ទិវាលោកឪពុក! ខេម បានត្រឹមរម្លឹកទាំងអួលដើមកពេលគេសួរនាំរឿងរូបថតជុំឪពុកនិងគ្រួសារ

ដូចប្រិយមិត្តដឹងហើយនៅថ្ងៃទី១៦ ខែមិថុនា ឆ្នាំ២០២៤នេះ គឺជា “ទិវាលោកឪពុក” ខណ:គេសង្កេតឃើញនៅលើបណ្តាញសង្គមមានការបង្ហោះរូបភាពពីការជូនពរ និងដឹងគុណជូនចំពោះលោកឪពុកជាទីស្រលាញ់ពីសំណាក់មហាជនជាច្រើនផងនោះ។

ជាការពិតណាស់នៅក្នុងថ្ងៃនេះដែរក៏មានអ្នកខ្លះមានការបញ្ចេញរូបភាពអនុស្សាវរីយ៍ថ្មីៗជាមួយលោកឪពុក និងក្រុមគ្រួសាររៀងៗខ្លួន ខណ:ខ្លះទៀតបានត្រឹមតែបង្ហោះរូបថតអតីតកាលរបស់លោកឪពុកដើម្បីនឹករលឹក និងការដឹងគុណព្រោះថាលោកឪពុកខ្លះបានចែកឋានទៅហើយ។ ដោយឡែកសម្រាប់តារាចម្រៀង ខេម បានត្រឹមតែរម្លឹងស្តាយក្រោយដែលមិនមានរូបថតជុំគ្រួសារ។

លោក ខេម បានរៀបរាប់ថា មានសំណួរជាច្រើនបានចោទសួរមកលោកថា ហេតុអី្វមិនដែលឃើញ ខេម ថតជុំជាមួយគ្រួសារមានឪពុកមានម្ដាយបងប្អូនជុំគ្នា ដូចគេដូចឯង ដូចសិល្ប:មួយចំនួនអ៊ីចឹង?។

ចម្លើយ“ដោយសារតែស្ថានភាពក្រុមគ្រួសាររបស់ខ្ញុំ ពេលនោះមានជីវភាពក្រីក្រគ្មានលទ្ធភាពសូម្បីតែថតរូបជុំគ្នាមួយប៉ុស្តិ៍នៅក្នុងពេលដែលលោកពុកខ្ញុំនៅមានជីវិតនៅពេលដែលកូនៗមានលទ្ធភាពឪពុករបស់ខ្ញុំគាត់បានលាចាកលោកបាត់ទៅហើយនេះហើយជាហេតុផលដែលខ្ញុំមិនដែលមានរូបភាពថតជុំជាមួយគ្រួសារសោះ“ ។

តារាចម្រៀង ខេម បានបន្ថែមថា ប៉ុន្តែខ្ញុំចង់ប្រាប់អ្នកទាំងអស់គ្នាថា ខ្ញុំពិតជាមានសំណាងណាស់ដែលបានកើត នឹងម្ដាយរបស់ខ្ញុំពីលោកឪពុករបស់ខ្ញុំនៅថ្ងៃនេះជាថ្ងៃបុណ្យលោកឪពុកសូមជូនពរលោកឪពុកទូទាំងសាកលលោកឲ្យមានអាយុយឺនយូរជាម្លប់សម្រាប់កូនចៅគ្រប់ៗគ្នា៕

អត្ថបទ៖ ចាន់រ៉ា