ព័ត៌មានជាតិ

ពលរដ្ឋ៤៧នាក់ ត្រូវអនុញ្ញាតឲ្យទៅលំនៅដ្ឋានវិញ

បានផុស

៥ years មុន

នៅ

ថ្ងៃចន្ទ ១៥ មីនា ២០២១

ដោយ

ពលរដ្ឋ៤៧នាក់ ត្រូវអនុញ្ញាតឲ្យទៅលំនៅដ្ឋានវិញ គិតត្រឹមថ្ងៃទី១៥ ខែមីនា ឆ្នាំ២០២១ ខណៈពលរដ្ឋដែលកំពុងធ្វើចត្តាឡីស័កនៅមណ្ឌលចត្តាឡីស័កសកលវិទ្យាល័យសម្តេចតេជោ ហ៊ុន សែន ត្បូងឃ្មុំ នៅសល់ចំនួន៣៤៦នាក់ទៀតដែលកំពុងតាមដានសុខភាព និងធ្វើចត្តាឡីស័កបន្តទៀត ។

យោងតាមប្រសាសន៍ លោកវេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានឲ្យដឹងថា ក្រុមគ្រូពេទ្យជួរមុខបានអនុវត្តការការពារ និងមើលថែរទាំសុខភាពយ៉ាងយកចិត្តទុកដាក់ចំពោះពលករ ក៏ដូចបងប្អូនប្រជាពលរដ្ឋដែលកំពុងធ្វើចត្តាឡីស័កនៅតាមមណ្ឌលដែលអាជ្ញាធរខេត្តត្បូងឃ្មុំបានរៀបចំត្រៀម ក្នុងនោះដែរមន្ទីរសុខាភិបាលខេត្តត្បូងឃ្មុំ បានផ្គត់ផ្គង់នូវម្ហូបអាហារបីពេល ក្នុងមួយថ្ងៃ ដោយមានថ្នាំសង្កូវ និងក្រុមគ្រូពេទ្យប្រចាំការជានិច្ច។

ជាក់ស្ដែងនៅថ្ងៃទី១៥ ខែមីនានេះ ក្រោយពីអនុញ្ញាត្តឲ្យបងប្អូនប្រជាពលរដ្ឋដែលគ្រប់ចំនួនថ្ងៃ និងតាមដានសុខភាពរយៈពេល១៤ថ្ងៃមក អាជ្ញាធរខេត្ត សហការគ្នា បានឲ្យពលរដ្ឋ៤៧នាក់ វិលត្រឡប់ទៅគេហដ្ឋាន ដោយណែនាំពីវិធានការអនាម័យ និងការពារជម្ងឺកូវីដ១៩ ។ ហើយលោកប្រធានមន្ទីរ បានផ្តល់បណ្ណ័បញ្ជាក់អំពីសុខភាពក្រោយពេលធ្វើចត្តាឡីស័កអោយទៀតផង។

លោកប្រធានមន្ទីរ ក៏បានអំពាវនាវដល់បងប្អូនប្រជាពលរដ្ឋ ចំណូលស្រុកមកពីប្រទេសថៃ ដែលបានយកមកធ្វើចត្តាឡីស័កធ្វើយ៉ាងណាតាមដានសុខភាពជាប្រចាំ និងត្រូវរាយការណ៍មកសមត្ថកិច្ច និងក្រុមគ្រូពេទ្យដែលប្រចាំការនៅទីនោះ ខណៈដែលមានការរកឃើញអ្នកវិជ្ជមានកូវីដ១៩ជាបន្តបន្ទាប់។ លោកវិជ្ជបណ្ឌិត កែវ វណ្ណៈ បានបន្ថែមទៀត ថា សូមស្នើសុំដល់បងប្អូនប្រជាពលរដ្ឋត្រូវអនុវត្តតាមសេចក្តីណែនាំរបស់ក្រសួងសុខាភិបាលបានចាំបាច់ត្រូវរក្សាសុខភាពរបស់ខ្លួន និងចូលរួមអនុវត្តរស់នៅតាមគន្លងថ្មី ដោយអនាម័យទៅតាមក្រសួងសុខាភិបាល គឺចាំបាច់បំផុតត្រូវតែបន្តអនុវត្តជាប្រចាំ ជាពិសេសអនុវត្តតាម វិធាន ៣កុំ និង៣ការពារ របស់រាជរដ្ឋាភិបាល៕

អត្ថបទ ៖ ហុង ម៉េងហៀ