ក្រុមហ៊ុន​អាកាសចរណ៍ចំនួន​ពីរ តភ្ជាប់ជើងហោះហើរ​ថ្មី​ក្នុង​ពេល​តែមួយ​នៅ​កម្ពុជា

ក្រុមហ៊ុន​អាកាសចរណ៍​ចំនួន​ពីរ បាន​ចាប់ផ្តើម​សេវា​ហោះហើរ​ដឹក​អ្នក​ដំណើរ​ទាំង​ក្នុង​និង​ក្រៅ​ប្រទេស​មក​អាកាសយានដ្ឋាន​ទាំង ៣ នៅ​កម្ពុជា។

លោក ស៊ីន ចាន់សិរីវុត្ថា អ្នកនាំពាក្យ​ឲ្យ​អាកាសចរណ៍​ស៊ីវិល​កម្ពុជា​បាន​ឲ្យ​កម្ពុជា​ថ្មី​ដឹង​ថា ក្រុមហ៊ុន Air Asia បាន​ទទួល​វិញ្ញាបនបត្រ​ប្រតិបត្តិការ​ហោះហើរ និង​វិញ្ញាបនបត្រ​រោងជាង​ជួសជុល​យន្តហោះ​ជា​ផ្លូវការ​ពី​រដ្ឋលេខាធិការ​អាកាសចរ​ស៊ីវិល។

លោកថា បើគ្មានការប្រែប្រួលទេនោះ ក្រុមហ៊ុននឹងចាប់ផ្តើមហោះហើរក្នុងស្រុកចាប់ពីថ្ងៃទី៣ ឧសភា នេះទៅ។

លោក ស៊ីន ចាន់សិរីវុត្ថា បន្ត​ថា តាមរយៈ​ការបើកជើងហោះហើរ​ក្នុងស្រុករបស់ក្រុមហ៊ុន Air Asia នឹង​ជំរុញនូវ​កំណើន​ជើង​ហោះហើរ និង​ចំនួនអ្នកដំណើរក្នុងស្រុកឱ្យកើនឡើង ក៏ដូចជា​ការផ្លាស់ប្តូរ​បទពិសោធន៏​ថ្មី ស្របពេលដែលតម្លៃនៃការហោះហើររបស់ក្រុមហ៊ុនស្ថិតក្នុងកម្រិតសមរម្យ ដែល​ប្រជាជន​កម្ពុជាមួយចំនួនធំ​មាន​លទ្ធភាព​អាចធ្វើដំណើរ​តាមផ្លូវអាកាសបាន។

ក្រុមហ៊ុន​អាកាសចរណ៍ Air Asia កំពុង​ធ្វើប្រតិបត្តិការ​នៅ​ក្នុង​ប្រទេស​ក្នុង​តំបន់​អាស៊ាន​ចំនួន ៥ រួមមាន​ម៉ាឡេស៊ី ថៃ ឥណ្ឌូណេស៊ី ហ្វីលីពីន និង​កម្ពុជា មាន​យន្តហោះ​ចំនួន ២២០ គ្រឿង​ ដែល​កំពុង​ដំណើរការ​ជើង​ហោះហើរ​ទៅកាន់ ១៣០ គោលដៅ។

បើ​តាមមន្រ្តីអាកាសចរណ៍ស៊ីវិល ប្រតិបត្តិការ​របស់​ក្រុមហ៊ុន Air Asia Cambodia ក្រុមហ៊ុន​នឹង​ហោះហើរ​តាម​គោលដៅ​ទៅមក​រវាង​ភ្នំពេញ-សៀមរាប​ចំនួន ៤ ជើងក្នុងមួយថ្ងៃ និង​ទិសដៅ​ទៅមក​រវាង​ខេត្ត​ព្រះសីហនុ-សៀមរាប​ ចំនួន ៤ ជើង​ក្នុងមួយថ្ងៃ ខណៈ​ការហោះហើរ​អន្តរជាតិ​នឹងចាប់​ដំណើរការ​នា​ពេល​ឆាប់ៗ​ខាងមុខនេះ។

