នគរបាលកម្ពុជា ស្នើវៀតណាមជួយទប់ស្កាត់ពលរដ្ឋឆ្លងដែនខុស​ច្បាប់ បទល្មើសជួញដូរមនុស្ស អាវុធឆ្លងដែន និងភេរវកម្ម

នៅក្នុងជំនួបកិច្ចប្រជុំរវាងស្នងការដ្ឋាននគរ​បាលខេត្តមណ្ឌល​គិរី ជា​មួយ​កងទ័ពការពារព្រំដែនវៀតណាម កាលពីថ្ងៃទី២៨ ខែតុលា ភាគីកម្ពុជា បានស្នើឱ្យភាគីកងទ័ពការពារព្រំដែនវៀតណាម ជួយទប់ស្កាត់ចំពោះពលរដ្ឋឆ្លងដែនចេញចចូលដោយខុស​ច្បាប់ បទល្មើសជួញដូរមនុស្ស អាវុធឆ្លងដែន និងភេរវកម្មខុសច្បាប់គ្រប់ប្រភេទ។ នេះបើតាមការចេញផ្សាយដោយក្រសួងមហាផ្ទៃកម្ពុជា លើបណ្ដាញទំនាក់ទំនងសង្គម នាថ្ងៃទី២៩ ខែតុលា នេះ។

គណៈប្រតិភូនៃស្នងការដ្ឋាននគរបាលខេត្តមណ្ឌលគិរី ដឹកនាំដោយ​លោកឧត្តម​សេនីយ៍ត្រី អ៊ន ប៊ុន្នីរិទ្ធ ស្នងការរងនគរ​បាលខេត្តប្រតិភូអម​ដំណើរ សរុប១៨រូប ទៅចូលរួម កិច្ច​ប្រជុំបូក​សរុប​លទ្ធផល កិច្ចសហ​ប្រតិបត្តិការរក្សា សន្តិសុខ សណ្តាប់ធ្នាប់ តាមតំបន់ព្រំដែនប្រចាំ​ឆ្នាំ២០២៤ និងលើកទិសដៅកិច្ចសហ​ប្រតិ​បត្តិការ ឆ្នាំ​២០២៥ រវាងស្នងការដ្ឋាននគរ​បាលខេត្តមណ្ឌល​គិរី នៃកម្ពុជា ជា​មួយ​កងទ័ពការពារព្រំដែនវៀតណាម ដឹកនាំដោយ លោកវរសេនីយ៍ឯក ដាវ វៀតហ៊ូង មេបញ្ជាការកងទ័ព​ការពារព្រំដែនខេត្តដាក់ឡាក់ ប្រធានប្រតិ​ភូ នៃប្រទេស​វៀតណាម។​ 

ក្នុងជំនួបកិច្ចប្រជុំនេះដែរលោកឧត្តមសេនីយ៍ត្រី ស្នងការរងនគរបាលខេត្ត​បានលើកសំណូមពរចំនួន៥ចំណុចឱ្យភាគីវៀត​ណាមគឺ៖​ ទី១/ជួយផ្ដល់ព័ត៌មានឱ្យគ្នាទៅវិញទៅមក ដើម្បីបង្កលក្ខណៈងាយស្រួលក្នុងការបង្ការទប់​ស្កាត់​បងល្មើសគ្រប់ប្រភេទ។​

ទី២/ទប់ស្កាត់ប្រពលរដ្ឋចេញចូលខុស​ច្បាប់ត្រួតពិនិត្យឱ្យបានហ្មត់ចត់។​ទី៣/ទប់ស្កាត់រាល់បទល្មើសជួញដូរមនុស្ស ជួញដូរអាវុធឆ្លងដែន និង ភេរវកម្មខុសច្បាប់គ្រប់ប្រភេទ។ ​ទី៤/បង្កើនកិច្ចប្រតិបត្តិការទៅវិញទៅមកខេត្ត​មណ្ឌលគិរី និង ខេត្តដាក់ឡាក់ និងទី៥ប៉ុស្តិ៍នគរបាលការពារព្រំដែនខេត្តទាំងពីរចាំស្ដាប់ការចង្អុលបង្ហាញថ្នាក់ដឹកនាំខេត្ត ដើម្បីអនុវត្តការណែនាំបន្ត។​

ឆ្លងកាត់កិច្ចប្រជុំ ភាគីទាំងពីរបានប្រជុំតាមផែនការកំណត់រវាងកងទ័ពការពារព្រំដែនខេត្តដាក់ឡាក់ និងស្នងការដ្ឋាននគរបាលខេត្តមណ្ឌលគិរី បានល្អប្រសើរ។​ ភាគីវៀតណាម បន្តកិច្ចការផ្ដល់ចរន្តអគ្គិសនីដល់ប៉ុស្តិ៍ទាំង៣ ខេត្តមណ្ឌលគិរី ឆ្នាំ២០២៥ និងបន្តការជួសជុលខ្សែភ្លើងដែលប្រើប្រាស់ហើយ​ និងជូនដំណឹងដល់អគ្គិសនីវៀតណាមបន្តនូវខ្សែភ្លើងថ្មីជូនដល់ប៉ុស្តិ៍។​

ចំពោះបទល្មើសគ្រឿងញៀនតាមតំបន់ព្រំដែនកម្ពុជា-វៀតណាម ភាគីទាំងពីរបានសហការបង្ក្រាបឱ្យបានទាន់ពេលវេលា។​ជាមួយគ្នានេះ អង្គប្រជុំ សំណូមពរដល់ខេត្តមណ្ឌលគិរី ដល់ប៉ុស្តិ៍ទាំង៣ ធ្វើការល្បាតស្របពេលគ្នា ដើម្បីបង្ការ និងទប់ស្កាត់រាល់បទល្មើសគ្រប់ប្រភេទបានទាន់ពេលវេលា។​

នៅក្នុងរបាយការណ៍ប្រជុំ បានឱ្យដឹងថា ក្នុងឆ្នាំ២០២៣ ជនជាតិវៀតណាម ចូលមករកស៊ីខុសច្បាប់នៅកម្ពុជាចំនួន២ករណី ត្រូវបានបង្ក្រាបបានទាន់ពេលវេលា៕

ដោយ៖ ង៉ិល ណារ៉ាត់