កសិករឃុំព្រែកនរិន្ទ កំពុងប្រមូលផលម្ទេសដែលតម្លៃទីផ្សារបានថ្លៃគួរសម

ប្រជាពលរដ្ឋរស់នៅក្នុងស្រុកឯកភ្នំ និងស្ថិតនៅតាមបណ្ដោយដងស្ទឹងសង្កែភាគច្រើនតែងតែប្រកបមុខរបរកសិកម្ម គឺដាំម្ទេសដៃនាងដែលប្រភេទម្ទេសនេះ គឺអាចប្រមូលផលក្នុងមួយឆ្នាំបានច្រើនដងប៉ុន្តែតម្លៃវិញ គឺអាចឡើងចុះទៅតាមទីផ្សារ។

នៅឆ្នាំនេះដោយសារអាកាសធាតុក្តៅ ដូច្នេះម្ទេសដៃនាងអាចធ្លាក់ទិន្នផលប៉ុន្តែតម្លៃក៏បានគួរសមដែរ។ ខណៈដៃកំពុងបេះម្ទេស ជាមួយកម្មករជាច្រើនទៀត អ្នកស្រី អៀន ពេញ ដែលជាម្ចាស់ចម្ការនៅភូមិព្រែកត្រប់ ឃុំព្រែកនរិន្ទ បានរៀបរាប់ថា ការប្រើប្រាស់ដើមទុនលើការដាំម្ទេសក្នុងផ្ទៃដីទំហំ ៣រ៉ៃ អ្នកស្រីត្រូវប្រើប្រាស់ដើមទុនអស់ប្រមាណ ៤ លានរៀល។

បើគិតចាប់តាំងពីដាំរហូតប្រមូលផល អ្នកស្រីបានលើកឡើងថា ម្ទេសអាចប្រឈមនឹងដង្កូវស៊ី ឬ ក្រា ជាដើម ហើយនេះជាលើកទីមួយហើយដែលអ្នកស្រីសាកល្បងដាំម្ទេស ហើយក៏ប៉ះចំគ្រោះរាំងស្ងួត និងក្តៅថែមទៀត ដោយទើបតែមានភ្លៀងធ្លាក់នៅខែឧសភានេះ លុះការប្រមូលផលដំបូងបានតម្លៃត្រឹមតែជាង ២ពាន់រៀល តែប៉ុណ្ណោះ ក្នុងមួយគីឡូក្រាម។ហើយនៅពេលប្រមូលផលលើកទីពីរនេះឮថាតម្លៃអាចឡើងជាង ៤ពាន់រៀលក្នុងមួយឡូក្រាម ដូច្នេះអាចបានចំណេញខ្លះដែរ តែបើបានមួយគីឡូក្រាមចាប់ពី ៥.០០០ រៀលឡើងទើបម្ចាស់ចម្ការអាចចំណេញ និងទប់ទល់ថ្លៃកម្មករបាន ព្រោះកម្មករដែលបេះម្ទេសគឺទទួលបានជាង ១ ពាន់រៀលក្នុងមួយគីឡូក្រាម។

អ្នកស្រីក៏បានសំណូមពរទៅបណ្ដាឈ្មួញធ្វើយ៉ាងណាកុំទម្លាក់តម្លៃខ្លាំងពេកបើមិនដូច្នោះកសិករមិនអាចបន្តដាំម្ទេសដៃនាងនេះតទៅទៀតបានឡើយ៕

អត្ថបទ៖ សោ និយមរ័ត្ន