រដ្ឋមន្ត្រីសេដ្ឋកិច្ច ប្រាប់វិស័យសុខាភិបាលថា មិនត្រូវព្រងើយកន្តើយចំពោះអ្នកជំងឺប្រើបណ្ណប.ស.ស និងបណ្ណក្រីក្រ ឡើយ

លោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងជាប្រធានក្រុមប្រឹក្សាជាតិគាំពារសង្គម ផ្ដល់អនុសាសន៍ឱ្យ វិស័យសុខាភិបាល ត្រូវខិតខំព្យាបាល ផ្ដល់សេវាជូនអ្នកជំងឺដែលប្រើប្រាស់បណ្ណសមធម៌ បណ្ណងាយរងហានិភ័យ និង បណ្ណ ប.ស.ស  ដោយមិនត្រូវព្រងើយកន្តើយឡើយ ដើម្បីជៀសវាងបញ្ហាថ្នាំងថ្នាក់ពីពលរដ្ឋ និងរាំងស្ទះ ដល់ការអនុវត្តគោលនយោបាយអាទិភាពរបស់រាជរដ្ឋាភិបាលកម្ពុជា។  លោក អូន ព័ន្ធមុនីរ័ត្ន លើកឡើងដូច្នេះ​ ដើម្បីឱ្យប្រព័ន្ធគាំពារសង្គមកម្ពុជា កាន់តែទទួលបានការទុកចិត្តពីសំណាក់ប្រជាពលរដ្ឋ ជាពិសេសនៅក្នុងចំណោមអ្នកទទួលផល។

នៅក្នុងសន្និសីទជាតិស្ដីពីសមិទ្ធផលគាំពារសង្គមកម្ពុជា ដែលរៀបចំឡើងនាថ្ងៃទី១៩ ខែវិច្ឆិកា លោក អូន ព័ន្ធមុនីរ័ត្ន ប្រធានក្រុមប្រឹក្សាជាតិគាំពារសង្គម សង្កត់ធ្ងន់ដូច្នេះ៖«ក្រសួងសុខាភិបាល តាមរយៈមន្ទីរសុខាភិបាលរាជធានី-ខេត្ត ត្រូវបន្ថែមការយកចិត្តទុកដាក់លើការផ្តល់សេវាសុខាភិបាលសារវន្តជូនពលរដ្ឋ ជាពិសេស ពលរដ្ឋដែលប្រើប្រាស់បណ្ណសមធម៌ បណ្ណងាយរងហានិភ័យ និងបណ្ណ ប.ស.ស. ដើម្បីចៀសវាងនូវការថ្នាំងថ្នាក់ ដែលអាចផ្តល់កម្ម-វិបាកអវិជ្ជមាន លើការអនុវត្តគោលនយោបាយអាទិភាពរបស់រាជរដ្ឋាភិបាល ក្នុងដំណើរឆ្ពោះទៅការគ្របដណ្តប់សុខភាពជាសកលនៅកម្ពុជា»។

ជាការកត់សម្គាល់ ការអំពាវនាវរបស់លោក លោកអគ្គបណ្ឌិតសភាចារ្យ អូន ព័ន្ធមុនីរ័ត្ន នាពេលនេះ បន្ទាប់ពីពលរដ្ឋមួយចំនួនដែលប្រើប្រាស់បណ្ណសមធម៌ បណ្ណងាយរងហានិភ័យ និង បណ្ណ ប.ស.ស. បង្ហាញការថ្នាំងថ្នាក់ចិត្ត ពេលទៅទទួលសេវាព្យាបាល ហើយត្រូវបានអ្នកបម្រើការក្នុងវិស័យសុខាភិបាលផ្ដល់សេវាភាពយឺតយ៉ាវ។

នៅក្នុងពីធីដដែល លោក  អូន ព័ន្ធមុនីរ័ត្ន ក៏បានប្រាប់ឱ្យ ក្រសួងការងារ ត្រូវជំរុញការផ្សព្វផ្សាយអំពីកម្មវិធីបណ្ដុះបណ្ដាញវិជ្ជាជីវៈដល់យុវជនមកពីគ្រួសារមានបណ្ណសមធម៌ និងងាយរងហានិភ័យ ដើម្បីសម្រេចឱ្យបានគោលដៅ នៃការបណ្ដុះយុវជនឱ្យបាន១លាន៥សែននាក់ ក៏ដូចជាត្រូវបន្តបង្កើនប្រសិទ្ធភាពក្នុងការអនុវត្តរបបសន្តិសុខសង្គមនានា និងជាពិសេសត្រូវតែពង្រឹងកិច្ចសហការជាមួយបណ្ដាក្រសួង-ស្ថាប័ន ផ្សព្វផ្សាយពីគុណតម្លៃនៃបណ្ណ ប.ស.ស។

លោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច​ ប្រាប់ឱ្យក្រសួងសង្គមកិច្ច អតីតយុទ្ធជន និង យុវនីតិសម្បទា តាមរយៈមូលនិធិជាតិជំនួយសង្គម និង មន្ទីរសង្គមកិច្ចអតីតយុទ្ធជន និង យុវនីតិសម្បទា នៅតាមរាជធានី-ខេត្ត ត្រូវពង្រឹងយន្តការនៃការបើកផ្តល់អត្ថប្រយោជន៍ គាំពារសង្គម ដល់អ្នកទទួលផល និង ត្រូវដោះស្រាយបញ្ហាប្រឈមពាក់ព័ន្ធ ឱ្យបានទាន់ពេល ព្រមទាំងធ្វើការផ្សព្វផ្សាយបន្ថែម ដើម្បីឱ្យសាធារណជនជាពិសេស ពលរដ្ឋគោលដៅ បានយល់ច្បាស់អំពីកម្មវិធីជាតិជំនួយសង្គម របស់រាជរដ្ឋាភិបាល៕

ដោយ៖ ង៉ិល ណារ៉ាត់