ព័ត៌មានជាតិ

រដូវវស្សាខិតចូលមកដល់ រដ្ឋបាលសង្កាត់ផ្សារដេប៉ូ ១ ធ្វើការផ្លាស់ប្ដូរប្រព័ន្ធលូថ្មី

បានផុស

២ years មុន

នៅ

ថ្ងៃពុធ ១៧ កក្កដា ២០២៤

ដោយ

រដ្ឋបាលសង្កាត់ផ្សារដេប៉ូ ១ បានចាប់ផ្ដើមផ្លាស់ប្ដូរប្រព័ន្ធលូដែលចាស់ទ្រុឌទ្រោម មានដីកកស្ទះពេញ នាំឲ្យជនលិចពេលមេឃបង្អុរភ្លៀងម្ដងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងផ្លូវបេតុងខាងលិចផ្សារដេប៉ូ ចាប់ពីចំណុចផ្លូវម៉ៅសេទុង (១២៨ ) ដល់ចំណុចផ្លូវ ១៥០ ខាងក្រោយផ្សារ ស្ថិតក្នុងសង្កាត់ផ្សារដេប៉ូ ១ ខណ្ឌទួលគោក ដែលចំណុចផ្លូវនេះ រៀងរាល់ពេលភ្លៀងធ្លាក់មកម្តងៗ តែងតែទឹកដក់លើផ្លូវ ជាហេតុនាំឲ្យមានផលលំបាកដល់ប្រជាពលរដ្ឋ ដោយសារទឹកហូរលិចចូលផ្ទះ ពិបាកទាំងការរស់នៅ និងធ្វើដំណើរ។

លោកស្រី ពៅ ស្រមោច ចៅសង្កាត់ផ្សារដេប៉ូទី ០១ លើកឡើងថា អាជ្ញាធរសង្កាត់ផ្សារដេប៉ូ ១ បានចុះធ្វើការផ្លាស់ប្ដូរប្រព័ន្ធលូចាស់មកដាក់លូថ្មី ដែលមានកម្រាស់ ៦ តឹក ប្រវែង រួមទាំងសងខាងផ្លូវ ៤៧ ម៉ែត្រ។ ចំពោះការផ្លាស់ប្ដូរនេះដែរ ជួយដោះស្រាយបញ្ហាលិចទឹកនៅក្នុងតំបន់ ដែលផ្តល់ភាពងាយស្រួលរំដោះទឹកភ្លៀងនារដូវវស្សានេះ មិនឲ្យមានការជនលិចលើផ្លូវ ឬ ហូរចូលផ្ទះប្រជាពលរដ្ឋ។

ជាមួយនេះដែរ អាជ្ញាធរ សូមមេត្តាយោគយល់ចំពោះការដ្ឋានកំពុងសាងសង់ និងដាក់លូ ដែលមានការប៉ះពាល់ដល់ប្រជាពលរដ្ឋ។ បន្ថែមនោះ អាជ្ញាធរ ក៏បានសំណូមពរដល់ប្រជាពលរដ្ឋ ត្រូវវេចខ្ចប់សំរាមដាក់ឲ្យបានត្រឹមត្រូវ ជៀសវាងពេលមានភ្លៀងធ្លាក់ សំរាមហូរចូលក្នុងប្រព័ន្ធលូ បង្កការកកស្ទះផ្លូវទឹក៕

អត្ថបទ ៖ ម៉េង , រដ្ឋា