លោកជំទាវ ហ៊ុន ម៉ាណា និងឯកឧត្តម ឌី វិជ្ជា ព្រមទាំងកូនៗ បរិច្ចាគថវិកា១៧០លានរៀល ចូលមូលធិនិកសាងផ្លូវក្រវាត់ព្រំដែន

លោកជំទាវ ហ៊ុន ម៉ាណា និងឯកឧត្តមឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ ព្រមទាំងកូនៗ​ បរិច្ចាគថវិកាសរុប ១៧០លានរៀល ចូលមូលនិធិកសាងហេដ្ឋារចនាសម្ព័ន្ធតាមព្រំដែន ដោយផ្ដោតលើការកសាងផ្លូវក្រវាត់ព្រំដែនកម្ពុជា តបតាមការប្រកាសរបស់សម្តេចធិបតីនាយករដ្ឋមន្រ្តី។  

កាលពីថ្ងៃទី២២ ខែសីហា សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានប្រកាសពីការផ្ដួចផ្ដើមគំនិតក្នុងការបង្កើតមូលនិធិកសាងហេដ្ឋារចនាសម្ព័ន្ធនៅតាមបណ្ដោយព្រំដែនកម្ពុជា ដើម្បីលើកទឹកចិត្តឱ្យប្រជាពលរដ្ឋចូលរួមដោយផ្ទាល់ទាំងអស់គ្នា។ សម្ដេចធិបតី ថា មូលនិធិនេះ ធ្វើឡើងក្នុងគោលដៅពីរ ពោលគឺដើម្បីកៀរគរថវិកាបន្ថែម និងដើម្បីផ្ដល់ឱកាសឱ្យប្រជាពលរដ្ឋបានចូលរួមដោយផ្ទាល់ជាមួយរាជរដ្ឋាភិបាល។ សម្ដេចធិបតី ហ៊ុន ម៉ាណែត បានអំពាវនាវដល់ប្រជាពលរដ្ឋទាំងអស់ ដើម្បីចូលរួមក្នុងបុព្វហេតុនេះ សំដៅរួមគ្នាកសាងផ្លូវក្រវាត់ព្រំដែន និងរួមគ្នាក្នុងការកសាងការពារបូរណភាពទឹកដីរបស់កម្ពុជា។

លើកឡើងនៅលើបណ្ដាញទំនាក់ទំនងសង្គមហ្វេសប៊ុក​ នាថ្ងៃទី២៧ ខែសីហា ឆ្នាំ២០២៤នេះ លោកជំទាវ ហ៊ុន ម៉ាណា បានសរសេរថា «តបតាមការប្រកាសរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលសម្រេចបង្កើតមូលនិធិកសាងហេដ្ឋារចនាសម្ព័ន្ធតាមព្រំដែន នាងខ្ញុំ និងក្រុមគ្រួសារ សូមចូលរួមក្នុង «មូលនិធិកសាងហេដ្ឋារចនាសម្ព័ន្ធតាមព្រំដែន» ជាមួយរាជរដ្ឋាភិបាលកម្ពុជា ចំនួន១០០លានរៀល, កញ្ញា សែន ទេពធីតា ចំនួន៣០ លានរៀល, លោក ឌី សែនវិចិត្រ ចំនួន ២០លានរៀល, កញ្ញា ឌី សែនម៉ានីតា ចំនួន១០លានរៀល, កញ្ញា ឌី សែនម៉ានីណា ចំនួន១០លានរៀល»៕