ណែនាំឲ្យស្គាល់ក្រុមហ៊ុន​អាកាសចរណ៍​ទាំង ៣១ ក្រុមហ៊ុន ​​មានជើង​ហោះហើរ​​ត្រង់​មក​ប្រទេស​កម្ពុជា

បើ​តាម​របាយការណ៍​របស់​រដ្ឋលេខាធិការដ្ឋាន​អាកាសចរណ៍​ស៊ីវិល​ បច្ចុប្បន្ន​មាន​ក្រុមហ៊ុន​អាកាសចរណ៍​ទាំងក្នុងស្រុកនិងក្រៅស្រុក​ចំនួន ៣១ កំពុង​​​ប្រតិបត្តិការ​តភ្ជាប់​ការ​ហោះហើរ​ត្រង់​មក​កាន់​អាកាសយានដ្ឋាន​ទាំង ៣ របស់​ប្រទេស​កម្ពុជា។

​

តាម​របាយការណ៍របស់​​រដ្ឋលេខាធិការដ្ឋាន​អាកាសចរណ៍​ស៊ីវិល ក្នុង​ចំណោម​ក្រុមហ៊ុន​អាកាសចរណ៍​ទាំង ៣១ មាន​ក្រុមហ៊ុន​អាកាសចរណ៍​ក្នុង​ស្រុក​ចំនួន ៤ ដែល​កំពុង​ប្រតិបត្តិការ​ផ្តល់​សេវា​ដឹក​អ្នក​ដំណើរ​តាមផ្លូវ​អាកាស​ទាំង​ក្នុងស្រុកនិង​ក្រៅ​ស្រុក​។

​ក្រុមហ៊ុន​អាកាសចរណ៍​ទាំង ៣១ ក្រុមហ៊ុន មានមូលដ្ឋាន​មក​​ពីប្រទេសអាស៊ានចំនួន ៨ រួមទាំងមាន​មកពី​ប្រទេស ចិន កូរ៉េខាងត្បូង ហុងកុង កោះ​តៃវ៉ាន់ កាតា និង​អារ៉ាប់អេមីរ៉េត។

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​កម្ពុជា៖

-Cambodia Angkor Air (K6)
-Cambodia Airway (KR)
-Sky Angkor Ailines (ZA)
-AirAsia Cambodia (KT)

ក្រុមហ៊ុន​អាកាសចរ​ណ៍​មាន​មូលដ្ឋាន​ក្នុង​ប្រទេស​ថៃ៖

-Bangkok Airways (PG)
-Thai Airways International (TG)
-Thai Vietjet Air (VZ)
-Thai Air Asia (FD)
-K-Mile (8K)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​វៀតណាម៖

-Vietnam Airlines (VN)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​ម៉ាឡេស៊ី៖

-Malaysia Airlines (MH)
-Air Asia Berhad (AK)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​សិង្ហបុរី៖

-Singarpore Airlines (SQ)
-Jetstar Asia Airways (3K)

ក្រុមហ៊ុន​អាកាសចរណ៍​មាន​មូលដ្ឋាន​មកពី​ហុងកុង៖

-Cathay Pacific Airways (CX)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​ចិន៖

-China Southern Airlines (CZ)
-China Eastern Airlines (MU)
-Shenzhen Airlines (ZH)
-Air China (CA)
-Xiamen Airlines (FM)
-Spring Airlines (9C)

ក្រុមហ៊ុន​អាកាសចរណ៍​មាន​មូលដ្ឋាន​ពី​កោះ​តៃវ៉ាន់៖

-Eva Airways (BR)
-China Airlines (CI)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​ហ្វីលីពិន៖

-Philippine Airlines (PR)

ក្រុមហ៊ុន​អាកាសចរណ៍​មាន​មូលដ្ឋាន​មក​ពី​សាធារណរដ្ឋ​កូរ៉េ៖

-Asiana Airlines (OZ)
-Korean Airlines (KE)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​កាតា៖

-Qatar Airways (QR)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​មីយ៉ាន់ម៉ា៖

