កម្ពុជានឹងរៀបចំរត់ម៉ារ៉ាតុងដើម្បីសប្បុរសធម៌ ក្នុងឱកាសទិវាសិទ្ធិមនុស្សអន្តរជាតិ ១០ធ្នូ

ដើម្បីអបអរសាទរទិវា​សិទ្ធិមនុស្ស​អន្តរជាតិ ១០ធ្នូ លើកទី៧៦ គណៈកម្មាធិការសិទ្ធិមនុស្សកម្ពុជា នឹងរៀបចំកម្មវិធី រត់​ពាក់កណ្ដាលម៉ារ៉ាតុងដើម្បីសប្បុរសធម៌ នៅក្រុងបាត់ដំបង ខេត្តបាត់ដំបង ថ្ងៃទី ០៨ ខែធ្នូ ឆ្នាំ ២០២៤។

សេចក្តីជូនដំណឹងរបស់គណៈកម្មាធិការសិទ្ធិមនុស្សកម្ពុជា បានឱ្យដឹងថា ព្រឹត្តិការណ៍ដ៏ពិសេសនេះធ្វើឡើងដើម្បីរៃអង្គាសថវិកាសម្រាប់អ្នកដែលត្រូវការជំនួយ។ ប្រាក់ចំណូលទាំងអស់នឹងគាំទ្រដល់បុព្វហេតុសំខាន់ៗចំនួនបី រួមមានផ្តល់ជូនទៅ អង្គការកុមារកំព្រា មជ្ឈមណ្ឌលថែទាំមនុស្សចាស់ និងមន្ទីរពេទ្យគន្ធបុប្ផា។

គណៈកម្មាធិការសិទ្ធិមនុស្សកម្ពុជា បានបញ្ជាក់ថា ការចូលរួមរបស់អ្នកមិនត្រឹមតែអាចសាកល្បងនឹងការតស៊ូរបស់អ្នកប៉ុណ្ណោះទេ ប៉ុន្តែថែមទាំងផ្ដល់ពន្លឺដល់ជីវិតរបស់កុមារ មនុស្សចាស់ និងអ្នកជំងឺដែលត្រូវការការថែទាំវេជ្ជសាស្រ្តផងដែរ។

គណៈកម្មាធិការសិទ្ធិមនុស្សកម្ពុជា បន្តថា៖« រួមគ្នា យើងអាចបង្កើតក្ដីសង្ឃឹមដោយការផ្តល់នូវការគាំទ្រ និងការយកចិត្តទុកដាក់ដល់ពួកគាត់។ ចុះឈ្មោះថ្ងៃនេះ ដើម្បីចូលរួមក្នុងព្រឹត្តិការណ៍ដ៏មានអត្ថន័យនេះ ហើយជួយយើងខ្ញុំចែករំលែកក្តីសង្ឃឹម និងក្តីមេត្តាដល់អ្នកដែលត្រូវការបំផុត»។ ព្រឹត្តិការណ៍នេះ នឹងរៀបចំនៅក្រុងបាត់ដំបង ដោយមានប្រភេទ​នៃជម្រើសរត់៣គីឡូ  ៥គីឡូ  ១០គីឡូ និង ២១គីឡូ៕