សត្វមមាចត្នោតរាតត្បាត​ មន្រ្តីជំនាញ​អះអាង ​បើ​ទប់ស្កាត់​មិន​ទាន់ពេល​ អាច​បំផ្លាញ​ស្រូវទាំង​ស្រុង

ប្រជាកសិករកំពុងព្រួយបារម្មលើផលដំណាំស្រូវ និង​ផលប៉ះពាល់ទៅលើទិន្នផលអាច​ប្រឈម​ការ​ខូចខាត បើសិនជាវត្តមានសត្វ “មមាចត្នោត” កាន់តែរីករាលដាលច្រើននៅលើដើមស្រូវដោយគ្មានការទប់ស្កាត់ទេនោះ។

ប្រជាកសិករបានឲ្យដឹងប្រហាក់ប្រហែលគ្នាថា ករណីនេះបានកើតឡើងចាប់តាំងពីចុងខែកក្កដា មកម៉្លេះ ហើយក្រោយពីមានកើតឡើងពួកគាត់ក៏​បានរាយការដល់អាជ្ញាធរមូលដ្ឋានផងដែរ។

ចំពោះការរាតត្បាតសត្វល្អិតនេះ បានកើតឡើងលើស្រូវកសិករចំនួន ៤ ឃុំ ក្នុងនោះមាន ឃុំបវេល ឃីព្រៃខ្ពស់ ឃុំក្តុលតាហែន និងឃុំល្វា នៃស្រុកបវេល។

បើតាមមន្ត្រីនៃមន្ទីរកសិកម្មខេត្តបាត់ដំបង​បានឲ្យដឹងថា ករណីសត្វ “មមាចត្នោត” រាតត្បាតលើផលដំណាំស្រូវកសិករ បានកើតឡើងលើស្រុកចំនួន២ គឺស្រុកបវេល និងស្រុកឯកភ្នំ ក្នុងនោះ ស្រុកបវេលបានប៉ះពាល់ដល់ដំណាំស្រូវរបស់ប្រជាកសិករលើឃុំចំនួន៤ លើផលដំណាំស្រូវចំនួន ៦៥ហិកតា។ ចំណែកស្រុកឯកភ្នំ លើឃុំចំនួនមួយគឺឃុំពាមឯក និងរងផលប៉ះពាល់លើភូមិនចំនួន៣ រួមមាន ភូមិគងទុំ ភូមិករហាល និងភូមិចុងឆ្តោរ (ចំណុចអាងភាស) បានប៉ះពាល់លើដំណាំស្រូវចំនួន ១១១ ហិកតា។

ប្រភពដដែលបានបន្តថា តាមការចុះពិនិត្យរកឃើញថា ក្នុង១ហិចតា សត្វប្រភេទខាងលើនេះបានសុីជញ្ជក់ស្រូវក្នុង ដំណាក់កាលផេីមចេញផ្កាចន្លោះ ពី១០-២៥ ម៉ែត្រការ៉េ (ប្រភេទស្រូវស្រង៉ែ និងOM 5451 និងសែនក្រអូប) ។

លោក ហេង សិទ្ធ មន្ត្រីកសិកម្មខេត្តបាត់ដំបង​បានឲ្យដឹងដែរថា ក្រោយពីបានទទួលព័ត៌មានពីមន្ត្រីមូលដ្ឋាន ថ្នាក់ដឹកនាំមន្ទីរ និងមន្ត្រី ជំនាញ រួមជាមួយថ្នាក់ដឹកនាំការិយាល័យកសិកម្មធនធានធម្មជាតិ និងបរិស្ថានស្រុកឯកភ្នំ បានចុះធ្វេីការអន្តរាគមន៍ កាលពីព្រឹកថ្ងៃទី១៦ ខែសីហា ឆ្នាំ២០២៤ ដោយបានធ្វេីការណែនាំបច្ចេកទេសលេីការគ្រប់គ្រងមមាចត្នោត ដល់កសិករតាមរយះការការបញ្ចូលទឹកក្នុងស្រែ និងប្រេីប្រាស់វិធានការទប់ស្កាតកុំអោយរីករាលដាល ដោយប្រើប្រាស់វិធានការគីមីបាញ់ទប់ស្កាត់ផ្នែកស្រែនៅខាងលេី នូវប្រភេទថ្នាំកម្ចាត់មមាចត្នោត គិតត្រឹមថ្ងៃទី១៦ ខែសីហានេះ ស្ថានភាពនៃការរាតត្បាត ត្រូវបានថយចុះ។

បើទោះបីយ៉ាងនេះក្តី មន្ទីរ​នៅតែ​បន្តសហការជាមួយមន្ត្រីជំនាញ ការិយាល័យកសិកម្មធនធានធម្មជាតិ និងបរិស្ថានស្រុកទាំង២ រួមជាមួយ អាជ្ញាធរមូលដ្ឋាន ដេីម្បីធ្វើការតាមដានឃ្លាំមេីលនូវវត្តមានសមាសភាពចង្រៃ (មមាចត្នោត) ជាប្រចាំរហូតដល់ការគ្រប់គ្រងបានទាំងស្រុង និងបន្តធ្វើការផ្សព្វផ្សាយ ផ្តល់សេវាបច្ចេកទេស គ្រប់គ្រងលេីសមាសភាពចង្រៃ​លេីដំណាំស្រូវ ដំណាំកសិកម្ម ដល់បងប្អូនកសិករអោយកាន់តែទូលំទូលាយបន្ថែមទៀតផងដែរ។

លោក ហេង សិទ្ធ បញ្ជាក់ថា សត្វប្រភេទនេះមិនបង្កឲ្យខូចខាតស្រូវនោះទេ តែធ្វើឲ្យដើមស្រូវខ្សោយ​និង​ថយចុះទិន្នផល ខ្លះ ប៉ុន្តែបើសិនជាកសិករមិនឆាប់ប្រើថ្នាំបាញ់បង្ក្រាបវាទេ នោះវាកើនឡើងពាសពេញដើមស្រូវ ហើយស្រូវនឹងងាប់ ខូចខាតទាំងស្រុងតែម្តង៕

អត្ថបទ៖ សៅ សារិទ្ធ