សម្ដេចធិបតី៖ មូលនិធិកសាងផ្លូវតាមព្រំដែននៅតែបន្តទទួលការចូលរួមពីសប្បុរសជនគ្រប់ទិសទី

សម្តេចធិបតី ថ្លែងអំណរព្រះរាជគុណ ព្រះគុណ និងអរគុណចំពោះការចូលរួមបរិច្ចាគមូលនិធិកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន។ ទន្ទឹមនឹងការអរគុណ សម្ដេចធិបតីបានបញ្ជាក់ពីការបន្តទទួលការចូលរួមពីសប្បុរសជនគ្រប់ទិសទីក្នុងមូលនិធិ ទោះតិចក្ដី ច្រើនក្ដី។

សំណេរនៅលើបណ្ដាញសង្គម នៅថ្ងៃទី២ ខែកញ្ញា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្ត្រី បានលើកឡើងថា៖ «កាលពីថ្ងៃទី២២ ខែសីហា ឆ្នាំ២០២៤កន្លងទៅ ទូលព្រះបង្គំ ខ្ញុំព្រះករុណា ខ្ញុំបានប្រកាសបង្កើត “មូលនិធិកសាងហេដ្ឋារចនាសម្ព័ន្ធតាមព្រំដែន” ដោយផ្តោតលើការកសាងផ្លូវក្រវាត់ព្រំដែន ហើយដែលចាប់ពីថ្ងៃទី២៦ ខែសីហា ឆ្នាំ២០២៤មក ក្រុមការងារមូលនិធិបានចាប់ផ្តើមទទួលការបរិច្ចាគថវិកាដោយស្ម័គ្រចិត្តពីជនរួមជាតិខ្មែរគ្រប់ទិសទីទាំងក្នុង និងក្រៅប្រទេស»។

តាមរយៈចលនាជាតិនេះ សម្ដេចធិបតី បានសម្ដែងនូវក្ដីមោទនភាពក្រៃលែង ដែលមូលនិធិមួយនេះបានទទួលការគាំទ្រយ៉ាងផុលផុសពីសំណាក់ព្រះមហាក្សត្រ ព្រះមហាក្សត្រី ឥស្សរជនថ្នាក់ដឹកនាំ ព្រះសង្ឃ មន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ សិស្សនិស្សិត កម្មករ និយោជិត អាជីវករ កសិករ និងប្រជាពលរដ្ឋខ្មែរគ្រប់មជ្ឈដ្ឋានទាំងក្នុង និងក្រៅប្រទេស ជាពិសេសពលរដ្ឋជាច្រើននៅតាមមូលដ្ឋានភូមិស្រុក តាមរយៈការសស្រាក់សស្រាំចូលរួមបរិច្ចាគថវិកា តិច ឬច្រើនក្ដីទៅតាមលទ្ធភាព និងប្រកបដោយស្នាមញញឹមសប្បាយរីករាយក្នុងធ្លុងមហាសាមគ្គីជាតិ និងស្មារតីខ្មែរតែមួយ ។

ក្នុងនាមរាជរដ្ឋាភិបាល សម្ដេចធិបតី បានថ្លែងអំណរព្រះគុណ និងអរគុណប្រគេនថ្វាយចំពោះព្រះសង្ឃ ព្រះមហាក្សត្រ ព្រះមហាក្សត្រី សម្តេច លោក លោកស្រី និងប្រជាពលរដ្ឋទាំងអស់ចំពោះការចូលរួមចំណែកដ៏ថ្លៃថ្លានេះ ដែលនេះគឺជាវិភាគទានដ៏មានតម្លៃបំផុត និងមិនអាចកាត់ថ្លៃបានឡើយ។ សម្ដេចធិបតី ថា នេះក៏ជាការឆ្លុះបញ្ចាំងអំពីទឹកចិត្តមនសិការស្នេហាជាតិមាតុភូមិរបស់ជនរួមជាតិខ្មែរពិតប្រាកដ ដែលតែងតែត្រៀមខ្លួនជានិច្ចក្នុងការបូជាលះបង់គ្រប់បែបយ៉ាងនៅក្នុងមហាចលនាជាតិដើម្បីបុព្វហេតុកសាង ការពារ និងអភិវឌ្ឍមាតុភូមិកម្ពុជា ដោយឈរលើមូលដ្ឋាន និងស្មារតីនៃខឿនការពារជាតិរបស់ប្រជាជននៅគ្រប់កាលៈទេសៈ។

សម្ដេច​ បញ្ជាក់បន្ថែមថា ក្រុមការងារមូលនិធិ បាននិងកំពុងខិតខំរៀបចំលិខិតថ្លែងអំណរគុណជូនដល់ប្រជាពលរដ្ឋជាសប្បុរសជនជាបន្តបន្ទាប់យ៉ាងសស្រាក់សស្រាំ ហើយទន្ទឹមគ្នានេះ សម្ដេច ក៏បានបន្តអំពាវនាវដល់ជនរួមជាតិបន្តចូលរួមឱ្យបានកាន់តែច្រើនមូលមីបន្ថែមទៀត ហើយក្រុមការងារមូលនិធិនឹងបន្តទទួលស្វាគមន៍ដោយក្តីរីករាយ៕