គ្រឹះស្ថានសិក្សាទាំងអស់ ឯកភាពគ្នាមិនដំឡើងថ្លៃសិក្សាសម្រាប់ឆ្នាំសិក្សាថ្មី២០២៤-២០២៥

សមាគមគ្រឹះស្ថានឧត្តមសិក្សាកម្ពុជា និងសហព័ន្ធសេវាអប់រំនៅកម្ពុជា បានប្រកាសថា គ្រឹះស្ថានសិក្សាទាំងអស់បានឯកភាពគ្នាមិនដំឡើងថ្លៃសិក្សាសម្រាប់ឆ្នាំសិក្សាថ្មី២០២៤-២០២៥ ហើយនឹងពិនិត្យលទ្ធភាពបញ្ចុះតម្លៃសិក្សាជូនសិស្សនិស្សិតតាមលទ្ធភាពរៀងៗខ្លួន។ នេះបើតាមក្រសួងអប់រំ យុវជន និងកីឡា បានឱ្យដឹងនាព្រឹកថ្ងៃទី០៥ ខែវិច្ឆិកា ឆ្នាំ២០២៤។

ក្រសួងបញ្ជាក់ថា ការមិនដំឡើងថ្លៃសិក្សានេះ បន្ទាប់ពីសម្តេចមហាបវរធិបតី ហ៊ុន ម៉ាណែត លើកទឹកចិត្តសមាគមគ្រឹះស្ថានឧត្តមសិក្សាកម្ពុជា និងសហព័ន្ធសេវាអប់រំនៅកម្ពុជា ពិនិត្យលទ្ធភាពមិនដំឡើងថ្លៃសិក្សាសម្រាប់ឆ្នាំសិក្សាថ្មី ក៏ដូចជាពិនិត្យលទ្ធភាពបញ្ចុះតម្លៃសិក្សាតាមភាពជាក់ស្ដែងសម្រាប់សិស្សនិស្សិត ដើម្បីសម្រាលបន្ទុកដល់ឪពុកម្តាយ អ្នកអាណាព្យាបាល និងសិស្សនិស្សិតបង់ថ្លៃសិក្សានៅតាមគ្រឹះស្ថានសិក្សា។

សម្តេចនាយករដ្ឋមន្ត្រី ហ៊ុន ម៉ាណែត បានសរសេរលើទំព័រហ្វេសប៊ុកកាលពីពេលថ្មីៗនេះថា ការលើកកម្ពស់គុណភាពវិស័យអប់រំ និងកសាងមូលធនមនុស្សជាអាទិភាពដ៏សំខាន់ និងចាំបាច់បំផុត ដែលបានកំណត់ក្នុងគោលនយោបាយជាអាទិភាពរបស់រដ្ឋាភិបាល។ រដ្ឋាភិបាលបានផ្តល់ការគាំទ្រ និងដាក់ចេញគោលនយោបាយអនុគ្រោះជាបន្តបន្ទាប់ ដើម្បីលើកទឹកចិត្ត និងជួយសម្រួលដល់វិស័យអប់រំ ជាពិសេសជួយសម្រាលបន្ទុកចំណាយដល់សកលវិទ្យាល័យ សាលារៀន ក៏ដូចជាឪពុកម្តាយ អ្នកអាណាព្យាបាល និងសិស្សនិស្សិត។

សម្តេចមហាបវរធិបតី បានបញ្ជាក់ថា នៅក្នុងអង្គប្រជុំកាលពីថ្ងៃទី២៨ ខែឧសភា ឆ្នាំ២០២៤ រដ្ឋាភិបាលបានសម្រេចផ្តល់ការលើកទឹកចិត្តមួយចំនួន ដូចជាពន្ធលើប្រាក់ចំណូល ប្រាក់រំដោះពន្ធលើប្រាក់ចំណូល ពន្ធអប្បបរមា អាករលើតម្លៃបន្ថែម និងពន្ធកាត់ទុកលើសេវាការប្រាក់ និងភាគលាភ ចាប់ពីឆ្នាំ២០២៤ រហូតដល់ដំណាច់ឆ្នាំ២០២៨។

ដើម្បីសម្រាលបន្ទុកដល់ឪពុកម្តាយ អ្នកអាណាព្យាបាល និងសិស្សនិស្សិតចំពោះការបង់ថ្លៃសិក្សានៅតាមគ្រឹះស្ថានសិក្សា សម្តេចនាយករដ្ឋមន្ត្រី ហ៊ុន ម៉ាណែត បានប្រគល់ភារកិច្ច ជូនលោកឧបនាយករដ្ឋមន្ត្រី ហង់ជួន ណារ៉ុន សមាគមគ្រឹះស្ថានឧត្តមសិក្សាកម្ពុជាដែលមានសមាជិក១៤១ និងសហព័ន្ធសេវាអប់រំនៃកម្ពុជាដែលមានសមាជិក១២០ ពិនិត្យលទ្ធភាពមិនដំឡើងថ្លៃសិក្សាសម្រាប់ឆ្នាំសិក្សាថ្មីនេះ ក៏ដូចជាពិនិត្យលទ្ធភាពបញ្ចុះថ្លៃសិក្សាតាមភាពជាក់ស្ដែងសម្រាប់សិស្សនិស្សិត។

សមាគមគ្រឹះស្ថានឧត្ដមសិក្សាកម្ពុជាបានផ្ញើលិខិតជូន សម្តេចនាយករដ្ឋមន្ត្រី ហ៊ុន ម៉ាណែត កាលពីថ្ងៃសៅរ៍ ហើយបញ្ជាក់ថា គ្រឹះស្ថានឧត្តមសិក្សាទាំងអស់បានឯកភាពមិនដំឡើងថ្លៃសិក្សាសម្រាប់ឆ្នាំសិក្សាថ្មី២០២៤-២០២៥ ហើយនឹងពិនិត្យលទ្ធភាពបញ្ចុះតម្លៃសិក្សាជូនសិស្សនិស្សិតទៅតាមលទ្ធភាពរៀងៗខ្លួន៕