ខេត្តតាកែវមានបេក្ខជនជាង១០០នាក់អវត្តមានក្នុងថ្ងៃប្រឡងបាក់ឌុបឆ្នាំ២០២៤

ក្នុងចំណោមបេក្ខជនដែលបានដាក់ពាក្យប្រឡងសញ្ញាបត្រមធ្យមសិក្សាទុតិភូមិ សម័យប្រឡងថ្ងៃទី០៨ ទី៩ ខែតុលា ឆ្នាំ២០២៤ ចំនួន៩៣៤២នាក់ មានបេក្ខជនអវត្តមានក្នុងការប្រឡងចំនួន១៤១នាក់។ នេះបើតាមការឲ្យដឹងពីលោក ឡោ វិរិទ្ធិ ប្រធានមន្ទីរអប់រំយុវជននិងកីឡាខេត្តតាកែវ នាល្ងាចថ្ងៃទី០៩ ខែតុលា ឆ្នាំ២០២៤។

លោក ឡោ វិរិទ្ធិ បានបញ្ជាក់ទៀតថា បេក្ខជនដែលអវត្តមានក្នុងការប្រឡងទាំង១៤១នាក់ គឺមានស្រី៥៥នាក់ ហើយបេក្ខជនទាំងអស់សុទ្ធតែដាក់ពាក្យប្រឡងថ្នាក់វិទ្យាសាស្ត្រសង្គមទាំង១៤១នាក់ទៀតផង។

សូមបញ្ជាក់ផងដែរថា ខេត្តតាកែវឆ្នាំ២០២៤នេះ មានមណ្ឌលប្រឡងសរុបមាន១៧មណ្ឌល ថ្នាក់វិទ្យាសាស្ត្រមាន០៥មណ្ឌល ស្មើនិង១០០បន្ទប់ និងថ្នាក់វិទ្យាសាស្ត្រសង្គម មាន១២មណ្ឌល ស្មើ២៨៥បន្ទប់។ បេក្ខជនដាក់ពាក្យប្រឡងមាន៩៣៤២នាក់ (ស្រី៤៩៥៦នាក់) ក្នុងនោះ ថ្នាក់វិទ្យាសាស្ត្រមានបេក្ខជន២៤៣៩នាក់ ស្រី១៤៨៣នាក់ និងថ្នាក់វិទ្យាសាស្ត្រសង្គមមានបេក្ខជន៦៩០៣នាក់ ស្រី៣៤៨២នាក់៕

អត្ថបទ៖ វីរៈ