ព័ត៌មានជាតិ

ប.ស.ស សហការជាមួយមន្ត្រីជំនាញ ស្វែងរកចាប់ខ្លួនជនឆបោកបន្លំលេខគណនីធនាគាររបស់ ប.ស.ស មកផ្ដន្ទាទោសតាមច្បាប់

បានផុស

១ year មុន

នៅ

ថ្ងៃព្រហស្បតិ៍ ២ ឧសភា ២០២៤

ដោយ

បេឡាជាតិសន្តិសុខសង្គម(ប.ស.ស) បាននិងកំពុងសហការជាមួយនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ដើម្បីធ្វើការស្រាវជ្រាវស្វែងរកជនឆបោកបន្លំលេខគណនីធនាគាររបស់ ប.ស.ស យកមកផ្ដន្ទាទោសតាមច្បាប់ជាធរមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សុផាន់ណារិទ្ធ អគ្គនាយករង ប.ស.ស នៃក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ថ្មីៗ នេះ មានជនអនាមិក បានបន្លំលេខគណនីធនាគាររបស់ ប.ស.ស និងចូលក្នុងគ្រុបតេឡេក្រាមឆាតរបស់ ប.ស.ស ដោយបានបន្លំឈ្មោះជាភ្នាក់ងារ ប.ស.ស និងបានយកឡូហ្គោ របស់ ប.ស.ស ទៅតាំងធ្វើជាប្រូហ្វាល់ ដើម្បីឆបោកប្រជាពលរដ្ឋជាសមាជិករបស់ ប.ស.ស ឱ្យបង់ប្រាក់មកគណនីធនាគាររបស់ខ្លួនតាមរយៈការបង់ភាគទាន។

លោកបានបន្តថា ករណីឆបោកនេះបានបង្កឱ្យមានភាពភ័ន្តច្រឡំ និងបង្កើតឱ្យមានសេចក្ដីមិនទុកចិត្តមកលើ ប.ស.ស ហើយការក្លែងបន្លំនេះ បង្កឱ្យមានភាពប៉ះពាល់យ៉ាងធ្ងន់ធ្ងរចំពោះអង្គភាព ប.ស.ស ជាពិសេសសមាជិក ប.ស.ស ផ្ទាល់តែម្ដង។

លោកបានបន្ថែមថា ពាក់ព័ន្ធករណីខាងលើនេះ ប.ស.ស បាននិងកំពុងសហការជាមួយនាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ដើម្បីចាត់វិធានការនីតិវិធីតាមផ្លូវច្បាប់ និងស្រាវជ្រាវរកជនឆបោកខាងលើមកផ្ដន្ទាទោសតាមច្បាប់ជាធរមាន។

លោកបានបញ្ជាក់ថា ប.ស.ស មិនមានគណនីធនាគារដែលបង្ហាញឈ្មោះជាបុគ្គលណាម្នាក់ និងគ្មានការបង់ភាគទានតាមរយៈការស្កេនឃ្យូអរកូដនោះទេ។ ដូចនេះ មុនពេលបង់ភាគទាន ប្រជាពលរដ្ឋត្រូវមានការប្រុងប្រយ័ត្នខ្ពស់ និងត្រួតពិនិត្យមើលពាក្យ ប.ស.ស បុគ្គលស្វ័យនិយោជន៍ ឬជាភាសាអង់គ្លេស NSS self employed ចៀសវាងចាញ់បោកជនខិលខូច នាំឱ្យខាតបង់ទ្រព្យសម្បត្តិដោយប្រការណាមួយ៕

អត្ថបទ ៖ សំអឿន