សេចក្តីព្រាងច្បាប់ស្តីពីការលុបចោលកិច្ចព្រមព្រៀងពាណិជ្ជកម្ម CLV​ នឹងដាក់ឱ្យរដ្ឋសភាអនុម័ត នៅថ្ងៃទី៨ ខែវិច្ឆិកា

គណៈកម្មាធិការអចិន្ត្រៃយ៍រដ្ឋសភា សម្រេចបញ្ចូលសេចក្តី​ព្រាង​ច្បាប់ស្តីពីការអនុម័តលុបចោលកិច្ចព្រមព្រៀងស្តីពីការជំរុញ និងសម្រួល​ពាណិជ្ជកម្ម​តំបន់​ត្រីកោណ​អភិវឌ្ឍន៍កម្ពុជា-ឡាវ-វៀតណាម ក្នុងរបៀបវារៈកិច្ចប្រជុំពេញអង្គរដ្ឋសភា នៅថ្ងៃទី៨ ខែវិច្ឆិកា ដើម្បីសុំការអនុម័ត។  

យោងតាមសេចក្តីប្រកាសព័ត៌មានរបស់អគ្គលេខាធិការដ្ឋានរដ្ឋសភា បានឱ្យដឹងថា នៅព្រឹកថ្ងៃទី៦ ខែវិច្ឆិកា ឆ្នាំ២០២៤ នេះ កិច្ចប្រជុំគណៈកម្មាធិការអចិន្ត្រៃយ៍រដ្ឋសភាកម្ពុជា ក្រោមវត្តមានដឹកនាំរបស់សម្តេចធិការធិបតី ឃួន សុដារី ប្រធានរដ្ឋសភា បានអនុម័តកំណត់កាលបរិច្ឆេទបន្តសម័យប្រជុំរដ្ឋសភាលើកទី៣ នៅព្រឹកថ្ងៃសុក្រ ខែវិច្ឆិកា ឆ្នាំ២០២៤។

របៀបវារៈសម្រាប់កិច្ចប្រជុំពេញអង្គខាងមុខ នឹងត្រូវពិភាក្សា និងអនុម័តលើសេចក្តីព្រាងច្បាប់ស្តីពីការអនុម័តលុបចោលកិច្ចព្រមព្រៀងស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម និងការសម្រេចអំពីសុពលភាពនៃអាណត្តិរបស់លោកស្រី យស ថានារី ជាតំណាងរាស្ត្រមណ្ឌលខេត្តកំពង់ធំ ជំនួសលោក ជា ចាន់តូ ដែលបានទទួលមរណភាព។

មុនដាក់ឱ្យកិច្ចប្រជុំពេញអង្គរដ្ឋសភាពិភាក្សា និងអនុម័ត សេចក្តីព្រាងច្បាប់ស្តីពីការអនុម័តលុបចោលកិច្ចព្រមព្រៀងស្តីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម ត្រូវបានគណៈកម្មាធិការអចិន្ត្រៃយ៍រដ្ឋសភា ប្រគល់ភារកិច្ចឱ្យអន្តរគណៈកម្មការជំនាញរបស់រដ្ឋសភា ដើម្បីពិនិត្យ​ សិក្សា ព្រមទាំងបានជួបជជែកជាមួយតំណាងរាជរដ្ឋាភិបាល ដឹកនាំដោយ​លោកស្រី ចម និម្មល រដ្ឋមន្ត្រីក្រសួងពាណិជ្ជកម្មទៀតផង។

គួរបញ្ជាក់ថា កិច្ចព្រមព្រៀងស្ដីពីការជំរុញ និងសម្រួលពាណិជ្ជកម្ម នៃតំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម មានរយៈពេលប្រមាណ ២៥ឆ្នាំមកហើយ ក្រោមគំនិតផ្ដួចផ្ដើមរបស់អតីតនាយករដ្ឋមន្ត្រី សម្ដេចតេជោ ហ៊ុន សែន និងថ្នាក់ដឹកនាំរបស់ឡាវ និងវៀតណាម សំដៅជំរុញការអភិវឌ្ឍខេត្តតាមបន្ទាត់ព្រំដែនរវាងប្រទេសទាំង៣។ ប៉ុន្តែ ដោយសារពេលថ្មីៗកន្លងទៅនេះ ក៏មានការខ្វែងគំនិតមួយចំនួន បង្កើតជាការភាន់ច្រឡំលើកិច្ចព្រមព្រៀងនេះ ប្រមុខរាជរដ្ឋាភិបាលកម្ពុជា ក៏បាន​សម្រេចប្រកាសដកកម្ពុជាចេញពីកិច្ចសហប្រតិបត្តិការនេះ ដើម្បីជម្រះមន្ទិលទាំងនេះ៕