រដ្ឋបាលខេត្តសៀមរាប ស្នើឱ្យប្រតិភូខេត្តយូណាន ជំរុញភ្ញៀវទេសចរចិនមកលេងកម្សាន្តនៅកម្ពុជា

នៅរសៀលថ្ងៃទី១៥ ខែឧសភា ឆ្នាំ២០២៤ លោក លី សារី អភិបាលរងខេត្ត និងថ្នាក់ដឹកនាំមន្ទីរពាក់ព័ន្ធ មន្ត្រីសាលាខេត្ត បានជួបធ្វើកិច្ចពិភាក្សាជាមួយប្រតិភូខេត្តយូណាន ដែលដឹកនាំដោយលោក លីវ ហុងជាន សមាជិកអចិន្ត្រៃយ៍ នៃគណៈកម្មាធិការបក្សកុម្មុនីស្តខេត្តយូណាន និងជាលេខានៃគណៈកម្មាធិការបក្សកុម្មុនីស្តចិន ក្រុងគុនមីង ខេត្តយូណាន នៃសាធារណរដ្ឋប្រជាមានិតចិន និងសហការ នៅសាលប្រជុំសាលាខេត្ត។ 

ក្នុងឱកាសនោះ លោក លី សារី បានលើកឡើងពីសក្តានុពល និងការងារសន្តិសុខ សុវត្ថិភាព របស់ខេត្ត ដែលរក្សាបានល្អជូនដល់ភ្ញៀវទេសចរណ៍ជាតិ អន្តរជាតិចូលមកទស្សនាកម្សាន្ត នៅតាមតំបន់រមណីយដ្ឋានវប្បធម៌ ធម្មជាតិ និងអ្នកមកវិនិយោគនៅខេត្តសៀមរាប។ លោកបានបញ្ជាក់ថា ក្រៅពីវិស័យ ទេសចរណ៍ ខេត្តសៀមរាបមានផ្ទៃដីកសិកម្មច្រើន ដែលនឹងបំពេញតម្រូវការជូនដល់អ្នកវិនិយោគ និងតម្រូវការរបស់ប្រជាពលរដ្ឋកម្ពុជា។ លោកបញ្ជាក់ថា ខេត្តសៀមរាប និងខេត្តយូណាន មានសម្ព័ន្ធមេត្រីភាពនឹងគ្នា មានកិច្ចសហប្រតិបត្តិការបានល្អនឹងគ្នា។ ម៉្យាងទៀតខេត្តយូណាន ក៏មានក្រុមហ៊ុនវិនិយោគ ក្នុងការសាងសង់អាកាសយានដ្ឋានអន្តរជាតិនៅខេត្តសៀមរាប ព្រមទាំងចូលរួមក្នុងកិច្ចអភិវឌ្ឍន៍ខេត្ត។

លោកអភិបាលរងខេត្ត បានបន្តទៀតថា សាធារណរដ្ឋប្រជាមានិតចិន គឺជាដៃគូដ៏សំខាន់ ក្នុងកិច្ចអភិវឌ្ឍន៍ប្រទេសជាតិ ដែលជាមិត្តដែកថែប និងបានគាំទ្រចំពោះគំនិតផ្តួចផ្តើម (ខ្សែក្រវាត់ និងផ្លូវ) ដែលបានចូលរួមចំណែកក្នុងការជួយដល់ប្រទេសកំពុងអភិវឌ្ឍ ឱ្យមានការរីកចម្រើន។ ក្នុងនោះដែរ លោកអភិបាលរងខេត្ត បានសំណូមពរដល់គណៈប្រតិភូ ក្នុងការជម្រុញដល់អ្នកវិនិយោគដើមី្បបំពេញនូវតម្រូវការរបស់ភ្ញៀវទេសចរណ៍ និងជំរុញដល់ភ្ញៀវទេសចរចិនមកទេសចរណ៍នៅកម្ពុជា ជាពិសេស នៅខេត្តសៀមរាប និងធ្វើឱ្យកិច្ចទំនាក់ទំនងសហប្រតិបត្តិការរវាងខេត្តទាំងពីរ មានភាពរីកចម្រើនឡើង។

ចំណែក លោក លីវ ហុងជាន បានលើកឡើងពីគោលបំណងរបស់ខ្លួន ក្នុងនាមជាខេត្តសម្ព័ន្ធមេត្រីភាពជាមួយ ខេត្តសៀមរាប ដែលតែងតែមានការទំនាក់ទំនង និងសហប្រតិបត្តិការល្អនឹងគ្នា។ ក្នុងនោះ លោកបានផ្តោតទៅលើវិស័យទេសចរណ៍ កសិកម្ម និង វិស័យវិនិយោគ នៅកម្ពុជា ជាពិសេស នៅខេត្តសៀមរាប ដែលជាខេត្តមានសក្តានុពលយ៉ាងខ្លាំងលើវិស័យទេសចរណ៍។ ទន្ទឹមនោះ លោកក៏បានលើកឡើងពី វិស័យសេដ្ឋកិច្ចរបស់ ខេត្តយូណាន ដែលបានពឹងផ្អែកលើវិស័យកសិកម្ម ឧស្សាហកម្ម និងវិស័យដឹកជញ្ជូន។

លោកបន្តថា ខេត្តយូណាន គឺជាដៃគូរដ៏ល្អជាមួយខេត្តសៀមរាប ព្រមទាំងបានធ្វើកិច្ចសហប្រតិបត្តិការល្អនឹងគ្នា និងបានធ្វើការផ្លាប់ប្តូរប្រតិភូ ក្នុងការសិក្សាស្វែងយល់ពីគ្នាលើគ្រប់វិស័យ។ ម៉្យាងទៀតខេត្តយូណាន និង ខេត្តសៀមរាប មានសក្តានុពលប្រហាក់ប្រហែលគ្នា លើវិស័យទេសចរណ៍ ដោយខេត្តសៀមរាប សម្បូរទៅដោយប្រាង្គប្រាសាទបុរាណ រមណីយដ្ឋានធម្មជាតិ ហើយខេត្តយូណាន មានទីកន្លែងកម្សាន្តរបស់ភ្ញៀវទេសចរដែលមានវ័យចំណាស់ ត្រូវពឹងផ្អែកតំបន់ធម្មជាតិព្រៃភ្នំ ដែលមានទឹកធ្លាក់ ប្រកបដោយធម្មជាតិ ដោយខេត្តយូណាន ជាខេត្តមានបទពិសោធន៍លើវិស័យទេសចរណ៍ទៀតផង។

ជាមួយគ្នានោះ លោកក៏បានទទួលនូវសំណូមពររបស់រដ្ឋបាលខេត្ត ក្នុងការជំរុញវិស័យទេសចរណ៍ និងធ្វើការផ្សព្វផ្សាយដល់ប្រជាពលរដ្ឋចិន ចូលមកធ្វើទេសចរណ៍នៅខេត្តសៀមរាប។​ លោកសង្ឃឹមជឿជាក់ថា កិច្ចសហប្រតិបត្តិការរវាងខេត្តទាំងពីរ ក៏ដូចប្រទេសទាំងពីរ នៅក្រោមក្របខ័ណ្ឌកិច្ចសហប្រតិបត្តិការ (ខ្សែក្រវាត់ និងផ្លូវ) ហើយក៏ជាឆ្នាំការផ្លាស់ប្តូរប្រជាជននិងប្រជាជន នៃប្រទេសទាំងពីរផងដែរ៕

អត្ថបទ៖ គឿន វេត