រដ្ឋមន្ត្រីកសិកម្ម ស្វាគមន៍ដៃគូវិនិយោគ នាំចេញការកែច្នៃស្វាយចន្ទី ទៅកាន់ទីផ្សារអន្ដរជាតិ

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ស្វាគមន៍ក្រុមហ៊ុនឯកជនក្នុងការចូលរួមដាំដុះនិងកែច្នៃស្វាយចន្ទីដើម្បីជំរុញការនាំចេញទៅកាន់ទីផ្សារនានានៅក្នុងតំបន់និងពិភពលោក ស្របតាមគោលនយោបាយរបស់រាជរដ្ឋាភិបាលក្នុងប្រែក្លាយកម្ពុជាទៅជាអធិរាជចន្ទីនាពេលខាងមុខ។

ក្នុងកិច្ចប្រជុំនេះ​នៅទីស្តីការក្រសួងកសិកម្ម រុក្ខាប្រមាញ់ និងនេសាទ កាលពីរសៀលថ្ងៃទី២៨  ខែឧសភា ឆ្នាំ២០២៤ លោករដ្ឋមន្ត្រី បានគូសបញ្ជាក់ថា កម្ពុជាត្រូវការ និងស្វាគមន៍ដៃគូវិនិយោគទាំងអស់លើវិស័យកសិកម្ម ជាពិសេសលើការកែច្នៃសម្រាប់ការនាំចេញទៅទីផ្សារអន្តរជាតិ ជាអាទិ៍ចិន និងអឺរ៉ុប។ ជាមួយគ្នានេះដែរ លោករដ្ឋមន្ត្រី បានបញ្ជាក់បន្ថែមថា កម្ពុជាមានស្វាយចន្ទីល្អ រសជាតិឆ្ងាញ់ ដែលកំពុងត្រូវការអ្នកកែច្នៃ នាំចេញប្រកបដោយគុណភាព មានតម្លៃបន្ថែមខ្ពស់ ដែលអាចផ្តល់ផលចំណេញទាំងកសិករ និងក្រុមហ៊ុន។

ទន្ទឹមនឹងនេះដែរ លោករដ្ឋមន្ត្រី បានបញ្ជាក់បន្ថែមអំពីផលិតផលកសិកម្មរបស់ខ្មែរ ដែលមានសក្តានុពលមួយចំនួនទៀត ដូចជាស្វាយ ចេកអំបូងលឿង កៅស៊ូ និងអង្ករជាដើម ដែលត្រូវការក្រុមហ៊ុនផ្សព្វផ្សាយ ធ្វើទីផ្សារ និងនាំចេញទៅក្រៅប្រទេស។

លោករដ្ឋមន្ត្រី បានសង្កត់បញ្ជាក់អំពីកម្មវិធីគោលនយោបាយអាទិភាពរបស់ក្រសួង គឺការជំរុញសហគមន៍កសិកម្មទំនើប ដែលជួយដល់ក្រុមហ៊ុនក្នុងការប្រមូលទិញ និងធ្វើកិច្ចសន្យាជាមួយសហគមន៍ផលិត ហើយក្រសួងនឹងជួយគាំទ្របន្ថែម ដើម្បីឱ្យដំណើរការប្រព្រឹត្តទៅបានរលូន ទទួលបានជោគជ័យ និងមានផលចំណេញពិតប្រាកដដល់គ្រប់ភាគីពាក់ព័ន្ធ។

គួររលឹកផងដែរថា ក្រុមហ៊ុន CSNC Agriculture Co.,Ltd ជាក្រុមហ៊ុនមកពីប្រទេសសឹង្ហបុរី បានបើកការដ្ឋាន សាងសង់​រោង​ចក្រកែច្នៃគ្រាប់ស្វាយចន្ទីជាមួយទុនវិនិយោគតម្លៃ១២ លានដុល្លារ ស្ថិតនៅភូមិស្នោ ឃុំត្រពាំងប្ញស្សី ស្រុកកំពង់ស្វាយ ខេត្ត​កំពង់ធំ កាលពីថ្ងៃទី ០៦ ខែធ្នូ ឆ្នាំ ២០២៣។

បច្ចុប្បន្ន​នេះ ផ្ទៃដី​ដែល​បាន​ដាំ​ដំណាំ​ស្វាយចន្ទី​សរុប​ប្រមាណ ៧០ ម៉ឺន​ហិកតា ក្នុងនោះ​ខេត្តកំពង់ធំ បាន​ដាំ​ដុះ​ដំណាំ​ស្វាយចន្ទី​ច្រើនជាងគេ​នៅក្នុង​ប្រទេស​កម្ពុជា សរុប​មាន​ចំនួន​ជាង ១៥០ ពាន់​ហិកតា​។ បច្ចុប្បន្ននេះ កម្ពុជា​បាន​នាំ​គ្រាប់ស្វាយចន្ទី​ឆៅ ចេញ​ក្រៅប្រទេស​ប្រមាណ​ជាង ៩០​ភាគរយ ក្នុង​តម្លៃទាប​៕