សម្ដេចធិបតី ថ្លែងថា ចំណតរថយន្ត គឺជាបញ្ហាចោទនៅក្នុងរាជធានីភ្នំពេញ

អញ្ជើញជាអធិបតីក្នុងពិធីបើកការដ្ឋានសាងសង់ស្ពានអាកាសភ្លោះ ស្ថិតនៅចំណុច​ប្រសព្វមហាវិថីសម្តេចតេជោ ហ៊ុន សែន និងផ្លូវជាតិលេខ២ ព្រំប្រទល់រវាង​រាជធានី​ភ្នំពេញ និងខេត្តកណ្តាល នាព្រឹកថ្ងៃទី១៧ ខែមិថុនានេះ សម្ដេចធិបតី ហ៊ុន ម៉ាណែត បានថ្លែងពីបញ្ហាប្រឈមអត់ចំណតរថយន្តនៅក្នុងរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ដោយសារកំណើនប្រជាពលរដ្ឋ បានទាមទារឱ្យមានការបង្កើតសមិទ្ធផលជាបន្តបន្ទាប់ មិនត្រឹមតែបរិមាណ ថែមទាំងភាពសម្បូរបែបទៀត។ សម្ដេចធិបតី ថា ជាក់ស្ដែង ហេដ្ឋារចនាសម្ព័ន្ធ បានបន្តរីកចម្រើន និងកើនឡើង ដែលបានផ្លាស់ប្ដូរពីផ្លូវដី ទៅផ្លូវកៅស៊ូ ផ្លូវបេតុង ហើយពីទំហំផ្លូវប្រវែង ៥ម៉ែត្រ ឬកន្លែងខ្លះតូចជាងហ្នឹង ពង្រីកទៅដល់ប្រវែង ១០ម៉ែត្រ ឬ២០ម៉ែត្រ ឬ៣០ម៉ែត្រ ….រហូតដល់វិវត្តន៍ពីផ្លូវធម្មតា ទៅធ្វើផ្លូវអាកាស ឬស្ពានអាកាស ជាដើម។

សម្ដេចធិបតី បានបន្តថា ភាពកកស្ទះនៅរាជធានីភ្នំពេញ ត្រូវតែមានការស្ថាបនាស្ពានអាកាស ឬកន្លែងខ្លះ រហូតត្រូវតែស្ថាបនាផ្លូវក្រោមដី ព្រោះជាភាពចាំបាច់ក្នុងការដោះស្រាយបញ្ហាប្រឈមនាពេលបច្ចុប្បន្ន ក្នុងខណៈពេលដែលប្រទេសមានការរីកចម្រើនឥតឈប់ឈរបែបនេះ ទាំងកំណើនប្រជាពលរដ្ឋ និងកំណើនមធ្យោបាយធ្វើដំណើរ។ បើតាមសម្ដេចធិបតី បច្ចុប្បន្ននៅក្នុងរាជធានីភ្នំពេញ មានប្រជាពលរដ្ឋប្រមាណជាង ៣លាននាក់ ខណៈមធ្យោបាយម៉ូតូ មានជាង ២លានគ្រឿង។

ដោយកំណើនដ៏សម្បូរបែបនេះហើយ បាននាំឱ្យរាជធានីភ្នំពេញ ជួបបញ្ហាប្រឈមមួយ គឺកង្វះចំណតរថយន្ត ដោយសម្ដេចធិបតី បញ្ជាក់ថា បញ្ហានេះត្រូវតែមានការដោះស្រាយជាបន្ទាន់ ខណៈនៅកណ្ដាលអស់លទ្ធភាពក្នុងការច្នៃចំណតរថយន្ត ទាំងលើដី និងក្រោមដី ខណៈរដ្ឋបាលរាធានីភ្នំពេញ ក៏បាននិងកំពុងអនុញ្ញាតឱ្យការវិនិយោគចំណតរថយន្តលើអាកាសបន្ថែមទៀត។

សម្ដេចធិបតី នាយករដ្ឋមន្ត្រី សង្កត់ធ្ងន់ថា រដ្ឋមិនអាចហាមឃាត់មិនប្រជាពលរដ្ឋដែលរស់នៅក្នុងរាជធានីភ្នំពេញ មិនឱ្យទិញរថយន្ត ឬម៉ូតូបានទេ ព្រោះនេះតម្រូវការរបស់ពលរដ្ឋ ហើយនេះក៏សរបញ្ជាក់ពីការរីកចម្រើនយ៉ាងលឿននៅក្នុងរាជធានីភ្នំពេញ និយាយដោយឡែក និងនិយាយជារួម ការរីកចម្រើននៅទូទាំងប្រទេស។ សម្ដេចធិបតី បន្តថា ដរាបណា ប្រទេសនៅតែមានសុខសន្តិភាព ភាពរីកចម្រើននឹងនៅតែមានទៅមុខបន្ថែមទៀត៕