-Myanmar Airways Int’l (8M)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​ឥណ្ឌូណេស៊ី៖

-PT Indonesia AirAsia (QZ)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​ឡាវ៖

-Lao Airlines (OV)

ក្រុមហ៊ុន​អាកាសចរណ៍​មាន​មូលដ្ឋាន​ក្នុង​ប្រទេស​អារ៉ាប់រួម៖

-Emirates Airlines

នៅ​ថ្ងៃទី ១៦ ខែមិថុនា ឆ្នាំ ២០២៤ នេះ ក្រុមហ៊ុន​អាកាសចរណ៍​ក្នុងស្រុក Cambodia Angkor Air បានប្រកាស​នឹង​​សម្ពោធ​បើកផ្លូវ​ហោះហើរ​ត្រង់​លើក​ដំបូង​រវាង​កម្ពុជា-ឥណ្ឌា​។

លោក ស៊ីន ចាន់សិរីវុត្ថា រដ្ឋលេខាធិការ​ និងជាអ្នកនាំពាក្យ​អាកាសចរណ៍​ស៊ីវិល​បានឲ្យ​កម្ពុជាថ្មី​ថា ក្រុមហ៊ុន​អាកាសចរណ៍​​​ក្នុងស្រុក​ Cambodia Angkor Air នឹង​ចាប់ផ្តើមប្រតិបត្តិការ​ជើង​ហោះហើរ​ត្រង់​ទៅ​ប្រទេស​ឥណ្ឌាដោយ​ធ្វើឡើង ៤ ជើង​ក្នុង​មួយ​សប្តាហ៍។

ដោយ​ឡែក ក្រុមហ៊ុនអាកាសចរណ៍ IndiGo របស់ឥណ្ឌាក៏​នឹង​បើកការហោះហើរត្រង់ពី​ទីក្រុង​ញូវដេលី​មកកាន់​ខេត្ត​សៀមរាប ចាប់ពី​ថ្ងៃទី ២៧ ខែតុលា ឆ្នាំ២០២៤ ដោយ​ធ្វើការហោះ​ហើរ​ ៧ ​ជើង​ក្នុង​មួយ​សប្តាហ៍។

បើ​តាម​លោក ស៊ីន ចាន់សិរីវុត្ថា ការ​តភ្ជាប់ផ្លូវហោះហើរ​ថ្មីនេះ នឹងផ្ដល់​ផល​ចំណេញ​ដល់​ប្រទេស​ទាំងពីរ​ដែល​នឹង​ជួយ​ផ្សព្វ​ផ្សាយ​ពី​សក្តានុពល​ទេសចរណ៍ វប្បធម៌ សាសនា និង​សុខភាព ខណៈ​កម្ពុជា​ប្រើប្រាស់​សេវា​សុខាភិបាល​នៅ​ឥណ្ឌា​ច្រើន ​ហើយ​ឥណ្ឌា​ក៏​ចង់មក​ស្រុកខ្មែរ​តាមរយៈ​ទេសចរណ៍​វប្បធម៌ និង​សាសនា​ផង​ដែរ។

ផ្អែក​តាម​​របាយការណ៍​របស់​រដ្ឋលេខាធិការ​អាកាសចរ​ស៊ីវិល នៅក្នុងឆ្នាំ២០២៣ កម្ពុជា​ទទួល​បាន​អ្នកដំណើរ​តាមផ្លូវអាកាស​​ទាំងក្នុងស្រុកនិងអន្តរជាតិ មានចំនួនជាង ៥ លាន ១ សែននាក់ កើន​ឡើង ១១៥% ធៀប​នឹងរយៈ​ពេល ១២ ខែ ឆ្នាំ​២០២២ ដែលជាដំណាក់កាលងើបឡើងវិញ ក្រោយ​វិបត្តិ​ជំងឺ​កូវីដ-១៩។

