លោកឧត្តមសេនីយ៍ទោ គង់ មនោ ប្រាប់នគរបាលអន្តរាគមន៍ យកចំណេះដឹងទៅអនុវត្តការងារនៅអង្គភាពឱ្យមានប្រសិទ្ធភាព

កោះកុង ៖ លោកឧត្តមសេនីយ៍ទោ គង់ មនោ ស្នងការនគបាលខេត្តកោះកុង ដាក់បទបញ្ជាឱ្យសិក្ខាកាមជានគរបាលចំនួន២៥រូប ដែលបានបញ្ចប់វគ្គអន្តរាគមន៍ពិសេស ត្រូវធ្វើឱ្យបានដោយយកចំណេះដឹងជំនាញទៅអនុវត្តការងារនៅអង្គភាពវិញប្រកបប្រសិទ្ធភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងបញ្ជាក់របស់លោកស្នងការនគរបាលខេត្តកោះកុ ធ្វើឡើងពិធីវគ្គហ្វឹកហ្វឺនជំនាញអន្តរាគមន៍ពិសេស ជំនាន់ទី៥ ដល់នគរបាលសិក្ខាកាមមកពីអធិការដ្ឋាននគរបាលក្រុងស្រុកចំនួន២៥នាក់។

លោកឧត្តមសេនីយ៍ទោស្នងការនគរបាលខេត្ត បានវាយតម្លៃខ្ពស់ចំពោះកិច្ចប្រឹងប្រែងរៀនសូត្រលើក្បួនយុទ្ធវិធីដែលជាមេរៀនបង្ហាត់គ្រូបង្គោលនារយៈពេលកន្លងទៅ ដើម្បីពង្រឹងសមត្ថភាពចំណេះដឹងរបស់នគរបាលតាមបណ្តាប៉ុស្តិ៍ និងអធិការដ្ឋាននគរបាលក្រុងស្រុកទាំង៧។

បន្ថែមលើនេះ លោក គង់ មនោម ក្រើនរម្លឹកថា ជាកងកម្លាំងប្រដាប់ ត្រូវនមានជំនាញវិជ្ជាជីវៈសមស្រប ស្មោះត្រង់ គោរពបទបញ្ជាវិន័យ ការស្លៀកពាក់ឯកសណ្ឋាន សំដៅធ្វើយ៉ាងណាលើកកម្ពស់សិលធម៌ តម្លៃកត្តិយស កិត្យានុភាព ក៏ដូចជាការជឿជាក់ជាខឿនសន្តិសុខជាតិរឹងមាំ និងទំនុកចិត្តពីពលរដ្ឋ។

លោកស្នងការនគរបាលបញ្ជាក់ថា ក្រសួងមហាផ្ទៃ ដឹកនាំដោយលោកអភិសន្តិបណ្ឌិត ស សុខ ឧបនាយករដ្ឋមន្រ្តី រដ្ឋមន្រ្តីក្រសួង និងលោកនាយឧត្តមសេនីយ៍ ស ថេត អគ្គស្នងការនគរបាលជាតិ បានចាត់ទុកភារបណ្តុះបណ្តាលមន្រ្តីនគរបាលជាតិ ជាការងារអាទិភាព និងចាំបាច់ដែលត្រូវតែយកចិត្តទុកដាក់ខ្ពស់ហើយបន្តធ្វើជាប់ជាប្រចាំ។

ដោយឡែកសម្រាប់គ្រូបង្គោល និងមន្រ្តីគ្រប់គ្រងវគ្គវិញ ត្រូវបន្តលើកកម្ពស់ប្រសិទ្ធភាពគ្រប់គ្រង បង្ហាត់បង្រៀន និងអនុវត្តភារកិច្ចរបស់ខ្លួនឱ្យបានសម្រេចជោគជ័យថែមទៀតទៅតាមផែនការ និងស្តង់ដារគុណភាពដែលកំណត់។ បន្តពង្រឹងគុណភាពអប់រំបណ្តុះបណ្តាលឱ្យកាន់តែប្រសើរ ដើម្បីកសាងធនធានមនុស្សក្នុងជួរកម្លាំងនគរបាលជាតិឱ្យមានសមត្ថភាព វិជ្ជាជីវៈសមស្របក្នុងការបម្រើប្រជាពលរដ្ឋ និងរាជរដ្ឋាភិបាលដោយស្មោះត្រង់បំផុត។

បញ្ហានេះ លោក ហាក់ ឡេង អភិបាលរងខេត្តកោះកុង ក៏បានចាត់ទុកថា ការហ្វឹកហ្វឺននេះ ជាកត្តាចាំបាច់សម្រាប់តួនាទីភារកិច្ចជាកងកម្លាំង បម្រើជាតិមាតុភូមិ និងប្រជាពលរដ្ឋ។ កន្លងទៅ លោកអភិបាលរងខេត្ត បានពិនិត្យឃើញថា កម្លាំងនគរបាលនៅក្នុងខេត្ត ពិតជាបានចូលរួមចំណែកយ៉ាងខ្លាំងលើការរក្សាសុខសន្តិសុខសណ្តាប់ធ្នាប់ ពិសេសសកម្មភាពទប់ស្កាត់ក្រុមជ្រុលនិយមដែលប៉ុនប៉នចង់ធ្វើបាតុកម្មផ្តួលរំលំរាជរដ្ឋាភិបាលស្របច្បាប់។

លោកអភិបាលរងខេត្ត មានសុទិដ្ឋិនិយមថា នៅពេលនគរបាលជាសិក្ខាកាមបញ្ចប់វគ្គពេលវិលត្រឡប់ទៅតាមអង្គភាពរៀងៗខ្លួន នឹងអនុវត្តតាមបទបញ្ជាវិន័យ វិជ្ជាជីវៈក្រមសិលធម៌ប្រកបដោយទំនួលខុសត្រូវខ្ពស់ និងបម្រើប្រជាពលរដ្ឋអោយការប្តេជ្ញាចិត្តរបស់ខ្លួននៅចំពោះមុខរដ្ឋបាលខេត្ត៕

អត្ថបទ ៖ សិរីវឌ្ឍនៈ