អភិបាលខេត្តកោះកុង លើកទឹកចិត្តដល់ចាស់ព្រឹទ្ធាចារ្យបន្តទូន្មានដល់កូនចៅដើរតាមគន្លងធម៌សង្គម

កោះកុង ៖ លោកស្រី មិថុនា ភូថង អភិបាលខេត្តកោះកុង នៅតែសំណូមពរដល់លោកតាលោកយាយ និងចាស់ព្រឹទ្ធាចារ្យបន្តផ្តល់ដំបូន្មានដែលល្អៗដល់កូនចៅជំនាន់ក្រោយប្រកបដោយសិលធម៌ ដើម្បីឱ្យពួកគេស្គាល់ពីគុណតម្លៃរបស់មនុស្សចាស់កសាងកន្លងមក។

មនុស្សចាស់នៅតែជាមរតករបស់មនុស្សរស់នៅជំនាន់ក្រោយដោយមិនអាចកាត់ថ្លៃបានឡើយ ដូច្នេះមនុស្សជំនាន់ក្រោយគប្បីដឹងគុណគោរពស្រឡាញ់មនុស្សជំនាន់មុន ដែលប្រឹងប្រែងកសាងរាល់សមិទ្ធផលដែលសំបូរបែបដល់ពេលបច្ចុប្បន្នទាំងការអភិវឌ្ឍន៍គ្រួសារ និងសង្កមជាតិ។

នេះជាការបញ្ជាក់របស់លោកស្រី មិថុនា ភូថង អភិបាលខេត្តកោះកុង ក្នុងទិវាមនុស្សចាស់កម្ពុជា និងទិវាមនុស្សចាស់អន្តរជាតិលើកទី២៦ ទិវាមនុស្សចាស់កម្ពុជានិងទិវាមនុស្សចាស់អន្តរជាតិ ១ តុលា ក្រោមប្រធានបទ “មនុស្សចាស់ក្នុងបរិវត្តកម្មឌីជីថល”កាលពីរសៀលថ្ងៃទី២១ ខែតុលា ឆ្នាំ២០២៤។

លោកស្រីអភិបាលខេត្តកោះកុង រំលេចទៀតថា លោកតាលោកយាយ ចាស់ព្រឹទ្ធាចារ្យ មាតាបិតា និងមនុស្សដែលមានវ័យខ្ពស់ជាងមនុស្សជំនាន់ក្រោយ ចាំបាច់ណាស់ប្រៀនប្រដៅអប់រំដល់កូនចៅប្រកបដោយគតិបណ្ឌិតតាមប្រពៃណី ទំនៀមទម្លាប់ និងកេរមរតកសម្បត្តិវប្បធម៌ដែលល្អផូរផង់។

ពិសេសអប់រំពួកគេអោយចេះចូលរួមការងារក្នុងសង្គម ថែរក្សាការពារសុខសន្តិភាព និងភាពសុខុដុមរមនាក្នុងសង្គមជាតិ ចៀសវាងធ្វើប្រទេសធ្លាក់ចូលភ្លើងសង្រ្គាមដូចពេលអតីតកាល។

យ៉ាងណាមិញ លោកស្រី មិថុនា ភូថង លើកឡើងដែរថា បរិវត្តកម្មឌីជីថល កំពុងបង្កលក្ខណៈងាយស្រួលដល់មនុស្សចាស់ដែលខ្វះសមត្ថភាពបម្លាស់ទី និងរស់នៅឆ្ងាយពីកូនចៅដែលពួកគាត់មានភារកិច្ចការងាររៀងខ្លួនពុំបាននៅជិតដូចពេលមុនៗ ដោយប្រែមកទទួលអារម្មណ៍កក់ក្តៅដោយរស់នៅផ្ទាល់នឹងកូនចៅតែម្តង។

លោកស្រីអភិបាលខេត្ត ក៏ស្នើដល់រដ្ឋបាលក្រុងស្រុកមន្ទីរអង្គភាពពាក់ព័ន្ធជុំវិញខេត្ត ជួយបង្កលក្ខណៈងាយស្រួល និងគាំទ្រដល់សមាគមមនុស្សចាស់កម្ពុជាដែលមានស្រាប់ក្នុងសហគមន៍ ដើម្បីបង្កើនស្មារតីសាមគ្គីជួយគ្នាទៅវិញទៅមករវាងមនុស្សចាស់មានវ័យជរា ព្យាធិ ពិការ ក្រីក្រ គ្មានទីពឹងជាដើម។

លោក គង់ សំរិទ្ធ ប្រធានមន្ទីរសង្គមកិច្ច អតីតយុទ្ធជន និងយុវនីតសម្បទាខេត្តកោះកុង បង្ហាញតាមរយៈរបាយការណ៍របស់ខ្លួនថា ខេត្តកោះកុងមានមនុស្សចាស់សរុប១១.៥៩៥នាក់ ក្នុងនោះមនុស្សចាស់ជាអតីតមន្រ្តីរាជការស៊ីវិលចូលនិវត្តន៍ និងជនបាត់បង់សម្បទាវិជ្ជាជីវៈចំនួន៣៤៤នាក់ និងអតីតយុទ្ធជនជានិវត្តជន និងបាត់បង់សមត្ថភាពការងារចំនួន១.១១៤នាក់​។

លោកគង់ សំរិទ្ធ បានបន្តថា តបនឹងគោលនយោបាយរបស់រាជរដ្ឋាភិបាលកម្ពុជា ខេត្តកោះកុងបានដោះស្រាយរបបគោលនយោបាយនានាជូនដល់មនុស្សចាស់សរុប១.៤៥៨នាក់ បើគិតជាថវិកាសរុប១.១៨១លានរៀល។ ជាក់ស្តែងពួកគាត់កំពុងបើករបបសន្តិសុខប្រចាំខែនៅតាមប្រព័ន្ធធនាគារតាមបណ្តាក្រុងស្រុកឃុំសង្កាត់ដែលពួកគាត់កំពុងរស់នៅ។

រីឯសមាគមមនុស្សចាស់នៅតាមសហគមន៍វិញ លោកប្រធានមន្ទីរសង្គមកិច្ច អះអាងថា មានសមាគមមនុស្សចាស់ចំនួន៧ឃុំសង្កាត់ ស្មើនឹង១១ភូមិដែលកំពុងដំណើរការទៅតាមស្ថានភាពជាក់ស្តែងនៃឃុំសង្កាត់នីមួយៗ។ ហើយជាក់ស្តែងមានសមាជិកសរុបចំនួន៥៦៧នាក់ ស្រ្តី៣៥៦នាក់ គិតមកទល់ពេលនេះសមាគមមានថវិកាតម្កល់ចំនួន៤លាន៤សែនរៀល៕
អត្ថបទ​ ៖​ សិរីវឌ្ឍនៈ