ក្រពើភ្នំប្រមាណ ៥០០ ក្បាល មានវត្តមាននៅកម្ពុជា ស្មើនឹង ៥០% នៅលើពិភពលោក

នៅរយៈពេល២៥ឆ្នាំ ក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន រដ្ឋបាលថ្នាក់​ក្រោមជាតិ និងសហគមន៍មូលដ្ឋាន ព្រមទាំងអង្គការសត្វព្រៃ និងរុក្ខជាតិកម្ពុជា បានធ្វើការរួម​គ្នា​យ៉ាងសកម្មក្នុងការអភិរក្សក្រពើភ្នំពីការជិតផុត​ពូជពីក្នុងធម្មជាតិរហូតដល់ការបន្តកើនឡើងនៅក្នុងទឹកដីកម្ពុជា។

លោក Pablo Sinovas នាយកប្រចាំប្រទេស អង្គការសត្វព្រៃ និងរុក្ខជាតិកម្ពុជា បាន​ប្រាប់​ឱ្យ​ដឹង​ថា​គម្រោងអភិវឌ្ឍន៍ក្រពើ​ភ្នំបានដំណើរការ រយៈពេល ២៥ ឆ្នាំ មកហើយ ដែលពេលនោះ ប្រភេទក្រពើភ្នំ ត្រូវបានគេគិតថា បានផុតពូជពីក្នុងធម្មជាតិ ក្រោយមកអង្គការសត្វព្រៃ និង​រុក្ខជាតិកម្ពុជា ជាមួយនឹងដៃគូរដ្ឋាភិបាល និងសហគមន៍មូលដ្ឋាន បានរកឃើញសត្វ​ក្រពើភ្នំមួយ​ចំនួន​នៅក្នុងតំបន់ព្រៃដាច់ស្រយាលនៃតំបន់ជួរភ្នំក្រវាញ ដែលស្ថិតនៅភាគនិរតី នៃប្រទេស​កម្ពុជា ពេលនោះហើយដែលកម្មវិធីអភិរក្សក្រពើភ្នំនេះ ត្រូវបានបង្កើតឡើង ដែលគិតមកដល់​ពេល​នេះ មានរយៈពេលជាង ២ ទស្សវត្សរ៍មកហើយ។

លោក Pablo Sinovas ប្រាប់ថា អង្គការសត្វព្រៃ និងរុក្ខជាតិកម្ពុជា កំពុងការពារទីជម្រក ធម្មជាតិ​ប្រភេទនេះ ដែលត្រូវបានរកឃើញ ហើយបានធ្វើការយ៉ាងជិតស្និទ្ធ ជាមួយសហគមន៍ជន​ជាតិដើមភាគតិច ដែលមានការគោរពក្រពើភ្នំជាសត្វដែលសក្ដិសិទ្ធិ ហើយកំពុង​ពង្រីក​ការការពារ​ទីតាំងទាំងនោះ ខណៈអង្គការរបស់លោកបានបង្កាត់ពូជសត្វក្រពើភ្នំពូជសុទ្ធ ដើម្បីលែងចូល​ទៅក្នុង​ព្រៃវិញ ដើម្បីធានាថា ក្រពើភ្នំអាចបន្តពូជដោយខ្លួនឯងបាននៅក្នុងធម្មជាតិ។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា ការងារនេះ ក្រសួងកសិកម្ម បានធ្វើ តាំងពីឆ្នាំ ២០០០ ដោយសហការជិតស្និទ្ធិ​ជាមួយអង្គភាព​ជំនាញ​ពាក់ព័ន្ធ ក្រសួងបរិស្ថាន រដ្ឋបាលថ្នាក់ក្រោមជាតិ និងអង្គការដៃគូ ដូចជាអង្គការសត្វព្រៃ និងរុក្ខជាតិ ដោយបានចិញ្ចឹមបង្កាត់ពូជ ហើយដាក់ចូលទៅក្នុងព្រៃវិញយ៉ាងច្រើន។

លោក ឌិត ទីណា បានបញ្ជាក់ថា បច្ចុប្បន្ន កម្ពុជាមានក្រពើភ្នំប្រមាណ ៥០% នៃក្រពើភ្នំនៅលើ​ពិភពលោក។

