ពាក់កណ្តាលឆ្នាំ២០២៤ ច្រកចេញចូលតែមួយស្រុកស្រែអំបិល បានផ្តល់សេវាសាធារណៈជូនពលរដ្ឋជាង ៤ម៉ឺនសេវា   

មន្រ្តីប្រចាំនៅការិយាល័យច្រកចេញចូលតែមួយស្រុកស្រែអំបិល បានបង្ហាញថា ៦ខែ ឆ្នាំ២០២៤ ខ្លួនបានទទួល និងផ្តល់សេវាសរុបប្រមាណ ៤៣ ០៥៦សេវា ជូនប្រជាពលរដ្ឋ បើធៀបនឹងរយៈពេលដូចគ្នាកើនឡើងច្រើន។

ពាក់កណ្តាលឆ្នាំ២០២៤នេះ តម្រូវការមកស្នើសុំសេវារដ្ឋបាលសាធារណៈនៅច្រកចេញចូលតែមួយស្រុកស្រែអំបិលមានចំនួន ១០ ៤១៧នាក់ ស្រីចំនួន ៤ ៧៩២នាក់ ស្មើនឹង ៤៣០៥៦ សេវា ឯណោះ។ នេះបើតាមការបញ្ជាក់របស់លោកស្រី យ៉ុម យូរី ប្រធានការិយាល័យច្រកចេញចូលតែមួយស្រុកស្រែអំបិល កាលពីថ្ងៃទី៩ ខែសីហា ឆ្នាំ២០២៤។

លោកស្រី យ៉ុម យូរី បានឱ្យដឹងថា ប្រភេទសេវាសាធារណៈដែលប្រជាពលរដ្ឋមកដាក់ពាក្យស្នើសុំ ភាគច្រើនជាសេវាបញ្ជាក់នីត្យានុកូលដ្ឋាន និងអត្រានុកូលដ្ឋាន ខណៈពួកគាត់ត្រូវការដើម្បីយកទៅភ្ជាប់ជាមួយនឹងឯកសារពាក់ព័ន្ធសម្រាប់ការចុះបញ្ជីដីធ្លីមានលក្ខណៈជាប្រព័ន្ធ។ លោកស្រីថា រាល់ការផ្តល់សេវាសាធារណ គឺឈរលើគោលការណ៍កំណត់របស់រាជរដ្ឋាភិបាល និងក្រសួងពាក់ព័ន្ធ ដោយបំពេញការងារប្រកបដោយតម្លាភាព លឿនឆាប់រហ័ស និងគ្មានយកកម្រៃសេវាខាងក្រៅនោះឡើយ។ លោកស្រី ក៏បានអំពាវនាវដល់គ្រប់ប្រជាពលរដ្ឋទាំងអស់ក្នុងមូលដ្ឋាន មកទទួលសេវារដ្ឋបាលសាធារណៈដោយខ្លួនឯង ចៀសវាងពឹងពាក់អ្នកដ៏ទៃដែលគេអាចឆ្លៀតឱកាសរកសេវាក្រៅប្រព័ន្ធធ្វើឱ្យខាតបង់ថវិកា និងពេលវេលា។

អ្នកស្រី លឹម គឹមហុង ពលរដ្ឋរស់នៅឃុំស្រែអំបិល និងលោក ហៃ គយ ជាពលរដ្ឋរស់នៅឃុំដងពែង ស្រុកស្រែអំបិល បង្ហាញក្តីរីករាយនឹងការមកស្នើសុំសេវាបញ្ជាក់អត្តសញ្ញាណបណ្ណ សៀវភៅស្នាក់នៅ និងសំបុត្របញ្ជាក់កំណើត នៅការិយាល័យច្រកចេញចូលតែមួយស្រុក។

តំណាងពលរដ្ឋ អះអាងថា ក្រុមមន្រ្តីបម្រើការងារ មានភាពរាក់ទាក់ល្អ និងផ្តល់សេវាបានឆាប់រហ័សប្រកបដោយទំនុកចិត្តខ្ពស់ មិនចំណាយពេលវេលាច្រើន គ្មានការទាមលុយកាក់ ពិសេសការកំណត់ពេលវេលាបានច្បាស់លាស់ ក្នុងការមកទទួលយកឯកសារត្រឡប់ទៅផ្ទះវិញ។ ជាមួយគ្នានោះ ពលរដ្ឋក៏បានអរគុណដល់ លោក ជា ច័ន្ទកញ្ញា អភិបាលស្រុកស្រែអំបិល និងក្រុមមន្រ្តីពាក់ព័ន្ធដែលប្រឹងប្រែងបំពេញការងារផ្តល់សេវាសាធារណៈប្រកបដោយក្រមសីលធម៌វិជ្ជាជីវៈ និងមានទំនុកចិត្តពីប្រជាពលរដ្ឋ។

យោងតាមរបាយការណ៍លទ្ធផលការងារ ៦ខែ ឆ្នាំ២០២៤ នេះ ការិយាល័យច្រកចេញចូលតែមួយស្រុកស្រែអំបិល បានទទួលចំណូលចូលរដ្ឋពីការផ្តល់សេវាសរុប ១៩លានរៀល។ ក្នុងនោះ មានការធ្វើនីត្យានុកូលកម្ម អត្រានុកូលដ្ឋាន សុខាភិបាល វប្បធម៌ សាធារណការ សំណង់ និងបណ្ណព្រំដែនជាដើម៕

អត្តបទៈ សិរីវឌ្ឍនៈ