មន្រ្តីកម្ពុជា៖ ការដាក់ចេញច្បាប់អាជ្ញាសឹកនៅកូរ៉េខាងត្បូង ពុំប៉ះពាល់ដល់ពលរដ្ឋខ្មែរឡើយ

បន្ទាប់ពីកូរ៉ខាងត្បូងប្រកាសចេញច្បាប់អាជ្ញាសឹក, ឯកអគ្គរាជទូតកម្ពុជាប្រចាំសាធារណរដ្ឋកូរ៉េ លោកស្រី ជ្រឹង បុទុមរង្សី បានបញ្ជាក់ថា គិតត្រឹមថ្ងៃ ៤ ខែ ធ្នូនេះ ពុំមានប៉ះពាល់ដល់ពលរដ្ឋខ្មែរដែលកំពុងរស់នៅ និងធ្វើការនៅប្រទេសកូរ៉េខាងត្បូងនោះទេ ហើយពលករខ្មែរបន្តធ្វើការជាធម្មតា។ ជាមួយគ្នានេះ ក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់បងប្អូនសហគមន៍ខ្មែរនៅសាធារណរដ្ឋកូរ៉េ រក្សាភាពស្ងៀមស្ងាត់ កុំចូលរួមសកម្មភាពប្រមូលផ្តុំណាមួយ ដែលអាចខុសទៅនឹងច្បាប់អាជ្ញាសឹក។

កាលពីរាត្រីថ្ងៃអង្គារទី៣ខែធ្នូឆ្នាំ២០២៤ ប្រធានាធិបតីកូរ៉េខាងត្បូងលោក Yoon Suk Yeol បានបង្កការភ្ញាក់ផ្អើលដោយប្រកាសច្បាប់អាជ្ញាសឹកយ៉ាងបន្ទាន់បំផុត ដោយអះអាងពីភាពចាំបាច់ក្នុងការការពារប្រទេសពីក្រុមបក្សពួកកូរ៉េខាងជើង និងកម្លាំងប្រឆាំងរដ្ឋ។

ការប្រកាសនោះបានបង្កចលាចលពេញប្រទេស ដោយនាំឱ្យប្រជាជនចេញតវ៉ា ហើយគេឃើញមានទាំងរថក្រោះនិងកងទាហាន ដាក់ពង្រាយនៅទីក្រុងសេអ៊ូលទៀតផង។ ទោះបីជាយ៉ាងណាក៏ដោយ មិនដល់២ម៉ោងផង ច្បាប់នេះត្រូវបានសមាជិករដ្ឋសភាកូរ៉េខាងត្បូងចំនួន១៩០រូប បោះឆ្នោតប្រឆាំង ហើយលោកប្រធានាធិបតី Yoon ក៏ដកច្បាប់នេះចេញវិញ។

លោកស្រី ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានប្រាប់កម្ពុជាថ្មីថា ការប្រកាសច្បាប់អាជ្ញាសឹក មិនប៉ះពាល់ដល់ពលរដ្ឋខ្មែរនៅប្រទេសកូរ៉េនោះឡើយ។​ លោកស្រីបញ្ជាក់ថា៖«ពុំមានចលាចលទេ ពីព្រោះម្នាក់ៗកំពុងតាមដានស្ថានភាព ហើយព័ត៌មានចុងក្រោយដែលខ្ញុំទទួលបានអត់មានចលាចលទេ ម្នាក់ៗទៅធ្វើការជាធម្មតា»។

ចំណែករដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានអំពាវនាវដល់បងប្អូនសហគមន៍ខ្មែរនៅសាធារណរដ្ឋកូរ៉េ រក្សាភាពស្ងៀមស្ងាត់ កុំចូលរួមសកម្មភាពប្រមូលផ្តុំណាមួយ ដែលអាចខុសទៅនឹងច្បាប់អាជ្ញាសឹក និងបានអំពាវនាវបងប្អូនរក្សាប្រក្រតីភាពការងារ និងមេត្តាកុំលូកចូលក្នុងសកម្មភាពនយោបាយរបស់គេឱ្យសោះ។

អ្នកនាំពាក្យក្រសួងការងារ និងបណ្តុះបណ្តាវិជ្ជាជិវៈ លោក កត្តា អ៊ន បញ្ជាក់បន្ថែមថា ពាក់ព័ន្ធការវិវត្តន៍ស្ថានការណ៍នយោបាយនៅកូរ៉េនាពេលនេះ ពុំមានប៉ះពាលដល់ពលករកម្ពុជាដែលកំពុងបម្រើការងារនោះទីនោះទេ។
លោកមានប្រសាសន៍ថា៖«ទាក់ទងទៅនឹងការដាក់ និងដកច្បាប់អាជ្ញាសឹក គិតមកដល់ម៉ោងនេះបងប្អូនកម្ពុជាដែលកំពុងស្នាក់នៅសាធារណរដ្ឋកូរ៉េ ពួកគាត់បាននិងគាត់កំពុងធ្វើការជាធម្មតាដោយពុំមានអ្វីកើតឡើងចំពោះគាត់នោះទេ»។

ឆ្លៀតក្នុងឱកាសនេះ លោក កត្តា អ៊ន អំពាវនាវដល់បងប្អូនពលករកម្ពុជាទាំងអស់ សូមកុំពាក់ព័ន្ធទៅនឹងកិច្ចការនយោបាយទាំងនោះ និងបន្តធ្វើការងារតាមតួនាទីភារកិច្ចរៀងៗខ្លួនដែលជាបេសកកម្មរបស់បងប្អូនក្នុងការមកបំពេញការងារនៅកូរ៉េ ដើម្បីមានការងារ និងប្រាក់ចំណូលសម្រាប់គ្រួសារ។

សូមជម្រា​បថា គិតចាប់ពីឆ្នាំ២០០៧ ដល់ ខែមីនា ឆ្នាំ២០២៤ កម្ពុជាបានបញ្ជូនពលករសរុបចំនួន ជាង១០៦ ០០០ នាក់ ទៅធ្វើការនៅកូរ៉េខាងត្បូង ក្រោមប្រព័ន្ធអនុញ្ញាតមុខរបរ។ ក្នុងនោះ ពលករបន្តអាណត្តិប្រមាណ ១៤,០០០នាក់ បម្រើការងារក្នុងវិស័យឧស្សាហកម្ម កសិកម្ម និងសំណង់ ជាដើម។ ក្រៅពីពលករ ក៏នៅមាននិស្សិតខ្មែរកំពុងបន្តការសិក្សា និងសហគមន៍ខ្មែរដែលកំពុងរស់នៅលើទឹកដីកូរ៉េខាងត្បូងផងដែរ៕