ក្រសួងការបរទេស រៀបចំកិច្ចពិភាក្សាស្ដីពីគោលនយោបាយការបរទេសកម្ពុជាក្នុងបរិបទអាស៑ាន

ដោយមានកិច្ចសហការជាមួយក្រសួងការបរទេស ក្លិបអ្នកកាសែតកម្ពុជា បានរៀបចំវេទិកាពិភាក្សាស្ដីពីគោល នយោបាយការបរទេសកម្ពុជា ក្នុងបរិបទអាស៊ាន។

វេទិកាពិភាក្សានេះ ប្រព្រឹត្តទៅនៅព្រឹកថ្ងៃទី១២ ខែមិថុនា ឆ្នាំ២០២៤ នាទីស្តីការក្រសួងការបរទេស ដោយមានការចូលរួមដោយលោក គង់ ភោគ រដ្ឋលេខាធិការក្រសួងការបរទេស និងលោក ពុយ គា ប្រធានក្លិបអ្នកកាសែតកម្ពុជា។

គោលបំណងនៃវេទិកាពិភាក្សាដូចប្រធានបទខាងលើ ដើម្បីផ្តល់ឱកាសដល់អ្នកសារព័ត៌មានជាតិ និងអន្តរជាតិបានស្វែងយល់បន្ថែមទៀតអំពីគោលនយោបាយ ការបរទេសរបស់ប្រទេសកម្ពុជាក្នុងបរិបទអាស៊ាន រួមទាំងព្រឹត្តិការណ៍សំខាន់ៗក្នុងតំបន់អាស៊ានដែល ជះឥទ្ធិពលដល់គោលនយោបាយការបរទេសកម្ពុជា។

ក្លិបអ្នកកាសែតកម្ពុជា ចាត់ទុកវេទិកាខាងលើនេះមានសារសំខាន់ណាស់ដែលមិនគ្រាន់តែផ្តល់ឱកាសដល់ អ្នកសារព័ត៌មានបានស្វែងយល់ដឹងកាន់តែច្បាស់អំពីគោលនយោបាយការបរទេសកម្ពុជាប៉ុណ្ណោះទេ ប៉ុន្តែជាឱកាសដែលអ្នកសារព័ត៌មានលើកជាសំណួរផ្សេងៗទាក់ទងនឹងគោលនយោបាយការបរទេស របស់ប្រទេសកម្ពុជា ក្នុងបរិបទអាស៊ានផងដែរ៕

អត្ថបទ៖ ធឿន វ៉ាន់សុង