ឧបនាយករដ្ឋមន្ត្រី ហ៊ុន ម៉ានី អញ្ជើញគោរពវិញ្ញាណក្ខន្ធអគ្គលេខាធិការគណៈកម្មាធិការ​មជ្ឈឹមបក្សកុម្មុយ​នីស្តវៀតណាម

ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាអនុប្រធានក្រុមប្រឹក្សាជាតិ​រណសិរ្សសាមគ្គី អភិ​វឌ្ឍន៍មាតុភូមិកម្ពុជា បានអញ្ជើញគោរពវិញ្ញាណក្ខន្ធ លោក ង្វៀន ហ៊្វូចុង អគ្គលេខាធិការ គណៈកម្មាធិការ​មជ្ឈិមបក្សកុម្មុយនីស្ដ វៀតណាម ដែលបានទទួលមរណ​ភាពដោយជរាពាធ ក្នុងជន្មាយុ៨០ឆ្នាំ  កាលពីថ្ងៃទី១៩ ខែកក្កដា ឆ្នាំ២០២៤។ ពិធីគោរពវិញ្ញាណក្ខន្ធ ធ្វើឡើងនៅស្ថានទូតវៀតណាម ប្រចាំកម្ពុជានៅព្រឹកថ្ងៃសុក្រ ទី​២៦ ខែ​កក្កដា ឆ្នាំ២០២៤នេះ។

ឯកឧត្តម ហ៊ុន ម៉ានី និងគណៈប្រតិភូ បាន​សង្រួមចិត្តគោរពវិញ្ញាណក្ខន្ធ លោក ង្វៀន ហ៊្វូចុង និងបានរៀបចំកូរោនផ្កាចូលរួមរំលែកទុក្ខដ៏ក្រៀមក្រំ​ពីក្រុម​ប្រឹក្សាជាតិ​រណសិរ្សសាមគ្គី អភិ​វឌ្ឍន៍មាតុភូមិ​កម្ពុជា ព្រម​ទាំងបានអញ្ជើញអុជធូបឧទ្ទិសដល់វិញ្ញាណក្ខន្ធ អគ្គលេខាធិការ លោក ង្វៀន ហ៊្វូចុង សូមបានទៅកាន់សុគតិភព​កុំបីឃ្លៀតឃ្លាតឡើយ។

តាមរយៈសាររំលែកមរណទុក្ខដ៏ក្រៀមក្រំបំផុត, ឯកឧត្តមឧបនាយករដ្ឋមន្ត្រី ក្នុងនាមក្រុមប្រឹក្សាជាតិ​រណសិរ្សសាមគ្គី អភិ​វឌ្ឍន៍មាតុភូមិកម្ពុជា និងឯកឧត្តមផ្ទាល់ ពិតជាមានសេចក្ដីតក់ស្លុត និងសោកស្ដាយ​ឥតឧបមា​ចំពោះមរណភាពរបស់ លោក ង្វៀន ហ៊្វូចុង អគ្គលេខាធិការ គណៈកម្មាធិការ​មជ្ឈិមបក្សកុម្មុយនីស្ដ វៀតណាម។ មរណភាពរបស់ លោក ង្វៀន ហ៊្វូចុង គឺជាការបាត់បង់យ៉ាងធំធេងនូវថ្នាក់ដឹកនាំគំរូដ៏ល្អ របស់ប្រទេសវៀតណាម​ដែលបានដឹកនាំអភិវឌ្ឍន៍ប្រទេសជាតិឱ្យបន្តរីកចម្រើនឥតឈប់ឈរ និង ជាឥស្សរជនមួយរូបដែលបានចូលរួម​ពង្រឹង និងពង្រីកនូវចំណងមិត្តភាព សាមគ្គីភាព និងសហប្រតិបត្តិការល្អ រវាងប្រទេសកម្ពុជា និងវៀតណាម ឱ្យកាន់តែរឹងមាំ និងជិតស្និទថែមទៀត៕