រដ្ឋាភិបាល៖ ការផ្សាយថា បង្គោលព្រំដែននៅច្រកភ្នំដិនបោះចូលដីខ្មែរ ជាព័ត៌មានក្លែងក្លាយ

គណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ បានចេញមកច្រានចោលការផ្សាយថា បង្គោលព្រំដែននៅច្រកភ្នំដិនបោះចូលដីខ្មែរ។ គណៈកម្មាធិការជាតិ អះអាងថា នេះគឺជាព័ត៌មានក្លែងក្លាយ។

ការចេញមកច្រានចោលនេះ បន្ទាប់ពីមន្ត្រីអតីតបក្សប្រឆាំងមួយរូប គឺលោក អ៊ុំ សំអាន បានសរសេរនៅបណ្ដាញសង្គមហ្វេសប៊ុកថា បង្គោលព្រំដែនលេខ២៧៥ នៅច្រកភ្នំដិនខេត្តតាកែវបានបោះចូលដីខ្មែរ១២៧០ម៉ែត្រ ដោយគិតពីព្រែកវិញតេ នៅច្រកភ្នំដិន ខេត្តតាកែវ។

លេខាធិការដ្ឋាននៃគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ បានបញ្ជាក់ដូច្នេះថា៖ «ការបង្ហោះផ្សាយអំពីករណីបង្គោលព្រំដែនលេខ២៧៥ នៅច្រកភ្នំដិនខេត្តតាកែវ ថា បានបោះចូលដីខ្មែរ១២៧០ម៉ែត្រ គឺជាព័ត៌មានក្លែងក្លាយ»។

លេខាធិការដ្ឋាននៃគណៈកម្មាធិការជាតិសម្របសម្រួលកិច្ចការព័ត៌មាន និងសាធារណមតិ បានអំពាវនាវប្រជាពលរដ្ឋកុំមានការយល់ច្រឡំ និងបញ្ឈប់ការបន្តចែកចាយនូវព័ត៌មានក្លែងក្លាយទាំងនេះទៀត៕