នាយ​ឧត្តមសេនីយ៍ មាស វីរិទ្ធ អាជ្ញាធរគ្រប់ថ្នាក់ មេភូមិ មេឃុំ ទទួល​ចំណេះដឹង​លើ​ការងារ​ផ្សព្វផ្សាយ អប់រំ និងការប្រើប្រាស់App NoDrug

បាត់ដំបង ៖ លោក នាយឧត្តមសេនីយ៍ មាស វីរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនថ្លែងបែបនេះ ក្នុងពិធីបិទនិងប្រគល់វិញញាបនបត្រដល់សិក្ខាកាមជ័យលាភីនៃសិក្ខាសាលាផ្សព្វផ្សាយដើម្បីលើកកម្ពស់ចំណេះដឹងស្តីពីការអប់រំ បង្ការ ទប់ស្កាត់គ្រឿងញៀន ដល់​ភាគី​ពាក់ព័ន្ធក្នុងសហគមន៍នៅខេត្តជាប់ព្រំដែនកម្ពុជា-ថៃ» ក្រោមជំនួយLOA នាល្ងាចថ្ងៃទី៣ ខែធ្នូ ឆ្នាំ២០២៤ ដែលមានអ្នកចូលរួមជាអាជ្ញាធរមូលដ្ឋានគ្រប់ថ្នាក់ មេភូមិ មេឃុំទូទាំងស្រុកកំរៀង។

របាយការណ៍ស្វាគមន៍របស់ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយអប់រំ និងទំនាក់ទំនងសាធារណៈ និងជាប្រធានក្រុមសម្របសម្រួលរៀបចំបានបង្ហាញឲ្យឃើញថាសិក្ខាសាលានេះគឺទទួលបានការចាប់អារម្មណ៍ខ្លាំងពីសំណាក់អាជ្ញាធរគ្រប់ថ្នាក់ មេឃុំ មេភូមិទូទាំងស្រុកកំរៀងតាមរយៈការធ្វើតេស្តមុនវគ្គនិងលទ្ធផលក្រោយបញ្ចប់វគ្គក្នុងនោះគឺអ្នកបានយល់ដឹងពីសិក្ខាសាលានេះមានចំនួនរហូតដល់៩៥%ហើយការយល់ដឹងពីApp NoDrug គឺមានកើនឡើងដល់63% ។

ថ្លែងក្នុងនាម លោក​សន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ក្នុងឱកាសនោះ លោក​នាយឧត្តមសេនីយ៍ មាស វិរិទ្ធ អគ្គលេខាធិការ បាន​សាទរ​និង​កោតសរសើរ​ដល់ការប្រឹងប្រែងរួមគ្នាពីគ្រប់ភាគីទាំងអ្នករៀបចំ វាគ្មិន សិក្ខាកាម ដើម្បី​ចែករំលែក និង​ទទួល​ចំណេះ​ដឹងសម្រាប់យកទៅប្រើប្រាស់ផ្សព្វផ្សាយបន្ត​ដល់ប្រជាពលរដ្ឋផ្ទាល់នូវមូលដ្ឋានដើម្បីឲ្យគាត់មានលទ្ធភាពចូលរួមចំណែកការងារប្រយុទ្ធប្រឆាំងគ្រឿងញៀននៅមូលដ្ឋាន។

ក្នុងឱកាសនោះដែរ លោក​នាយឧត្តមសេនីយ៍ មាស វិរិទ្ធ បាន​ថ្លែង​បន្ត​ដោយឱ្យ​គ្រប់​សមាសភាព​ទាំងអស់​នៅ​ក្នុងមូលដ្ឋានខេត្តបាត់ដំបង​និយាយ​ជា​រួម​និង​និយាយ​ដោយ​ឡែក​ស្រុក​កំរៀងត្រូវរួមគ្នាធ្វើឲ្យសម្រេចបាននូវគោលនយោបាយ ភូមិ ឃុំមានសុវត្ថិភាព ដែលក្នុងនោះលក្ខណៈសម្បត្តិទី២ គឺ​ត្រូវ​ចូលរួមប្រយុទ្ធប្រឆាំងគ្រឿងញៀន ដែលជាឧបសគ្គនៃការអភិវឌ្ឍន៍ប្រទេសជាតិ ហើយលោកក៏បានអំពាវនាវដល់អាជ្ញាធរមូលដ្ឋានពិសេស ភូមិឃុំត្រូវបង្កើនការងារផ្សព្វផ្សាយអប់រំ ពិសេសបំផុស​ឱ្យប្រជាជនប្រើប្រាស់App NoDrug ដើម្បីរួមគ្នាដោះស្រាយឲ្យខានតែបាននៅបញ្ហាគ្រឿងញៀន “ផ្ទះ​អ្នក​ផ្ទះ​ខ្ញុំគ្មានគ្រឿងញៀន ភូមិយើងនឹងគ្មានគ្រឿងញៀនសហគមន៍មានសុវត្ថិភាពនិងការអភិវឌ្ឍ “៕