ជាមួយគ្នានេះដែរ ក្រៅពីក្រុមហ៊ុន Air Asia ​Cambodia ក្រុមហ៊ុន​អាកាសចរ​ណ៍​មក​ពី​តំបន់​មជ្ឈិមបូព៌ាមួយទៀត​ ក៏​បាន​ចាប់ផ្ដើម​​តភ្ជាប់​ជើង​ហោះហើរ​ឡើង​វិញ​ពី​ទីក្រុង​ឌុយបៃ​មក​អាកាសយានដ្ឋាន​ប្រទេស​កម្ពុជា។

ថ្លែង​នៅ​ក្នុងពិធី​បើកសម្ពោធ​ជើង​ហោះហើរ​ឡើង​វិញ​របស់​ក្រុមហ៊ុន​អាកាសចរណ៍ Emirate កាល​ពី​ម្សិលមិញ​នេះ លោក ម៉ៅ ហាវណ្ណាល់ រដ្ឋមន្រ្តី​ទទួល​បន្ទុក​រដ្ឋលេខាធិការដ្ឋាន​អាកាសចរ​ស៊ីវិល​បាន​ស្វាគមន៍​នៃ​ការ​តភ្ជាប់​ជើង​ហោះហើរ​ឡើង​វិញ​របស់​ក្រុមហ៊ុន​អាកាសចរណ៍ Emirates មក​កាន់​រាជធានី​ភ្នំពេញ​ ក្រោយ​វិបត្តិ​ជំងឺ​កូវីដ១៩។

លោក​ថា ជើងហោះហើរ​របស់ក្រុមហ៊ុនអាកាសចរណ៍ Emirates គឺជាការ​តភ្ជាប់​តាម​ផ្លូវ​អាកាសរវាង​ទីក្រុងឌូបៃ និងរាជធានីភ្នំពេញ ឆ្លងកាត់ប្រទេស​សិង្ហបុរី ដោយ​មានការហោះហើរ​ជា​ទៀងទាត់ប្រាំពីរ (៧) ជើងក្នុងមួយសប្តាហ៍ ជាមួយ​នឹងការប្រើប្រាស់យន្តហោះ​ប្រភេទ Boeing-777 ។

ក្រុមហ៊ុន​អាកាសចរណ៍ Emirates ជា​ក្រុមហ៊ុន​អាកាសចរណ៍ទី ២ ដែល​មាន​ជើង​ហោះ​ហើរ​ពី​តំបន់​មជ្ឈិមបូព៌ា​មកកាន់​កម្ពុជា ហើយ​ក៏ជា​ក្រុមហ៊ុន​អាកាសចរណ៍បរទេសទី ២៨ ដែល​មាន​ជើង​ហោះហើរ​មក​កាន់​កម្ពុជាផងដែរ។

ប្រាប់​កម្ពុជា​ថ្មី​តាម​ទូរសព្ទ លោក យឹម សានីរាន មន្រ្តី​ទទួលបន្ទុក​សម្របសម្រួល​នៅ​អាកាសយានដ្ឋាន​សៀមរាប​អង្គរ​បាន​មើល​ឃើញពី​​ផល​វិជ្ជមាន​ ​នៅ​ពេល​ដែល​មាន​ក្រុមហ៊ុន​អាកាសចរ​ណ៍​ថ្មីៗ​តភ្ជាប់​ជើង​ហោះ​ហើរ​មក​ប្រទេស​កម្ពុជា ដែល​នឹង​នាំ​ឲ្យ​ការ​ធ្វើ​ដំណើរ​តាម​ផ្លូវ​អាកាស​កាន់​តែ​មាន​ភាព​មមាញឹក។

បើតាម​លោក យឹម សានីរាន វត្តមានរបស់​ក្រុមហ៊ុនអាកាសចរណ៍​ថ្មីៗ​បន្ថែម​ នឹងជំរុញ​ការ​​ប្រកួតប្រជែង ​ធ្វើ​ឲ្យ​តម្លៃ​នៃ​ការ​ធ្វើ​ដំណើរ​តាម​ផ្លូវ​អាកាស​កាន់តែ​មាន​តម្លៃ​សមរម្យ​ ផ្តល់​លទ្ធភាព​ឲ្យ​ពលរដ្ឋ​អាច​ធ្វើ​ដំណើរ​កាន់តែ​ច្រើន​ជាង​មុន៕