ព័ត៌មានជាតិ

១០ ខែ ឆ្នាំនេះ អគ្គិភ័យកើតឡើងជិត ៧០០ លើក បង្កឱ្យមនុស្សស្លាប់-របួស ជាង ៦០ នាក់ និងបំផ្លាញផ្ទះជាង ៧០០ ខ្នង

បានផុស

១ year មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

ក្នុងរយៈពេល ១០ ខែ ឆ្នាំ ២០២៤ នេះ គ្រោះអគ្គិភ័យបានកើតឡើងជិត ៧០០ លើក នៅទូទាំងប្រទេស បណ្តាលឱ្យមនុស្សស្លាប់ និងរបួសជាង ៦០ នាក់ បំផ្លាញផ្ទះសំបែងជាង ៧០០ ខ្នង និងហេដ្ឋារចនាសម្ព័ន្ធជាច្រើនទៀត។

យោងរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា ចាប់ពីខែមករា រហូតដល់ ខែតុលា ឆ្នាំ ២០២៤ គ្រោះអគ្គិភ័យបានកើតឡើងចំនួន ៦៥៩ លើក នៅទូទាំងប្រទេស បណ្តាលឱ្យឆេះផ្ទះចំនួន ៧២៥ ខ្នង តូបផ្សារ ១២២ តូប ឃ្លាំងទំនិញចំនួន ២០ កន្លែង រោងចក្រសិប្បកម្មចំនួន ២១ កន្លែង អគាររដ្ឋបាល ១៨ កន្លែង បង្កឱ្យស្លាប់មនុស្សចំនួន ១៥ នាក់ និងរបួសចំនួន ៤៨ នាក់។

ក្នុងចំណោមអ្នកស្លាប់ ១៥ នាក់ ក្នុងនោះនៅរាជធានីភ្នំពេញច្រើនជាងគេ ដោយមានអគ្គិភ័យកើតឡើងចំនួន ១០៩ លើក បណ្តាលឱ្យឆេះផ្ទះចំនួន ១៣១ ខ្នង តូបផ្សារចំនួន ២០ តូប ឃ្លាំងទំនិញចំនួន ៦ រោងចក្រសិប្បកម្មចំនួន ៦ កន្លែង អគាររដ្ឋបាល ៤ កន្លែង ស្លាប់មនុស្សចំនួន ៣ នាក់ និងរបួសចំនួន ១០ នាក់។ ក្រៅពីនេះនៅខេត្តកណ្តាលស្លាប់ ១ នាក់ ខេត្តតាកែវស្លាប់ ១ នាក់ ខេត្តស្វាយរៀងស្លាប់ ២ នាក់ ក្រចេះស្លាប់ ១ នាក់ ខេត្តកំពង់ធំស្លាប់ ១ នាក់ កំពង់ឆ្នាំងស្លាប់ ១ នាក់បាត់ដំបងស្លាប់ ១ សៀមរាបស្លាប់ ៣ នាក់ និងខេត្តព្រះវិហាស្លាប់ ១ នាក់។

យោងតាមរបាយការណ៍ដដែលបានបន្តទៀតថា តួលេខនេះបើធៀបទៅនឹងរយៈពេល ១០ ខែ ដូចគ្នា ឆ្នាំ ២០២៣ កន្លងទៅ ឃើញថា មានការកើនឡើងគួរឱ្យគត់សម្គាល់ ដោយ ១០ ខែ ឆ្នាំមុន គ្រោះអគ្គិភ័យបានកើតឡើងចំនួន ៤៩៨ លើក នៅទូទាំងប្រទេស បណ្តាលឱ្យឆេះផ្ទះចំនួន ៥៥៥ ខ្នង តូបផ្សារ ៧៩ តូប សាលារៀន ១ ខ្នង ឃ្លាំងទំនិញចំនួន ១០ កន្លែង រោងចក្រសិប្បកម្មចំនួន ៩ កន្លែង អគាររដ្ឋបាល ១២ កន្លែង បង្កឱ្យស្លាប់មនុស្សចំនួន ២៨ នាក់ និងរបួសចំនួន ៣៤ នាក់។

បើតាមលោកឧត្ដមសេនីយ៍ឯក នេត វាន់ថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ ធ្លាប់បានបញ្ជាក់ឱ្យដឹងថា ដើមចមដែលនាំឱ្យមានគ្រោះអគ្គិភ័យកើតឡើង បណ្ដាលមកពីការឆ្លងចរន្តអគ្គិសនីចំនួន ៤១,៥៥ ភាគរយ ប្រើប្រាស់ភ្លើងចំនួន ៣៨,២៤ ភាគរយ និងក្ដាប់មិនបានចំនួន ២០,២១ ភាគរយ៕

អត្ថបទ ៖ សំអឿន