អំឡុង​ពីខែមករា ដល់ខែមេសា ឆ្នាំ២០២៤ កម្ពុជា​បានទទួលអ្នកដំណើរតាមផ្លូវអាកាសជាង ២ ​លាន​នាក់ ពោល​គឺកើនឡើង ២៥% ធៀបនឹងអំឡុងពេលដូចគ្នានៅឆ្នាំ២០២៣ ដែល​មាន​ចំនួន​ត្រឹម​តែជាង ១ លាន ៦ សែននាក់។

ក្នុងឆ្នាំ ២០២៤ មាន​ក្រុមហ៊ុនអាកាសចរណ៍ក្នុងស្រុក និងបរទេសចំនួន ៣១ ដែល​កំពុង​ត​ភ្ជាប់ជើង​ហោះហើរឡើងវិញពីប្រទេសអាស៊ានទាំង ៨ រួមទាំង ចិន កូរ៉េខាងត្បូង ហុងកុង កោះ​តៃវ៉ាន់ កាតា និង​អារ៉ាប់រួម​អេមីរ៉េត។ កាលពី​ដើមខែឧសភា ឆ្នាំ២០២៤ ក្រុមហ៊ុន Emirates Airlines ក៏​បានភ្ជាប់​ជើង​ហោះហើរមកប្រទេស​កម្ពុជា​ឡើងវិញ​ពី​ទីក្រុង Dubai ដោយ​ឆ្លងកាត់​ប្រទេស​សិង្ហបុរី។

លោក ម៉ៅ ហាវណ្ណាល់ រដ្ឋមន្រ្តី​ទទួលបន្ទុក​រដ្ឋលេខាធិការដ្ឋាន​អាកាសចរ​ណ៍​ស៊ីវិល​​ថ្លែង​នៅ​ក្នុង​ដំណើរ​ទស្សនកិច្ច​ស្វែង​យល់​ពី​ការ​វិវឌ្ឍន៍​គម្រោង​សាងសង់​ព្រលាន​យន្តហោះ​អន្តរជាតិ​តេជោ​កាល​ពី​ពេល​ថ្មីៗ​នេះ​ថា សកម្មភាព​ដឹកជញ្ជូន​តាម​ផ្លូវអាកាស​នៅកម្ពុជា​បាន​ស្ដារឡើងវិញ​បន្តិចម្ដងៗ បន្ទាប់​ពី​វិបត្តិ​ជំងឺកូវីដ-១៩ និង​កំពុង​បោះ​ជំហាន​ទៅ​មុខ​គួរ​ជា​ទី​មោទនៈ​។

លោក​ថា ដើម្បីបន្តរួមចំណែកក្នុងការអនុវត្តផែនការយុទ្ធសាស្ត្រអភិវឌ្ឍជាតិ​ឆ្នាំ ២០២៤-២០២៨ ស្រប​ទៅតាម​យុទ្ធសាស្ត្រ​​បញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជានីតិកាលទី៧ និង​​​ជំរុញ​ឱ្យ​មាន​កំណើន​អ្នក​ដំណើរ និង​​​ដឹកជញ្ជូន​ទំនិញ​តាមផ្លូវអាកាស រដ្ឋលេខាធិការដ្ឋាន​អាកាសចរណ៍ស៊ីវិល​នឹង​បន្តអនុវត្តគោល​នយោបាយ​បើកចំហ​ជើងមេឃ ពង្រឹងសុវត្ថិភាព​និង​សន្តិសុខ​អាកាសចរណ៍ បន្ត​ពង្រឹង​និង​ពង្រីក​ហេដ្ឋារចនាសម្ព័ន្ធ​អាកាសយានដ្ឋាន​ជាតិ​និង​អន្តរជាតិ ពង្រឹង​កិច្ចសហប្រតិបត្តិការអន្តរជាតិ​ទាំងទ្វេភាគី និង​ពហុភាគី ព្រម​ទាំងបន្តកិច្ចប្រឹងប្រែង​បង្កើន​ការ​ហោះហើរ​ត្រង់​មកកាន់កម្ពុជា​ទាំង​ក្នុង​តំបន់ តំបន់​មជ្ឈឹមបូព៌ា ជាពិសេស​ពី​ប្រទេស​នៅតំបន់អឺរុប៕