ព័ត៌មានជាតិ

កម្ពុជាមានខ្សែព្រំដែនដើរតាមផ្លូវទឹកប្រវែងជាង ៦០០ គីឡូម៉ែត្រ ជាមួយប្រទេសវៀតណាម

បានផុស

២ years មុន

នៅ

ថ្ងៃចន្ទ ៩ កញ្ញា ២០២៤

ដោយ

បើតាមមន្ត្រីរដ្ឋលេខាធិការដ្ឋានកិច្ចការព្រំដែនបានបញ្ជាក់ថា កម្ពុជាមានខ្សែព្រំដែនដើរតាមផ្លូវទឹកប្រវែងជាង ៦០០ គីឡូម៉ែត្រ ជាមួយប្រទេសវៀតណាម លើប្រវែងខ្សែព្រំដែនសរុបជាង ១ ២០០ គីឡូម៉ែត្រ។

លោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន បានគូសបញ្ជាក់នៅក្នុងឱកាសធ្វើបទបង្ហាញស្តីពី “របៀបរបបនៃដំណើរទស្សនកិច្ច និងកម្មវិធីទស្សនកិច្ចនៅខេត្តទិសឦសាន” នារសៀលថ្ងៃទី០៦ ខែកញ្ញា ឆ្នាំ២០២៤ នៅសាលប្រជុំក្រសួងរៀបចំដែនដី នគរូបនីយកម្ម និងសំណង់រាជធានីភ្នំពេញថា ខ្សែព្រំដែនកម្ពុជា-វៀតណាម មានប្រវែងសរុបប្រមាណ ១ ២៧០ គីឡូម៉ែត្រ ដែលក្នុងនោះខ្សែព្រំដែនដើរតាមដីគោកមានប្រវែងប្រមាណ ៦៦១ គីឡូម៉ែត្រ និងខ្សែព្រំដែនដើរតាមផ្លូវទឹកមានប្រវែងប្រមាណ ៦០៩ គីឡូម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្ពុជាមានខេត្តចំនួន ៩ ដែលស្ថិតនៅជាប់តាមបណ្ដោយព្រំដែន កម្ពុជា-វៀតណាមរួមមាន៖ ខេត្តរតនៈគិរី ខេត្តមណ្ឌលគិរី ខេត្តក្រចេះ ខេត្តត្បូងឃ្មុំ ខេត្តស្វាយរៀង ខេត្តព្រៃវែង ខេត្តកណ្តាល ខេត្តតាកែវ និងខេត្តកំពត។

ពាក់ព័ន្ធលទ្ធផលសម្រេចបានលើការងារខណ្ឌសីមា និងបោះបង្គោលព្រំដែនគោក កម្ពុជា-វៀតណាម មន្រ្តីរដ្ឋលេខាធិការដ្ឋានកិច្ចការព្រំដែនបញ្ជាក់ថា ចាប់ពីឆ្នាំ២០០៦-២០១៩ ភាគីទាំងពីរបានចាប់ផ្ដើមចុះអនុវត្តលើដីជាក់ស្ដែង និងធ្វើការខណ្ឌសីមាបានប្រវែង ១ ០៤៥ គីឡូម៉ែត្រ (ដែលក្នុងនោះខ្សែព្រំដែនដើរតាមដីគោកសម្រេចបានប្រវែង ៤៨៨ គីឡូម៉ែត្រ និងខ្សែព្រំដែនដើរតាមផ្លូវទឹកសម្រេចបានប្រវែង ៥៥៧ គីឡូម៉ែត្រ) ដែលស្មើនឹង ៨៤% នៃប្រវែងខ្សែព្រំដែនសរុបប្រមាណ ១២៧០ គីឡូម៉ែត្រ។

ជាមួយគ្នានេះ ភាគីទាំងពីរក៏បានឯកភាពបោះបង្គោលព្រំដែនលើដីជាក់ស្តែងបានចំនួន ២ ០៤៧ បង្គោល (ក្នុងនោះមានបង្គោលព្រំដែនមេសរុបចំនួន ៣១៥ បង្គោល, បង្គោលព្រំដែនបំពេញបន្ថែមចំនួន ១៥១១ បង្គោល និងបង្គោលតម្រុយព្រំដែនចំនួន ២២១ បង្គោល)។

ក្រៅពីការសម្រេចបានការងារខណ្ឌសីមា និងបោះបង្គោលព្រំដែន រាជរដ្ឋាភិបាលក៏បានស្ថាបនាផ្លូវក្រវាត់ព្រំដែនបានប្រវែងជាង ៦៨៥,៣១៤ គីឡូម៉ែត្រ។

លោក ឡាំ ជា ក៏បញ្ជាក់ពាក់ព័ន្ធមូលដ្ឋានក្នុងការងារខណ្ឌសីមា និងបោះបង្គោលព្រំដែនគោករវាងកម្ពុជា-វៀតណាម ត្រូវបានអនុវត្តដោយផ្អែកលើគោលការណ៍ចំនួន ៣ រួមមាន៖

១. គោលការណ៍ខ្សែព្រំដែនមិនកែប្រែ ដែលបន្សល់ទុកដោយអាណានិគម (Uti Possidetis) ដូចមានលើផែនទី SGI ខ្នាត ១/១០០.០០០ បោះពុម្ពដោយក្រុមភូមិសាស្ត្រឥណ្ឌូចិន សន្ធិសញ្ញា អនុសញ្ញា និងសេចក្តីសម្រេចរបស់អគ្គទេសាភិបាលឥណ្ឌូចិន
២. គោលការណ៍ច្បាប់អន្តរជាតិ និងឧត្តមានុវត្តន៍អន្តរជាតិលើវិស័យកំណត់ព្រំដែន
៣. ការរស់នៅកាន់កាប់ជាក់ស្ដែងរបស់ប្រជាជនជាច្រើនជំនាន់

បន្តចុចអាន៖ ប្រមុខដឹកនាំកម្ពុជា ឆ្លើយតបប្រតិកម្មមហាជនជុំវិញ ការបោះបង្គោលព្រំដែននៅជ្រៃធំទឹកដីកម្ពុជា