លោកថា ការដាក់ចូលនៅក្នុងធម្មជាតិ ក្រសួងកសិកម្មក៏មានការប្រុងប្រយ័ត្ន ក្នុងការយកទៅដាក់​នៅតំបន់ស្នូល នៃតំបន់ការពារ ដើម្បីឱ្យដាច់ឆ្ងាយពីមនុស្ស ព្យាយាមធ្វើយ៉ាងណា​ឱ្យក្រ​ពើ​ទាំងនោះ អាចរស់រានឡើងវិញបន្តពូជ ជានិរន្តភាពសម្រាប់ជីវៈចម្រុះនៅក្នុងព្រៃ។

លោក អ៊ាង សុផល្លែត រដ្ឋមន្ត្រីក្រសួងបរិស្ថាន ថ្លែងថា ក្រសួងផ្ដល់ការគាំទ្រពេញទំហឹង តាមរយៈការផ្ដល់ជូនមន្ត្រីបរិស្ថាន ចូលរួមសហការគ្នាអភិរក្សក្រពើភ្នំ និងសត្វព្រៃដទៃទៀត។

លោក អ៊ាង សុផល្លែតបញ្ជាក់ថា៖ «ក្រសួងបរិស្ថានជំរុញការស្រាវជ្រាវ សិក្សា និងថែរក្សា ជាគោ​ល​នយោបាយរបស់ក្រសួងបរិស្ថាន មិនត្រឹមតែក្រពើទេ គឺសត្វព្រៃទាំងអស់នៅកម្ពុជា​ជា​ផ្នែក​មួយ​នៃជីវៈចម្រុះ កាលណាបើគ្មានសត្វព្រៃទេ គ្មានក្រពើទេ គ្មានសត្វដទៃទៀតទេ ជីវៈចម្រុះ​ក៏បាត់​បង់ដែរ ព្រោះវារស់នៅបំពេញឱ្យគ្នាទៅវិញទៅមក វាជាអេកូ System មួយ នៅក្នុង​តំបន់​ការ​ពារ»។

ដើមឡើងក្រពើភ្នំនៅកម្ពុជា មានតែ ៥ ទៅ ៦ ក្បាលប៉ុណ្ណោះ បច្ចុប្បន្នទីតាំងបង្កាត់ពូជក្រពើភ្នំ មានសរុប ៥០០ ក្បាល។ ចំពោះដំណើរការបង្កាត់គឺមានកន្លែងស្ដុក្រពើ ដែលមានក្រពើញី ឈ្មោល ដែលពេញវ័យ ដែលបានធ្វើតេស្តហ្សែនថា ជាប្រភេទពូជក្រពើភ្នំសុទ្ធ។ នេះបើតាម ការឱ្យដឹងពីលោក Pablo Sinovas។

លោក Pablo Sinovas ថ្លែងថា៖« យើងបានបង្កាត់វា ហើយឱ្យពួកវាធ្វើសំបុក និងដាក់ពងនៅក្នុងសំបុកទាំងនោះ បន្ទាប់មកយើងយកពងទាំងនោះទៅភ្ញាស់ យើងអាចភ្ញាស់កូនក្រពើបានចំនួន ១០០ ក្បាល ហើយកូនក្រពើដែលញាស់ទាំងនោះ អាចញាស់បានរហូតដល់អាយុបង្កាត់ពូជបាន ប្រសិនបើពួកវាត្រូវបានមើលថែទាំល្អ។ នៅឆ្នាំនេះ យើងបានលែងក្រពើភ្នំចូលទៅក្នុងធម្មជាតិ ៥០ ក្បាល ហើយចំនួននេះ នឹងកើនឡើងជារៀងរាល់ឆ្នាំ»។

លោក ស៊ីម ខ្មៅ អ្នកល្បាតក្រពើ បានឱ្យដឹងថា បុរាណមានជំនឿថា ឱ្យតែមានក្រពើភ្នំ​តែងតែនាំ​មក​សេច​ក្ដីសុខចម្រើន ហើយមិនដែលធ្វើឱ្យប៉ះពាល់​ដល់ប្រជាពលរដ្ឋ​ផងដែរ។

លោក ស៊ីម ខ្មៅ ចង់ឱ្យរដ្ឋាភិបាល និងម្ចាស់ជំនួយ បន្តជួយទ្រទ្រង់ក្រពើភ្នំដល់ក្មេងជំនាន់ក្រោយ និងឱ្យពិភពលោកទទួល​ស្គាល់ថា ពិតជាមានក្រពើភ្នំនៅកម្ពុជា៕

វីដេអូខាងក្រោម៖