ឋបាលរាជធានីភ្នំពេញក្នុងការជួយសម្រួលដល់ជីវភាពរស់នៅរបស់បងប្អូនប្រជាពលរដ្ឋ។

ប៉ុន្តែទោះបីជាយ៉ាងណាក្តីយើងមិនបានកម្រិតតម្លៃឱ្យម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរនោះទេ គ្រាន់តែសុំកុំអោយពួកគាត់យកតំលៃហួសហេតុ គ្មានហេតុផល៕

អត្ថបទ៖ ស្រីរ័ត្ន